Kwestin Blong Olgeta We Oli Ridim Magasin Ya

?Ol Witnes Blong Jeova Oli Akseptem Oltesteman?

Ol Witnes blong Jeova oli tekem Baebol olsem Tok blong God mo oli akseptem Oltesteman mo Niutesteman tugeta, olsem ol haf we oli impoten tumas insaed long Baebol. Nating se i olsem, oli laekem blong yusum ol nem ya we oli stret moa long tufala haf ya, olsem “Hibru haf blong Baebol” mo “Kristin Grik haf blong Baebol.” Tufala faswan lanwis we oli bin yusum blong raetem Oltesteman mo Niutesteman, hemia Hibru lanwis mo Grik lanwis.

Be sam man we oli talem se oli Kristin oli no wantem akseptem Oltesteman. Oli talem se haf ya i soemaot wan God blong kros we i glad nomo long ol faet, long fasin blong kilim man i ded, mo sam narafala fasin we oli no laenap nating wetem God blong lav we Niutesteman i tokbaot. Oli talem tu se, Oltesteman i toktok plante long saed blong skul blong ol man Jiu, taswe haf ya i no stret long ol Kristin tede. Be tok blong God we i stap long Dutronome 12:32, i talem se yumi no mas joenem sam narafala tok bakegen long tok ya blong Baebol, mo yumi no mas tekemaot samfala tok blong Baebol. ?Taswe, ol tok ya we ol man oli talem antap, oli ol gudfala risen blong sakemaot 75 pesen blong Baebol?

Samwe long yia 50 K.T., taem Kristin aposol Pol i visitim ol man Tesalonaeka long Gris, hem i stap mekem plante toktok from ol tok blong Baebol [“blong pulum tingting blong olgeta,” NW]. Hem i stap talem long olgeta, we Baebol i talemaot klia we Mesaea bambae i mas harem nogud long bodi blong hem gogo i ded, mo we God bambae i mekem hem i laef bakegen.” (Ol Wok 17:1-3) Sam long ol man we oli stap lesin oli kam Kristin, mo biaen Pol i talem ol gudfala tok long olgeta, i se: “Taem mifala i tekem tok blong God i kam long yufala, yufala i kasemgud. Yufala i no tekem olsem we i tok blong man nomo, yufala i kasemgud from we hem i tok blong God stret.” (1 Tesalonaeka 2:13) Long taem ya, Matiu i raetem Gospel blong hem finis, be ol narafala 26 buk blong Kristin Grik haf blong Baebol oli no stap yet. Taswe, i klia se “ol tok blong Baebol” we Pol i yusum blong pruvum ol toktok blong hem, hemia ol tok we oli stap long Hibru haf blong Baebol.

Klosap 320 taem, olgeta we oli raetem Kristin Grik haf blong Baebol oli yusum ol toktok we oli kamaot stret long Hibru haf blong Baebol, mo plante handred narafala taem oli jes tokbaot sam vas blong Hibru haf blong Baebol. ?From wanem oli mekem olsem? “Olgeta tok ya we oli raetem long Baebol bifo, oli raetem blong tijim yumi. Nao tingting blong yumi i save stap strong, from we tok ya blong Baebol i stap mekem yumi harem gud, i stap mekem tingting blong yumi i longfala.” (Rom 15:4) Samting ya i soemaot se Baebol bambae i givhan gud long olgeta man tede we oli akseptem hem fulwan.

Kristin Grik haf blong Baebol i stanap long Hibru haf blong Baebol. Kristin Grik haf blong Baebol i joen wetem Hibru haf blong Baebol, blong soemaot olsem wanem, sloslo ol stamba tingting blong God oli kamtru. Haf ya i no daonem nating Hibru haf blong Baebol. Man ya, Herbert H. Farmer, wan tija blong yunivesiti ya Cambridge, i talem se buk blong ol Gospel, “man i no save kasem save long hem sipos hem i no savegud laef blong ol man Isrel bifo, taem oli stap yet aninit long Loa blong Moses, olsem we Oltesteman i tokbaot.”

I no nidim blong man i jenisim sam samting long Tok blong God. Nating se i olsem, “rod we ol stret man oli stap wokbaot long hem, fasin blong hem i olsem eli moning, we i stat brok delaet, we oltaem, ol samting oli stap kam klia moa, gogo i delaet gud, mo san i kam antap.” (Ol Proveb 4:18) I stret nomo we Kristin Grik haf blong Baebol i go wetem ol narafala buk blong Baebol we oli stap finis. Long rod ya, God i soemaot klia olsem wanem hem i stap mekem ol stamba tingting blong hem oli kamtru. Mo taem hem i mekem olsem, hem i no daonem nating Hibru haf blong Baebol. Olgeta evriwan oli mekemap fulwan haf blong ‘tok blong [“Jeova,” NW] we bambae i stap oltaem, gogo i no save finis.’—1 Pita 1:24, 25.