?Olsem Wanem? ?Olgeta Skul Oli Gud?

LONG wol ya, i gat plante plante defren skul. Long wan sensas we ol man oli mekem, oli kaontem 19 bigfala skul mo samwe long 10,000 smol skul long wol. I no gat wan taem bifo we i gat plante skul olsem, we ol man wanwan oli save jusumaot wan long olgeta blong joen long hem. Taswe, ?yu ting se i oraet nomo blong jusum eniwan long ol skul ya?

Samfala oli talem se ol defren skul oli olsem ol defren rod we oli stap go antap long wan hil. Long tingting blong olgeta, i oraet blong folem eniwan long ol rod ya, from we olgeta evriwan oli go long sem ples. Ol man ya oli talem se i gat wan God nomo we i gat olgeta paoa, ale olgeta skul oli mas lidim man i go long Hem.

?Olgeta Skul Oli Lidim Man i Go Long God?

Ol man oli respektem Jisas Kraes olsem wan gudfala tija blong tok blong God, i bitim ol narafala tija we oli laef samtaem. Oraet, ?Jisas i talem wanem long saed blong bisnes ya? Hem i talem long ol disaepol blong hem se: “Yufala i mas pas long get ya we i smol nomo.” ?From wanem? “From we get ya we i bigwan, mo rod ya we i isi nomo, hemia i blong go lus. Mo plante man oli stap folem rod ya. Be get ya we i smol nomo, mo rod we i strong, hemia i blong go kasem laef. Mo smol man nomo oli faenem.”—Matiu 7:13, 14.

?Olsem wanem? ?Jisas i stap talem se sam skul oli save lidim man ‘blong i go lus’? ?Hem i stap talem se ol man we oli no bilif long God nating, olgeta nao oli stap long rod we i bigwan? ?Hem i wantem minim se olgeta we oli bilif long God, nomata wanem skul oli stap long hem, oli stap folem smol rod ya we i blong go kasem laef?

Afta we Jisas i talem se i gat tufala rod ya nomo, hem i se: “Yufala i mas lukaot long ol giaman profet, blong oli no kam spolem yufala. Olgeta ya oli save kam long yufala, we oli kwaet olsem sipsip nomo, be fasin blong olgeta, oli olsem wael dog stret.” (Matiu 7:15) Biaen hem i talem se: “I no olgeta man evriwan we oli stap singaot mi se ‘Masta, Masta’ we bambae oli save go insaed long niufala wol ya we God i king long hem. Man we i stap mekem ol samting we Papa blong mi long heven i wantem, hem nomo bambae i save go insaed.” (Matiu 7:21) Sipos wan man i wan profet no i stap talem se Jisas i “Masta” blong hem, hemia i min se man ya i wan man blong skul mo i bilif long God. Ale, Jisas i stap givim woning se i no olgeta skul evriwan we oli gud, mo i no olgeta tija blong tok blong God we yumi save trastem.

?Man i Naf Blong Luksave Smol Rod?

Sipos i no olgeta skul evriwan we oli lidim man i go long God, ?olsem wanem yu save faenem smol rod ya we i lidim man i go long laef, long medel blong plante taosen skul? Traem tingbaot sipos yu lus long wan bigfala taon. Ale yu askem sam man blong soemaot rod long yu. Wan long ol man ya i sua se hem i save rod, nao hem i talem long yu blong tanem i go long raetsaed. Wan narafala man i talem strong long yu se yu mas tanem i go long lefsaed. Wan narafala man bakegen i talem long yu blong jusum wanem rod we yu yu harem se i stret long yu. Namba fo man i karemaot wan map we yu save trastem, nao i soemaot stret rod long yu. Afta, hem i givim map ya long yu blong yu save lukluk long hem taem yu stap wokbaot. ?Olsem wanem? ?Samting ya i mekem yu yu sua moa se bambae yu kasem ples we yu wantem go long hem?

Long sem fasin, taem yumi wantem jusum stret skul blong joen long hem, yumi mas gat samting olsem map we yumi save trastem blong givhan long yumi. ?I gat wan samting olsem? Yes, i gat. Baebol nao i olsem map ya. Mo hem wan i talem se: “Olgeta tok blong Baebol oli kamaot long God fastaem. Hem i putum long tingting blong ol man  ya bifo, nao oli raetem long buk. Ol tok ya i stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin.”—2 Timoti 3:16.

Ating yu save kasem wan Baebol long lanwis blong yu, blong yusum olsem wan map blong soemaot stret rod blong wosipim God. Ol Witnes blong Jeova we oli wokem magasin ya, oli wokem wan Baebol we yumi save trastem, nem blong hem New World Translation of the Holy Scriptures. Be sipos yu yu no wan Witnes blong Jeova, maet yu laekem moa blong yusum wan narafala Baebol, taem yu stap skelem ol skul blong luk weswan i gud mo weswan i nogud. From samting ya, magasin ya i yusum Baebol Long Bislama we ol narafala skul oli agri long hem.

Taem yu ridim ol haf we oli kam biaen, traem skelem wanem we yu yu save finis wetem wanem we Baebol i talem. Tingbaot tok blong Jisas we i talem olsem wanem blong luksave skul we i gud mo skul we i nogud. Hem i se: “Gudfala tri, hem i save karem gudfala frut nomo, mo rabis tri, hem i save karem rabis frut nomo. Be gudfala tri i no save karem rabis frut, mo rabis tri i no save karem gudfala frut.” (Matiu 7:17, 18) Tingbaot trifala frut we Baebol i talem se oli makemaot “gudfala tri.”