?Sipos Man i Pua, i Min Se God i No Glad Long Hem?

GOD i talem long ol man Isrel bifo se: “I no gat wan long yufala we i save kam puaman.” Hem i talem olsem from we folem Loa we Hem i givim long olgeta, i gat ol samting we ol man Isrel oli mas mekem blong lukaot long olgeta we oli pua, mo oli no mas askem kaon long man we i pua. (Dutronome 15:1-4, 7-10) Taswe i no sud gat puaman long neson blong Isrel, from we Jeova i promes blong blesem olgeta. Be i tru se promes ya blong hem i save kamtru nomo sipos ol man Isrel oli obei long Loa. Olgeta ya oli no bin obei oltaem, taswe promes ya i no kamtru long olgeta.

Nating se i olsem, sipos wan man i pua, hemia i no min se God i no glad long hem, sem mak tu sipos wan man i rij, hemia i no min se God i stap blesem hem. Plante long ol man blong God oli no gat plante samting long saed blong bodi. Profet Amos i wan puaman we i stap lukaot long sipsip mo i wan man blong wok long plantesen blong figtri. (Amos 1:1; 7:14) Long taem blong profet Elaeja, kakae i sot bigwan long Isrel, nao Elaeja i dipen long kaen fasin blong wan wido woman we i pua. Wido woman ya i gat smol flaoa mo smol oel nomo i stap, ale Jeova i mekem wan merikel blong bambae hem i gat naf flaoa mo oel gogo kasem taem we kakae i no moa sot long kantri ya. Be Jeova i no mekem Elaeja i rij mo i no mekem wido woman ya tu i kam rij. Hem i givim naf nomo blong oli save laef evri dei.—1 King 17:8-16.

Ol samting we yumi no tingbaot oli save kamaot wantaem nomo mo oli save mekem we man i kam pua. Aksiden mo sik i save kamaot mo blokem man blong i no wok blong smoltaem, no maet i mekem we hem i no moa save wok nating. Mo ded tu i save mekem we ol pikinini mo ol mama oli stap olgeta nomo, oli no moa gat papa. Ol trabol ya, we oli nogud olgeta, oli no min se God i kros long olgeta. Stori blong Nomi mo Rut i wan gudfala eksampol blong soemaot se Jeova i lavem tumas olgeta we oli gat nid, mo i kea bigwan long olgeta. Nating se Nomi mo Rut i pua tumas from we hasban blong tufala i ded, be Jeova God i blesem tufala bigwan mo i givim ol samting we tufala i nidim.—Rut 1:1-6; 2:2-12; 4:13-17.

Yes i klia se fasin ya we man i pua i no min se God i no glad long man ya. Ol man we oli holemstrong long Jeova God, oli save trastem ol tok ya we King Deved i raetem se: “Naoia mi mi olfala, mi stap longtaem, be neva mi luk wan gudfala man we Hae God i lego hem, no ol pikinini blong man olsem we oli stap asaskem kakae olbaot.”—Ol Sam 37:25.

[Tok blong pija long pej 8]

Nating se Nomi mo Rut tufala i pua, be God i blesem tufala mo i lukaotgud long tufala