Namba Faef Giaman Tingting: Meri i Mama Blong God

?Giaman tingting ya i kamaot long weples? “Fasin ya blong wosipim mama blong God i kam strong moa taem . . . fulap hiten man oli joen long jos. . . . Fasin blong olgeta [ol hiten man ya we oli joen long Kristin skul] blong ona mo blong wantem mekem wosip i stap strong long olgeta finis. Hemia from wosip we i gohed plante taosen yia finis, wosip blong ‘bigfala mama’ god ya mo ‘woman god ya we i no slip wetem man samtaem.’”—The New Encyclopædia Britannica (1988), Buk namba 16, pej 326 mo 327.

?Baebol i talem wanem? “Bambae yu yu gat bel, mo bambae yu save bonem wan pikinini boe blong yu, mo bambae yu putum nem blong hem, se Jisas. Hem bambae i wan haeman, mo ol man bambae oli save singaot hem, se Pikinini blong God ya we i hae we i hae . . . . From samting ya, pikinini ya blong yu bambae i tabu, i blong God, mo ol man bambae oli save singaot hem, se Pikinini blong God.”—Mifala nomo i ademap narafala raeting; Luk 1:31-35.

Ol tok ya blong Baebol oli talem klia se Meri i mama blong “Pikinini blong God,” be i no mama blong God. Tingbaot, ‘heven i bigfala we i bigfala, be olgeta ples blong hem i no naf long God.’ Ale, ?olsem wanem God i save stap insaed long bel blong Meri? (1 King 8:27) Meri i neva talem se hem i mama blong God. Tijing blong Triniti nao i mekem se tingting blong ol man i fasfas long saed blong Meri. Long yia 431 K.T., Kaonsel blong jos i sidaon long Efesas, mo i talemaot se Meri i Theotokos (wan Grik wod we i minim “woman we i karem God”), no “Mama blong God.” Taem oli mekem olsem, oli openem rod blong ol man oli wosipim Meri. Blong plante handred yia finis, taon ya Efesas we kaonsel blong jos i sidaon long hem, i stamba ples blong wosip blong ol aedol. Oli stap mekem lafet blong woman god ya, Atemis, we i save mekem ol woman oli karem plante pikinini.

Ale, ol lida blong jos oli joenem plante haf blong wosip blong pija blong Atemis we i “aot long heven i foldaon i kam,” wetem wosip blong Meri. Wan long olgeta, hemia fasin blong karem aedol mo wokbaot long rod. (Ol Wok 19:35) Wan narafala fasin blong wosip we i kam insaed long Kristin tijing, hemia fasin blong yusum ol pija blong Meri mo ol narafala samting, blong mekem wosip.

Skelem ol vas ya blong Baebol: Matiu 13:53-56; Mak 3:31-35; Luk 11:27, 28

SAMTING WE I TRU:

Meri hem i mama blong Pikinini blong God, be i no mama blong God. Giaman tingting long saed blong Triniti i statem fasin ya blong mekem wosip long Meri olsem Mama blong God