?Baebol Hem i Tok Blong God?

“Olgeta tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin. Ol tok ya, God i givim blong bambae yumi ol man blong hem yumi save kam waes long olgeta samting, nao bambae yumi savegud ol rod blong mekem ol gudfala wok.”—2 TIMOTI 3:16, 17.

!OL TOK ya blong aposol Pol oli gat bigfala paoa! !Hem i talem ol tok ya blong soemaot gudfala wok we Baebol i save mekem! I tru se, Pol i stap tokbaot haf blong Baebol we hem i gat long taem blong hem, hemia we samtaem ol man oli kolem se Oltesteman. Nating se i olsem, tok blong Pol i stret long olgeta 66 buk blong Baebol, i minim olgeta ya tu we ol man blong Jisas oli raetem long faswan handred yia.

?Olsem wanem long yu? ?Yu yu tinghae long Baebol olsem Pol? ?Yu ting se God i rili putum ol tok blong hem long tingting blong sam man, blong oli raetem long Baebol? Ol faswan Kristin oli bilif strong se hemia i tru. Mo nating se plante handred yia i pas, ol trufala Kristin oli gohed yet blong bilif strong long samting ya. Tingbaot man Inglan ya, John Wycliffe, we i laef long ol yia 15 handred. Long tingting blong man ya, Baebol i wan buk we i “neva mestem taem i soemaot rod we i stret.” Wan buk (The New Bible Dictionary) i tokbaot ol tok blong Pol long vas antap, mo i talem se from we God “i putum ol tok blong Baebol long tingting blong ol man, yumi save trastem se ol tok ya oli tru.”

Tingting Blong Man i Jenis Long Saed Blong Baebol

Sloslo, ol man long taem blong yumi oli no moa luk Baebol olsem wan buk we oli save trastem. Wan  buk we nem blong hem The World’s Religions, i talem se: “Ol man oli stap talem se olgeta Kristin oli agri [yet] se Baebol i gat paoa blong lidim olgeta, mo bilif blong olgeta i stanap long hem.” Be samting ya i no moa tru tede. Plante man oli luk ol tok blong Baebol olsem “ol tingting mo fasin blong laef blong ol man bifo, mo yumi no save trastem ol tok olsem.” Oli agri se ol man we oli raetem Baebol oli gat strong bilif. Be oli ting se ol man ya oli save mestem. Oli ting se oli stap traehad blong eksplenem ol dip trutok long saed blong God, be oli no gat save mo waes we yumi gat tede.

Blong talem stret, long taem blong yumi, smol man nomo oli letem Baebol i lidim tingting mo aksen blong olgeta. ?Yu yu harem finis we ol man oli talem se ol rul blong Baebol oli olfala mo oli no stret long taem blong yumi? Plante man we oli tijim Baebol, oli tijim nomo ol samting we bambae ol man oli glad blong harem. Be oli haedem ol loa mo strong tok blong Baebol we i save mekem ol man oli no glad long olgeta. Sam man we oli talem se oli Kristin, oli no sem blong sakemaot ol rul we Baebol i talem long saed blong fasin blong boe mo gel we tufala i slip tugeta bifo mared, man we i slip wetem woman blong narafala, fasin blong stil mo giaman, mo fasin blong drong.—1 Korin 6:9. 10.

?From wanem oli mekem olsem? Long stat blong ol yia 19 handred, wan man blong digim graon, Masta Charles Marston, i faenemaot wan ansa blong kwestin ya mo i raetem long buk blong hem The Bible Is True. Hem i talem se, ol man oli hareap tumas blong “agri long tingting blong plante man we oli raetem ol buk” blong agensem Baebol. ?Olsem wanem? ?Ol man long taem blong yumi oli gat tingting ya yet? Ol hae man blong stadi, oli stap talemaot tingting mo bilif blong olgeta long saed blong Baebol, we i mekem se ol man oli no moa trastem Baebol. ?Wanem tingting we yu yu mas gat long ol man olsem? Lukluk wanem we nekis haf bambae i talem long saed ya.