Jisas i Soemaot Klia Se Fasin Blong God i Stret

“God i givim Jisas Kraes blong hem i ded, blong blad blong hem i save tekemaot ol sin blong ol man we oli bilif long hem. Hem i mekem olsem blong . . . soemaot we fasin blong hem i stret.”—ROM 3:25, 26.

1, 2. (a) ?Baebol i talem se olgeta man oli olsem wanem? (b) ?Wanem ol kwestin we bambae yumi tokbaot long stadi ya?

KLOSAP olgeta man oli save stori blong Baebol long saed blong fasin stronghed long garen blong Iden. Yumi evriwan i kasem trabol from sin blong Adam, olsem Baebol i eksplenem, se: “Bifo olgeta, wan man nomo i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded, from we olgeta oli mekem sin.” (Rom 5:12) Nomata we yumi traehad oltaem blong mekem samting we i stret, be yumi stap mestem, mo yumi mas askem long God blong i fogivim yumi. Aposol Pol tu i harem nogud long ol mastik blong hem, i talem se: “Oltaem mi no mekem ol gudgudfala fasin ya we mi wantem mekem, mi stap mekem ol rabis fasin ya, we mi no wantem mekem nating. Man. Mi mi no save harem gud nating.”—Rom 7:19, 24.

² Long stadi ya, bambae yumi tokbaot ol impoten kwestin olsem: ?From we evri man long wol oli sinman, olsem wanem Jisas blong Nasaret i bon olsem wan man we i no gat sin? ?From wanem Jisas i baptaes? ?Olsem wanem laef blong Jisas i soemaot se fasin blong Jeova i stret? Kwestin we i moa impoten, hemia se: ?Wanem gudfala samting i kamaot from ded blong Jisas?

Setan i Talem se Fasin Blong God i No Stret

3. ?Olsem wanem Setan i giaman long Iv?

³ Faswan papa mama blong yumi, Adam mo Iv, tufala i mekem samting we i no waes nating. Tufala i no moa wantem we God i rul long tufala, be tufala i wantem we “snek ya blong bifo we nem blong hem ‘Setan’ no ‘Man we i agensem man,’” i rul long tufala. (Rev. 12:9) Traem tingbaot samting we i hapen. Setan i askem wan kwestin long Iv we i givim tingting se Jeova God i stap rul long fasin we i no stret. Hem i askem se: “?Olsem wanem long frut blong ol tri long ples ya? ?I tru we God i blokem olgeta se i tabu, yutufala i no save kakae, no i no tru olsem?” Ale, Iv i talem ol klia tok we God i talem long tufala taem i putum  tabu long wan tri, mo i talemaot panis blong ded we tufala bambae i kasem sipos tufala i tajem tri ya. Be Setan i talem se God i stap giaman, i se: “Yutufala i no save ded.” Nao hem i giaman long Iv se God i stap blokem hem blong i no kasem wan gudfala samting. Hem i talem se sipos Iv i kakae frut blong tri ya, bambae hem i kam olsem God, nao hem nomo i save jusum wanem fasin i gud mo wanem fasin i nogud.—Jen. 3:1-5.

4. ?Olsem wanem ol man oli kam aninit long rul blong enemi ya Setan?

⁴ Blong talem long sot tok nomo: Setan i stap talem se ol man bambae oli harem gud moa sipos oli seraot long God mo folem prapa tingting blong olgeta. Adam i no tekem saed blong God se rul blong God nomo i stret. Hem i lesin long woman blong hem, mo i joen wetem woman ya blong kakae frut we God i putum tabu long hem. Long rod ya, Adam i kam wan man we i no moa stret gud long fes blong God. Mo tu, hem i mekem se yumi evriwan i kasem bigfala trabol ya blong sin mo ded. Wan moa samting bakegen, se olgeta man oli kam aninit long rul blong enemi ya Setan, we hem i “rabis god blong wol ya.”—2 Kor. 4:4; Rom 7:14.

5. (a) ?Olsem wanem Jeova i mekem samting we hem i talem finis? (b) ?God i mekem wanem promes we ol pikinini blong Adam mo Iv oli save putum tingting blong olgeta i stap strong long hem?

⁵ Jeova i mekem samting we hem i talem finis, hem i givim panis blong ded long Adam mo Iv. (Jen. 3:16-19) Be hemia i no min se tingting we God i gat fastaem bambae i no moa kamtru. Taem Jeova i jajem Adam mo Iv, hem i talem wan gudfala promes we ol pikinini blong tufala oli save putum tingting blong olgeta i stap strong long hem. Hem i tokbaot ‘wan pikinini’ we bambae i kamaot biaen, nao Setan bambae i kakae leg blong pikinini ya. Be bambae hem i kamgud bakegen, nao hem bambae i “smasem hed blong [Setan].” (Jen. 3:15, futnot) Baebol i givim moa save long saed ya, taem i tokbaot Jisas Kraes se: “Pikinini blong God i kamtru, blong hem i brekemdaon ol wok we Setan i mekem.” (1 Jon 3:8) ?Be olsem wanem fasin blong Jisas mo ded blong hem i soemaot klia se fasin blong God i stret?

Mining Blong Baptaes Blong Jisas

6. ?Olsem wanem yumi save se Jisas i no gat sin blong Adam?

⁶ Taem Jisas i kam bigwan, hem i sem mak olsem Adam, bifo we Adam i mekem sin. (Rom 5:14; 1 Kor. 15:45) Hemia i min se Jisas i stret gud taem hem i bon. ?Olsem wanem samting ya i save hapen? Enjel Gabriel i eksplenem gud long Meri, mama blong Jisas, se: “Tabu Spirit bambae i kam long yu, mo paoa blong God ya we i hae we i hae, bambae i kavremap yu olsem wan sado. Nao from samting ya, pikinini ya blong yu bambae i tabu, i blong God, mo ol man bambae oli save singaot hem, se Pikinini blong God.” (Luk 1:35) I luk olsem we taem Jisas i smol nomo, Meri i talemaot sam samting long hem long saed blong taem we hem i bon. Taswe, long taem ya we Meri mo Josef, tufala i faenem Jisas long haos blong God, smol boe ya i askem long tufala se: “?Yutufala i no save se mi mi mas stap long haos blong Papa blong mi?” (Luk 2:49) I klia se taem Jisas i smol nomo, hem i save se hem i Pikinini blong God. Taswe, long tingting blong hem, i impoten tumas we hem i soemaot klia se fasin blong God i stret.

7. ?Wanem ol gudgudfala samting we Jisas i gat?

⁷ Oltaem Jisas i wantem kasem moa save long saed blong God. Blong mekem olsem, hem i go long olgeta miting blong wosip. From we tingting blong hem i stret gud, yumi save se hem i mas kasem save gud long evri samting we hem i harem mo ridim long ol Hibru hanraet blong Baebol. (Luk 4:16) Jisas i gat wan narafala samting bakegen we i gud tumas, hemia bodi blong hem we i stret gud, mo we hem i givim blong sevem ol man. Taem Jisas i baptaes, hem i stap prea, mo maet hem i stap tingbaot profet tok blong Ol Sam 40:6-8.—Luk 3:21; ridim Hibrus 10:5-10. *

8. ?From wanem Jon Baptaes i traem blong blokem Jisas blong i no baptaes?

⁸ Fastaem, Jon Baptaes i traem blong blokem Jisas blong i no baptaes. ?From wanem? From we Jon i stap baptaesem ol man Jiu blong oli soemaot se oli tanem tingting blong olgeta from sin we oli mekem taem oli brekem Loa blong Moses. Jon i famle wetem Jisas, ale Jon i mas save se Jisas i wan stret man, i no nid blong hem i tanem tingting blong hem from sin. Be Jisas i mekem Jon i save se i stret nomo we Hem i mas baptaes, i se: “Long fasin ya, bambae  yumitufala i mekem olgeta samting we God i wantem, oli kamtru.”—Mat. 3:15.

9. ?Wanem mining blong baptaes blong Jisas?

⁹ From we Jisas i stret gud olgeta olsem Adam, hem i save tingbaot se hem i naf blong kam papa blong ol pikinini we olgeta tu oli stret gud. Be Jisas i no wantem samting ya, from we Jeova i no wantem. Jisas i Pikinini ya, no Mesaea, we God i promes blong sanem. Taswe Jisas i mas mekem wok we Jeova i wantem hem blong mekem. Haf blong wok ya i blong givim stret laef blong hem olsem wan sakrefaes. (Ridim Aesea 53:5, 6, 12.) I tru, baptaes blong Jisas i no gat sem mining olsem baptaes blong yumi. Hem i no givim laef blong hem i go long Jeova, from we hem i wan man Isrel, mo neson ya i blong God finis. Be baptaes blong Jisas i soemaot se hem i rere blong mekem samting we God i wantem, folem ol tok we Baebol i talem long saed blong Mesaea.

10. ?Olsem wanem Jisas i mekem samting we God i wantem se Mesaea i mekem? ?Wanem tingting blong Jisas long saed blong ol wok ya?

¹⁰ Samting we Jeova i wantem, hemia se Jisas i talemaot gud nius blong Kingdom blong God, hem i pulum sam man oli kam disaepol blong hem, mo hem i rerem olgeta blong mekem wok ya blong pulum ol narafala man bakegen oli kam disaepol. Taem Jisas i rere blong mekem samting we God i wantem, hem i rere blong kasem trabol tu, mo harem nogud gogo hem i ded. Long rod ya, hem i agri se rul blong Jeova God i stret nomo. Jisas i lavem tumas Papa blong hem long heven. Taswe hem i harem gud tumas blong mekem samting we God i wantem. Ale, hem i glad tumas blong givim bodi blong hem olsem wan sakrefaes. (Jon 14:31) Hem i glad tu blong save se laef blong hem we i stret gud olgeta, i naf long tingting blong God blong pemaot yumi long sin mo ded. ?Olsem wanem? ?God i agri taem Jisas i soemaot se hem i rere blong mekem ol bigfala wok ya? !Yes, hem i glad tumas!

11. ?Jeova i mekem wanem blong soemaot se hem i agri long Jisas olsem Mesaea no Kraes?

¹¹ Ol fo Gospel evriwan oli tokbaot samting we Jeova God i mekem blong soemaot se hem i glad long Jisas, taem Jisas i kamaot long wota long Jodan Reva. Jon Baptaes i talem se: “Mi luk we Tabu Spirit i aot long heven, i kamdaon olsem wan sotleg, i kam sidaon long [Jisas]. Nao mi mi luk samting ya, mo mi talemaot se man ya, hem i Pikinini blong God.” (Jon 1:32-34) Mo tu, long taem ya, Jeova i talemaot se: “Hemia pikinini blong mi, we mi lavem hem tumas. Mi mi glad tumas long hem.”—Mat. 3:17; Mak 1:11; Luk 3:22.

Holemstrong Long God Go Kasem Ded

12. ?Afta we Jisas i baptaes, hem i mekem wanem blong tri yia haf?

¹² Long tri yia haf, Jisas i gohed blong yusum ful paoa blong hem blong tijim ol man long saed blong Papa blong hem, mo rul blong God we i stret. Hem i wokbaot finisim Promes Lan, mo samting ya i mas mekem hem i taed. Nating se i olsem, i no gat wan samting we i save blokem hem. Hem i gohed nomo blong talemaot trutok. (Jon 4:6, 34; 18:37) Jisas i tijim ol man long saed blong Kingdom blong God. Taem hem i mekem merikel long ol sikman, mo i givim kakae long fulap man, mo i mekem dedman i laef bakegen, hem i soemaot wanem we Kingdom bambae i mekem long olgeta man.—Mat. 11:4, 5.

13. ?Jisas i tijim wanem samting long saed blong prea?

¹³ Jisas i no leftemap hem wan se hem nao i stamba blong ol tijing we hem i givimaot mo ol merikel we hem i mekem, nogat. Hem i gat tingting daon, ale hem i soemaot wan nambawan eksampol taem i givim olgeta ona i go long Jeova nomo. (Jon 5:19; 11:41-44) Mo tu, Jisas i mekem yumi save ol samting we oli impoten blong prea from. Taem yumi prea, yumi mas askem se nem blong God, Jeova, i stap “tabu.” Mo tu, yumi mas askem blong stret rul blong God bambae i tekem ples blong rabis rul blong Setan. Olsem nao, ‘olgeta man long wol bambae oli mekem ol samting we God i wantem, olsem we olgeta long heven oli stap mekem.’ (Mat. 6:9, 10) Mo tu, Jisas i pulum yumi blong wok folem ol prea ya, taem hem i talem se yumi mas “lukaot kingdom mo stret fasin blong [God] fastaem.”—Mat. 6:33, NW.

14. ?Nating se Jisas i stret gud, from wanem hem i mas traehad bigwan blong mekem wok blong hem folem stamba tingting blong God?

¹⁴ Stret taem blong Jisas i ded olsem wan sakrefaes i stap  kam klosap. Tingting blong Jisas i stap kam hevi from bigfala wok we i stap yet long fored long hem. Hem i mas stanap strong taem ol man oli mekem i nogud long hem gogo hem i ded, blong mekem se stamba tingting blong Papa blong hem i kamtru, mo blong leftemap nem blong Papa blong hem. Faef dei bifo we Jisas i ded, hem i prea se: “‘Naoia tingting blong mi i hevi tumas. ?Bambae mi save talem olsem wanem? Mi no save talem se, ‘Papa, plis yu no letem ol trabol ya we oli stap kam naoia, oli kasem mi.’ Nogat. Mi mi kam long wol ya blong oli kasem mi.” Fastaem, Jisas i talemaot filing blong hem olsem wan man. Be kwiktaem nomo, hem i jenisim toktok blong hem. Hem i no tingbaot hem wan, be hem i tingbaot samting we i moa impoten. Ale hem i prea se: “Papa, plis yu leftemap nem blong yu.” Wantaem nomo, Jeova i ansa long hem se: “Mi mi leftemap nem blong mi finis, mo bambae mi leftemap bakegen.” (Jon 12:27, 28) Yes, Jisas i rere blong fesem trabol we i traem bilif blong hem moa, i bitim enikaen trabol we olgeta narafala man oli fesem. Taem Jisas i harem tok ya blong Papa blong hem long heven, yumi save se hemia i mas mekem tingting blong hem i strong. Nao bambae hem i naf blong soemaot se rul blong Jeova i stret mo i beswan. !Mo i tru, hem i soemaot samting ya!

?Wanem Gudfala Samting i Kamaot From Ded Blong Jisas?

15. ?Jes bifo we Jisas i ded, from wanem hem i talem se: “Olgeta samting i finis nao”?

¹⁵ Taem Jisas i stap hang long pos mo i pulum laswan win blong hem, hem i talem se: “Olgeta samting i finis nao.” (Jon 19:30) !Tru ya, wetem help blong God, Jisas i finisim plante bigfala wok long tri yia haf ya, stat long taem we hem i baptaes go kasem we hem i ded! Taem Jisas i ded, graon i seksek bigwan. Samting ya i pulum wan kapten blong ami blong Rom, we i bos blong ol soldia we oli nilim Jisas long pos, blong i talem se: “Tru ya. Hem i Pikinini blong God ya.” (Mat. 27:54) Ating kapten ya i stap, taem ol man oli jikim Jisas from we hem i stap talem se hem i Pikinini blong God. Nating se Jisas i safa bigwan, be hem i holemstrong long God mo i soemaot se Setan i wan rabis man blong giaman. Setan i tok agens long man we i stanap strong long rul blong God, i se: “Hem i save lego olgeta samting we hem i gat blong i sevem laef blong hem.” (Job 2:4) Taem Jisas i holemstrong long God, hem i soemaot se Adam mo Iv tufala i naf blong stanap strong taem oli kasem trabol we i smol moa long hemia we Jisas i kasem. Be Jisas i soemaot samting we i moa impoten, long laef blong hem mo long ded blong hem tu. Hem i leftemap rul blong Jeova mo i soemaot klia se fasin blong Jeova blong rul i stret. (Ridim Ol Proveb 27:11.) ?Olsem wanem? ?I gat sam moa gudfala samting bakegen we oli kamaot from ded blong Jisas? !Yes!

16, 17. (a) ?Olsem wanem Jeova i save luk ol witnes blong hem bifo long Kraes olsem we oli stret man long fes blong hem? (b) ?Olsem wanem Jeova i mekem i gud long Pikinini blong hem we i holemstrong long hem? ?Masta Jisas Kraes i stap gohed blong mekem wanem?

¹⁶ I gat plante man blong Jeova we oli laef bifo we Jisas i kam long wol ya. God i luk olgeta olsem we oli stret man, mo i mekem promes long olgeta se bambae oli laef bakegen long ded. (Aes. 25:8; Dan. 12:13) ?Be from we Jeova God i tabu mo i klin gud, wanem stret rod we hem i save yusum blong givim ol nambawan blesing ya long ol man we oli sinman nomo? Baebol i eksplenem se: “God i givim Jisas Kraes blong hem i ded, blong blad blong hem i save tekemaot ol sin blong ol man we oli bilif long hem. Hem i mekem olsem . . . from we bifo, tingting blong hem i longfala, nao hem i letem ol sin blong ol man i stap fastaem. Be naoia long taem blong yumi, hem i soemaot we fasin blong hem i stret, mo we hem i stap mekem olgeta man we oli bilif long Jisas, oli stret man long fes blong hem.”—Rom 3:25, 26. *

¹⁷ Jeova i blesem Jisas, i mekem hem i laef bakegen, mo i givim haenem long hem, i bitim haenem we hem i gat bifo we hem i kamdaon long wol ya. Naoia Jisas i gat bigfala paoa long heven, i stap long wan laef we i no save kam nogud samtaem. (Hib.  1:3) Masta Jisas Kraes we i Hae Pris mo King i stap gohed blong halpem ol man blong hem blong oli soemaot klia se fasin blong God i stret. !Yumi talem tangkiu tumas long Papa blong yumi long heven, Jeova! !Hem i stap mekem i gud long olgeta we oli soemaot samting ya, mo we oli holemstrong long hem, olsem Pikinini blong hem i mekem!—Ridim Ol Sam 34:3; Hibrus 11:6.

18. ?Bambae yumi tokbaot wanem long nekis stadi?

¹⁸ Stat long taem blong Ebel, ol man we oli holemstrong long Jeova oli fren gud wetem hem. Hemia from we oli bilif mo trastem promes blong hem long saed blong Pikinini ya we bambae i kamtru. Jeova i save se Pikinini blong hem bambae i holemstrong long hem, mo se ded blong hem bambae i kavremap fulwan “sin blong olgeta man long wol.” (Jon 1:29) Be ded blong Jisas i mekem i gud long ol man we oli laef tede tu. (Rom 3:26) ?Wanem ol gudfala samting we ded blong Kraes i save mekem long yu? Hemia nao samting we bambae yumi tokbaot long nekis stadi.

?Bambae Yu Yu Ansa Olsem Wanem?

• ?Wanem samting i traem stret fasin blong God?

• ?Wanem mining blong baptaes blong Jisas?

• ?Wanem gudfala samting i kamaot long ded blong Jisas?

[Ol futnot]

[Kwestin]

[Tok blong pija long pej 10]

?Yu yu save mining blong baptaes blong Jisas?