Yu Save Yusum Gud Laef Blong Yu Taem Yu No Mared

“Man we i save holem tok ya, hem i mas holem.”—MAT. 19:12.

1, 2. (a) ?Wanem tingting blong Jisas, Pol, mo sam narafala, long saed blong fasin ya blong stap olsem nomo we oli no mared? (b) ?From wanem, maet samfala oli ting se fasin ya i no wan presen?

GOD i givim wan presen long yumi ol man, hemia mared. I tru tumas, hemia i wan long ol presen we yumi tinghae moa long olgeta. (Prov. 19:14) Nating se i olsem, plante Kristin we oli no mared, olgeta tu oli harem gud from we laef blong olgeta i gat mining. Harold i wan brata we i gat 95 yia blong hem, mo hem i neva mared. Hem i talem se: “Mi mi glad blong joen wetem ol narafala mo blong singaot olgeta oli kam long haos blong mi. Be taem mi stap mi wan, mi neva harem nogud. Ating i tru tumas se mi mi kasem presen ya we mi mi naf blong harem gud, nating se mi no mared.”

² Jisas Kraes mo aposol Pol, tufala tugeta i talem se taem man i naf blong stap olsem nomo we hem i no mared, hemia wan presen we God i givim, sem mak olsem we mared tu i wan presen. (Ridim Matiu 19:11, 12; 1 Korin 7:7.) Be i tru se plante man we oli no mared, oli no bin jusum rod ya. Samtaem, sam samting i hapen long laef blong olgeta, we i mekem i had blong oli faenem wan hasban no wan waef. Sam narafala we oli bin mared fastaem, oli sek we oli stap olgeta nomo bakegen, from we oli divos, no from we hasban no waef blong olgeta i ded. ?Ale, olsem wanem fasin ya blong stap olsem nomo we yumi no mared, i wan presen? ?Ol Kristin we oli no mared, oli save mekem wanem blong yusum gud laef blong olgeta?

 Wan Spesel Presen

3. ?Wanem ol blesing we plante taem ol Kristin we oli no mared, oli harem gud long olgeta?

³ Plante taem, wan man we i no mared i gat moa taem i bitim man we i mared, mo hem i fri moa blong mekem samting we hem i wantem. (1 Kor. 7:32-35) Hemia ol spesel blesing we oli givim janis long hem blong mekem moa long wok blong prij, go moa blong lavem ol man, mo kam klosap moa long Jehova. From samting ya, plante Kristin we oli no mared oli lanem blong tinghae long ol blesing we oli gat. Mo oli jusum blong “holem tok ya” se bambae oli no mared, nating sipos i blong sam yia nomo. Sam narafala, maet oli no mekem plan fastaem blong stap olsem nomo we oli no mared. Be sam samting long laef blong olgeta i jenis. Ale, oli prea long Jehova mo oli tingting gud long laef blong olgeta, nao oli luksave se tingting blong olgeta tu i save stap kwaet, sipos Jehova i givhan long olgeta. Taswe, oli no letem tingting blong olgeta i trabol from ol jenis ya, be oli holem tok ya se bambae oli no mared.—1 Kor. 7:37, 38.

4. ?From wanem ol Kristin we oli no mared, oli no mas harem se oli no naf blong mekem gud wok blong God?

⁴ Jehova mo ogenaesesen blong hem i luksave mo i tinghae long ol Kristin we oli no mared. Olgeta ya oli save se i no nid blong oli mared, blong Jehova mo ogenaesesen blong hem i luksave mo i tinghae long olgeta. God i lavem yumi wanwan. (Mat. 10:29-31) I no gat wan man no wan samting we i save tekemaot yumi long God ya we i lavem yumi tumas. (Rom 8: 38, 39) Nating se yumi mared no yumi no mared, i no mas gat wan samting we i mekem yumi harem se yumi no naf blong mekem gud wok blong God.

5. ?Wan Kristin we i no mared, i mas mekem wanem blong kasem olgeta blesing ya we oli save kamaot from fasin ya blong no mared?

⁵ Be yumi no bon wetem presen ya we yumi stap olsem nomo, yumi no mared. Yumi mas traehad blong lanem fasin ya, blong mekem se yumi save yusum go kasem fulmak blong hem, sem mak olsem ol man we oli gat presen ya blong plei gud long miusik mo long spot. ?Taswe, ol Kristin tede we oli no mared oli save mekem wanem blong yusum gud laef blong olgeta, nating se oli man no oli woman, oli yangfala no oli olfala, oli jusum blong no mared no oli no mared from sam samting long laef blong olgeta? Bambae yumi tokbaot sam man long Kristin kongregesen bifo, mo yumi luk wanem gudfala samting we oli save tijim yumi long hem.

Ol Yangfala We Oli No Mared

6, 7. (a) ?Ol gel blong Filip we oli no mared, oli kasem wanem blesing long wok blong God? (b) ?Timoti i mekem wanem blong yusum gud ol yia we hem i no mared? ?From we hem i glad blong mekem wok blong God long yangtaem blong hem, hem i kasem wanem blesing?

⁶ Ivanjelis ya Filip i gat fo gel blong hem we oli no mared. Olgeta oli wok strong blong talemaot gud nius, olsem papa blong olgeta. (Wok 21:8, 9) Fasin ya blong talemaot profet tok i wan long ol presen we tabu spirit i givim long ol man bifo. Mo ol yangfala woman ya oli yusum presen ya stret olsem Joel 2:28, 29 i talem.

⁷ Timoti i wan yangfala we i no mared, mo hem i yusum gud presen ya. Taem hem i smol nomo, mama blong hem Yunis, mo bubu woman blong hem Lois, tufala i tijim hem long “ol tok blong Baebol.” (2 Tim. 1:5; 3:14, 15) Be ating oli kam Kristin long fas taem nomo we Pol i kam long taon blong olgeta Listra, samwe long yia 47 K.T. Tu yia biaen, long namba tu taem we Pol i kam long ples blong olgeta, ating Timoti i gat klosap 20 yia blong hem, no maet i gat bitim 20 yia. Nating se hem i wan yangfala mo i no save trutok longtaem, ol Kristin elda long taon ya Listra mo narafala taon we i stap klosap, Ikoniam, oli talem se hem “i wan gudfala man.” (Wok 16:1, 2) Ale Pol i singaot Timoti blong i wokbaot wetem hem. (1 Tim. 1:18; 4:14) Yumi no save stret sipos Timoti i mared samtaem, no nogat. Be yumi save se taem hem i yangfala, hem i glad nomo blong folem Pol. Mo biaen, hem i harem gud blong plante yia blong stap olsem nomo we hem i no mared, mo blong mekem wok ya blong misinari mo elda.—Fil. 2:20-22.

8. ?Wanem i mekem se Jon Mak i gohed gud long wok blong God? ?Mo from samting ya, hem i kasem wanem blesing?

⁸ Jon Mak tu i yusum gud ol yia long yangtaem blong hem we hem i no mared. Hem mo mama blong hem Meri, wetem kasen brata blong hem Banabas, trifala ya i stap wetem ol fas Kristin we oli joen long kongregesen blong Jerusalem bifo. Maet famle blong Mak i rij lelebet, from we oli gat prapa haos blong olgeta long taon, mo oli gat wan haos gel. (Wok 12:12, 13) Nating se i olsem, taem Mak i yangfala, hem i no tingbaot hem wan nomo, mo hem i no mekem samting we hem nomo i wantem. Mo tu, hem i no wantem mared mo gat pikinini, blong harem gud nomo long gudfala laef wetem famle blong hem. Taem hem i yangfala, hem i joen plante wetem ol aposol, ating samting ya nao i mekem se hem i wantem kam misinari. Taswe, hem i glad nomo blong folem Pol mo  Banabas long fas misinari trip blong tufala, blong givhan long tufala. (Wok 13:5) Biaen, hem i wokbaot wetem Banabas. Mo biaen bakegen, hem i wok wetem Pita long Babilon. (Wok 15:39; 1 Pita 5:13) Yumi no save hamas yia stret we Mak i stap olsem nomo, i no mared. Be ol man oli talem se hem i wan nambawan man, from we hem i glad nomo blong givhan long ol narafala, mo hem i traehad blong kam gud moa long wok blong God.

9, 10. ?Long taem blong yumi, ol yangfala Kristin we oli no mared oli gat wanem janis blong mekem moa long wok blong God? ?Yu save tokbaot wan man we i mekem olsem?

⁹ Long taem blong yumi tu, plante yangfala long kongregesen oli glad blong yusum ol yia we oli no mared, blong mekem moa long wok blong God. Oli gat tingting olsem Mak mo Timoti. Oli luksave se taem oli no mared, oli save ‘mekem wok blong Masta, we i no gat narafala tingting i pulum olgeta.’ (1 Kor. 7:35) Hemia i wan bigfala blesing. Oli gat janis blong mekem wok blong paenia, wok long ol ples we i nidim plante moa man blong talemaot Kingdom, lanem wan narafala lanwis, givhan blong bildim ol Haos Kingdom mo branj ofis, go long Ministeriol Trening Skul, mo wok long Betel. ?Olsem wanem? ?Yu yu wan yangfala we yu no mared yet? ?Yu yu stap yusum gud ol janis ya?

¹⁰ Wan brata, nem blong hem Mark, i stat long wok blong paenia taem hem i gat klosap 20 yia. Biaen, hem i go long Ministeriol Trening Skul, mo afta, hem i mekem wok blong God long plante ples long wol. Hem i tingting bak long ol 25 yia we hem i yusum ful laef blong hem long wok blong God. Hem i talem se: “Mi mi traem blong givhan long evriwan long kongregesen. Mi prij wetem olgeta, mi go luk olgeta blong leftemap tingting blong olgeta, mi singaot olgeta oli kam kakae long haos blong mi, mo mi pulum olgeta blong oli joen wanples blong givgivhan long olgeta blong kam strong moa. Mi mi kasem bigfala glad long ol samting ya.” Ol tok ya blong Mark i soemaot se yumi glad moa long laef blong yumi taem yumi givhan long narafala. Taem yumi yusum laef blong yumi long wok blong God, yumi gat plante janis blong givhan long ol narafala. (Wok 20:35) Nomata wanem samting we ol yangfala tede oli laekem blong mekem, wanem wok we oli gat gudhan long hem, mo hamas save oli gat, be i gat plante samting yet we oli save mekem long wok blong Masta.—1 Kor. 15:58.

11. ?Wanem sam blesing we yu save kasem taem yu no hareap blong mared?

¹¹ I tru, bighaf blong ol yangfala oli wantem mared samtaem. Be i gat plante gudfala risen blong oli no hareap blong mared. Pol i pulum ol yangfala blong oli wet go kasem we oli ‘pastru long yangtaem blong olgeta,’ from we long yangtaem ya tingting blong mared i strong moa. (1 Kor. 7:36) Yu mas tekem taem blong save yu wan, mo blong yu yu gat save long saed blong laef. Yu yu nidim ol samting ya blong jusum wan gudfala hasban no waef. Promes we yu mekem taem yu mared, i wan samting we yu mas tinghevi long hem. Yu mas holem promes ya long ful laef blong yu.—Pri. 5:2-5.

Ol Olfala We Oli No Mared

12. (a) ?Wido ya Ana i mekem olsem wanem taem ol samting long laef blong hem oli jenis? (b) ?Mo hem i kasem wanem blesing?

¹² Gospel blong Luk i tokbaot Ana. Man blong hem i ded afta we tufala i mared blong seven yia nomo. Ana i mas harem nogud bigwan taem man blong hem i ded kwiktaem olsem. Yumi no save sipos tufala i gat pikinini. Mo yumi no save sipos Ana i tingbaot blong mared bakegen no nogat. Be Baebol i talem se taem hem i gat 84 yia blong hem, hem i wan wido. Folem ol tok blong Baebol, yumi kasem save se taem ol samting long laef blong Ana oli jenis nao hem i stap hem wan bakegen, hem i yusum taem blong hem blong kam klosap moa long Jehova. “Oltaem nomo, hem i stap long haos blong God, nao long moning mo long sapa, hem i stap joen long ol man blong oli mekem wosip, mo i stap livim kakae mo i stap prea.” (Luk 2:36, 37) Yes, wosip i impoten moa long hem i bitim ol narafala samting. From we hem i gat strong tingting mo i stap traehad olsem, hem i kasem bigfala blesing. Hem i gat janis blong luk Jisas taem Jisas i wan smol pikinini nomo. Mo hem i witnes tu long ol narafala se i no longtaem, bambae Mesaea i kam blong mekem ol man oli fri.—Luk 2:38.

13. (a) ?Wanem i soemaot se Dokas i mekem plante wok blong givhan long kongregesen? (b) ?Hem i kasem wanem blesing from we hem i kaen mo i mekem i gud long ol man?

¹³ I gat wan narafala woman long taem bifo, nem blong hem Dokas, no Tabita. Hem i stap long taon ya Jopa, we i klosap long solwota, long saed i go long notwes blong Jerusalem. Baebol i no tokbaot man blong Dokas. Be i luk olsem se long taem ya, hem i no mared. “Oltaem hem i stap mekem ol gudfala wok, mo i stap givhan long ol puaman.” Hem i mekem plante klos blong ol wido mo ol narafala we oli pua. Mo olgeta ya oli lavem hem tumas. Be wan dei, Dokas i sik nao wantaem nomo hem i ded. Olgeta long kongregesen  oli singaot Pita kwiktaem, mo oli plis long hem blong i mekem gudfala sista blong olgeta i laef bakegen. Taem ol man Jopa oli harem nius se Dokas i laef bakegen, plante long olgeta oli bilif. (Wok 9:36-42) Maet Dokas hem wan i bin givhan long sam long olgeta, taem hem i soemaot kaen fasin long olgeta.

14. ?From wanem ol Kristin we oli no mared, oli save kam klosap moa long Jehova?

¹⁴ Olsem Ana mo Dokas, plante brata mo sista long ol kongregesen tede oli stap olgeta nomo taem oli kam olfala. Sam long olgeta oli no faenem wan man no woman blong mared wetem. Sam narafala oli divos no oli wido. Plante taem ol Kristin we oli no mared oli dipen moa long Jehova, from we oli no gat wan man no woman blong olgeta, we oli save talemaot tingting blong olgeta long hem. (Prov. 16:3) Silvia i wan sista we i no mared, mo hem i wok long Betel bitim 38 yia finis. Silvia i luk se i wan blesing blong stap olsem nomo we i no mared. Nating se i olsem, hem i talem se: “Samtaem mi mi taed, from we plante narafala oli dipen long mi. Mi stap tingting se, ‘?Hu bae i leftemap tingting blong mi?’” Be hem i gohed se: “Mi mi trastem Jehova se hem i save moa gud bitim mi, wanem samting we mi mi nidim. Fasin ya i givhan long mi blong mi kam klosap moa long hem. Mo oltaem mi kasem tok we i leftemap tingting blong mi. Samtaem mi kasem tok ya long ol rod we mi no tingbaot nating.” Taem yumi kam klosap long Jehova, oltaem hem i ansa long yumi long fasin we i kaengud, mo i leftemap tingting blong yumi bigwan.

15. ?Plante Kristin we oli no mared, oli mekem wanem blong “go moa” blong lavem ol narafala?

¹⁵ Taem man i no mared, hem i gat spesel janis blong “go moa” blong lavem ol man. (Ridim 2 Korin 6:11-13. *) Jolene i wan sista we i no mared, mo hem i mekem wok blong Jehova fultaem blong 34 yia finis. Hem i talem se: “Mi mi stap traehad blong fren gud wetem evriwan, i no olgeta nomo we oli gat sem yia olsem mi. Taem yumi no mared, yumi gat moa janis blong mekem wok blong Jehova, mo blong givhan long famle blong yumi, ol Kristin brata sista, mo ol man raonabaot long yumi. Taem mi stap kam olfala, mi harem se mi glad moa blong stap mi wan we mi no mared.” Ol olfala, olgeta we oli stap siksik, ol mama we oli no gat man blong olgeta, ol yangfala, mo ol narafala long kongregesen, oli glad tumas long olgeta we oli no mared, we oli no tingbaot olgeta nomo, be oli givhan long ol narafala. Tru ya, taem yumi mekem samting blong soemaot se yumi lavem narafala, yumi harem gud tumas. ?Olsem wanem? ?Yu tu yu save “go moa” blong lavem ol narafala?

Olgeta We Oli No Mared Long Ful Laef Blong Olgeta

16. (a) ?From wanem Jisas i no mared long ful laef blong hem? (b) ?Pol i mekem wanem blong yusum gud ol yia we hem i no mared?

¹⁶ Jisas i no mared. God i givim wok long hem blong prij, mo hem i mas rere from wok ya. Hem i wokbaot plante mo hem i wok had, stat eli long moning go kasem let long naet. Biaen, hem i givim laef blong hem olsem wan sakrefaes. From we hem i no mared, i isi moa blong hem i mekem ol wok ya. Aposol Pol tu i wokbaot plante taosen kilometa, mo hem i kasem plante hadtaem long wok blong prij. (2 Kor. 11:23-27) Yumi no save sipos Pol i mared fastaem no nogat. Be taem hem i kasem wok blong aposol, hem i jusum blong stap olsem nomo we hem i no mared. (1 Kor. 7:7; 9:5) Jisas mo Pol, tufala i pulum ol narafala blong olgeta tu oli no mared, sipos oli naf. Olsemia nao, oli save mekem moa long wok blong prij. Nating se i olsem, tufala i no putum wan rul se olgeta we oli mekem wok blong God oli no mas mared.—1 Tim. 4:1-3.

17. ?Tede, sam oli mekem wanem blong folem eksampol blong Jisas mo Pol? ?From wanem yumi save se Jehova i glad tumas long olgeta we oli lego samting blong mekem wok blong hem?

¹⁷ Tede tu, sam oli jusum blong stap olsem nomo we oli no mared, blong bambae oli save mekem moa long wok blong God. Harold, we yumi tokbaot finis, i harem gud long wok we hem i stap mekem long Betel bitim 56 yia finis. Hem i talem se: “Long ol fas ten yia  we mi stap long Betel, mi luk plante man mo woman we oli mared, oli aot long Betel from sik, no from we oli mas lukaot long olfala papa mama blong olgeta. Be long saed blong mi, papa mama blong mi tufala i ded longtaem finis. Mi mi laekem tumas blong wok long Betel. Ale, mi mi no wantem mared, from we maet i gat sam samting i save kamaot we oli mekem se mi mas lego gudfala wok ya.” Wan sista, Margaret, we hem i mekem wok blong paenia plante yia finis, hem i talem tok we i klosap sem mak, se: “Mi mi gat plante janis blong mared, be mi bisi tumas long wok blong Jehova, mekem se mi no gat taem blong tingbaot mared. Ale, mi fri moa blong stap bisi long wok blong prij, mo hemia i givim bigfala glad long mi.” I tru, Jehova i no save fogetem man we i lego samting we hem nomo i wantem, blong mekem tru wosip.—Ridim Aesea 56:4, 5.

Yusum Gud Laef Blong Yu Nomata Se Yu Mared No Nogat

18. ?Ol narafala oli save mekem wanem blong leftemap tingting mo givhan long ol Kristin we oli no mared?

¹⁸ I stret nomo we yumi talem ol gudfala tok we oli kamaot long hat blong yumi, blong leftemap tingting blong ol Kristin we oli no mared, mo we oli stap mekem bes blong olgeta long wok blong Jehova. Yumi lavem olgeta wanwan from ol gudfala fasin blong olgeta, mo from ol bigfala wok we oli mekem blong givhan long kongregesen. Sipos yumi kam ol tru Kristin ‘brata mo sista blong olgeta, mo mama blong olgeta, mo pikinini blong olgeta,’ bambae oli no harem se oli stap olgeta nomo.—Ridim Mak 10:28-30.

19. ?Yu save mekem wanem blong yusum gud ol yia we yu no mared?

¹⁹ Yes, maet yu nomo yu jusum blong stap yu wan, no maet yu no mared from sam samting we oli hapen long laef blong yu. Nating se i olsem wanem, i gud sipos eksampol blong ol man ya long Baebol mo tede tu, oli mekem tingting blong yu i strong se yu save harem gud mo karem frut long laef blong yu. Sam presen, yumi save finis se bambae yumi kasem olgeta, be sam narafala presen, yumi sek nomo long olgeta. Sam presen, yumi laekem olgeta wantaem nomo, be sam narafala presen, yumi tinghae long olgeta afta we sam taem i pas. Taswe, blong glad long wan presen we yumi kasem, yumi mas gat stret tingting long saed blong presen ya. ?Yu save mekem wanem blong yusum gud ol yia we yu no mared? Yu save kam klosap moa long Jehova, yu save mekem plante long wok blong God, mo yu save go moa blong lavem ol narafala. Mared i save mekem se yumi harem gud. Be yumi save harem gud tu taem yumi no mared, sipos yumi gat tingting blong God long saed blong presen ya, mo sipos yumi yusum long waes fasin.

[Futnot]

?Yu Yu Tingbaot?

• ?Long wanem rod, fasin ya blong stap yu wan nomo we yu no mared, i wan presen?

• ?Wanem sam blesing we yangfala i save kasem long ol yia we hem i no mared?

• ?Ol Kristin we oli no mared oli gat wanem janis blong kam klosap moa long Jehova, mo blong go moa blong lavem ol narafala?

[Kwestin]