Kwestin Blong Olgeta We Oli Ridim Magasin Ya . . .

?Ol Witnes Blong Jehova Oli Go Luk Dokta Blong Oli Kasem Tritmen?

▪ Jisas i talem se: “Man we i no sik, hem i no nidim dokta, be man we i sik, yes, hem i nidim dokta.” (Matiu 9:12) Tok ya blong Jisas i soemaot se, yumi save go luk dokta blong yumi kasem tritmen, Baebol i no blokem yumi. Taswe ol Witnes blong Jehova oli glad blong karem meresin mo tritmen we ol dokta oli givim. Ol Witnes oli wantem gat gud helt mo longfala laef. Sam Witnes blong Jehova oli dokta, olsem Kristin man ya Luk long taem bifo.—Kolosi 4:14.

Be ol Witnes blong Jehova oli no agri long enikaen tritmen we i agensem ol rul blong Baebol. Wan eksampol: Baebol i agensem fasin ya blong kakae blad blong givhan long bodi blong yumi. Taswe, ol Witnes oli no agri se dokta i putum blad long bodi blong olgeta. (Jenesis 9:4; Levitikas 17:1-14; Ol Wok 15:28, 29) Mo tu, Baebol i agensem ol meresin mo tritmen we oli joen wetem ol “nogud paoa,” no wok blong rabis spirit.—Aesea 1:13, NW; Galesia 5:19-21.

Plante dokta oli yusum ol tritmen we oli no agensem ol rul blong Baebol. Plante taem, ol tritmen ya we ol Witnes blong Jehova oli agri long olgeta, oli wok gud moa i winim ol narafala tritmen we oli no laenap wetem tingting blong God.

I tru, taem yumi sik i gat plante tritmen we yumi save folem. Ating meresin we dokta i givim long wan man, i halpem hem. Be maet sem meresin ya i no givhan long narafala. Taswe, olgeta we oli wantem faenemaot sik blong olgeta mo tritmen we oli mas kasem, maet i gud we oli go luk wan narafala dokta bakegen we hem tu, i save givim tingting blong hem long saed blong sik blong olgeta.—Ol Proveb 14:15.

I no olgeta Witnes evriwan we bambae oli jusum sem tritmen. Baebol i letem ol Kristin oli folem tingting blong olgeta wanwan, long ol samting we Baebol i no putum loa long olgeta. (Rom 14:2-4) Taswe ol man wanwan, oli mas jekemap gud tritmen we dokta i wantem givim, mo oli mas meksua se tritmen ya i no agensem tingting blong olgeta we oli trenem folem ol save blong Baebol.—Galesia 6:5; Hibrus 5:14.

Taem wan Witnes i mas mekem desisen long saed blong wan tritmen, bambae hem i mekem olsem wan draeva i mekem, taem hem i kam klosap long wan kros rod we i bisi. Sipos draeva i folem nomo ol trak long fored blong hem, mo i spid i gotru long kros rod ya, bambae bigfala trabol i save kamaot. Wan draeva we i waes, bambae hem i ron sloslo nomo, mo bambae hem i lukluk fastaem ol trak we oli pas, bifo we hem i krosem rod ya. Long sem fasin, ol Witnes oli no hareap blong mekem desisen long saed blong wanem meresin no tritmen we bambae oli kasem. Mo oli no folem tingting blong ol narafala man. Be oli skelem fastaem ol defren tritmen we oli save kasem, mo oli tingting gud long ol rul blong Baebol.

Ol Witnes blong Jehova oli talem tangkiu from hadwok blong ol dokta mo strong tingting blong olgeta blong wantem halpem ol man. Mo tu, ol Witnes oli harem gud taem ol dokta oli save givim tritmen we i halpem sik blong olgeta.