Kwestin Blong Olgeta We Oli Ridim Magasin Ya . . .

?God i mekem Setan?

▪ Baebol i talem se God i “mekem olgeta samting.” Taswe sam man oli ting se God i mekem Setan tu. (Efesas 3:9; Revelesen 4:11) Be Baebol i soemaot klia se God i no mekem Setan.

Jehova i mekem enjel ya we biaen i kam Setan. Taswe Setan i fas man we i agensem God. ?Olsem wanem samting ya i save laenap wetem samting we Baebol i talem long saed blong Jehova, Man ya we i Mekem olgeta samting? Baebol i tokbaot Jehova se: “Fasin blong hem i gud tumas, mo hem i stret olwe nomo. Hem bambae i God blong olgeta, mo hem i tru. Oltaem, tingting blong hem bambae i stap strong long olgeta. Oltaem hem i stap mekem ol samting we i stret, mo i stap mekem sem mak nomo long olgeta man.” (Dutronome 32:3-5) Ol tok ya i givhan long yumi blong kasem save se enjel ya we i kam Setan, fastaem hem i stret gud olgeta mo hem i no gat sin. Hem i wan long ol enjel ya we God i singaot olgeta se oli pikinini blong hem. Long Jon 8:44 Jisas i tokbaot Setan se, ‘hem i no stap wetem olgeta we oli tok tru.’ Hemia i soemaot se i gat wan taem we Setan i bin tok tru, mo we hem i no gat poen.

Enjel ya we i kam Setan, hem i save jusum blong mekem fasin we i stret no fasin we i no stret, olsem ol narafala enjel long heven. Be taem hem i jusum blong agensem God mo hem i pulum fas man mo woman blong tufala i joen wetem hem, hem i mekem hem i kam Setan, we i minim “Man Blong Agens.”—Jenesis 3:1-5.

Rabis enjel ya i mekem hem i kam Devel tu, we i minim “Man Blong Giaman Blong Spolem Narafala.” Setan we i man blong giaman, i yusum wan snek blong talem ol giaman tok blong trikim Iv, nao Iv i brekem loa blong Man ya we i Mekem tufala, wan loa we i klia nomo. Taswe Jisas i singaot Setan se “stamba blong ol giaman toktok.”—Jon 8:44.

Yu traem tingbaot wan spirit man we i stret gud olgeta, i no gat slak fasin blong hem, mo i no gat ol nogud fasin raonabaot long hem. ?Olsem wanem tingting blong hem i save kam nogud? I klia se, hem i wantem tumas blong kasem wosip we i mas go long God nomo. Mo hem i tekem janis ya we hem i gat blong pulum ol man oli kam aninit long paoa blong hem, i bitim we oli obei long Jehova. Hem i no sakemaot tingting ya, be hem i gohed blong tingbaot janis ya we hem i gat blong rulum ol man, nao hem i mekem samting we hem i wantem. Buk blong Jemes i tokbaot wanem i hapen se: “Taem wan man i wantem tumas ol samting nogud, ol fasin nogud oli holem hem, oli pulum hem, nao hem i foldaon long sin. Mo taem hem i wantem tumas ol samting nogud, fasin ya bambae i kam bigwan moa long hem, nao bambae man ya i stap mekem ol samting nogud from.”—Jemes 1:14, 15; 1 Timoti 3:6.

Yumi save tekem wan eksampol: Yu traem tingbaot wan man we i lukaot long ol akaon blong wan kampani. Man ya i luksave wan rod blong stilim mane, hemia blong jenisim ol namba long ol pepa blong ol kaon. Hem i save sakemaot nogud tingting ya kwiktaem. Be hem i gohed blong tingbaot janis ya, nao tingting ya i kam bigwan moa long hem, nao hem i stilim mane. From samting ya, hem nomo i mekem hem i kam wan stilman. Sipos hem i no talemaot rabis fasin ya we hem i mekem, hem i wan man blong giaman tu. Long sem fasin, enjel ya we God i wokem, we biaen hem i kam Setan, hem i gat nogud tingting mo hem i mekem samting we tingting blong hem i wantem. Hem i yusum nogud fasin ya we hem i fri blong jusum rod blong hem, ale hem i trikim man, mo hem i agensem Papa blong hem.

Yumi glad tumas se God bambae i spolem Setan long stret taem we hem i makemaot. (Rom 16:20) Be long smol taem ya we i stap yet, ol man blong wosipim Jehova oli kasem advaes long saed blong ol trik blong Setan. Mo oli kasem paoa blong God we i save protektem olgeta long ol trik blong hem. (2 Korin 2:11; Efesas 6:11) Taswe i gud yumi ‘blokem Setan, nao bambae hem i ronwe long yumi.’—Jemes 4:7.

[Tok blong pija long pej 32]

Wan enjel we i stret gud olgeta i jusum wan rod we i agensem God, nao hem i mekem hem i kam Setan