Wan Gud Nius Blong Ol Puaman

TOK BLONG GOD i talem se: “Ol trabol man bambae oli no save trabol oltaem, God bambae i givhan long olgeta.” (Ol Sam 9:18, Nyutesteman wetem Ol Sam long Bislama) Long saed blong God, Baebol i talem se: “Yu stap givim plante kakae long olgeta, mo yu stap mekem olgeta evriwan oli harem gud.” (Ol Sam 145:16) Promes ya long Baebol i no wan drim nomo. God ya we i gat olgeta Paoa i save givim samting we ol puaman oli nidim, olsem nao bambae i no moa gat man we i pua. ?Ol puaman oli nidim wanem?

Wan woman Afrika, wok blong hem i blong raetem ol buk long saed blong ekonomi mo ol samting we oli stap hapen long wol. Hem i talem se ol kantri we oli pua, oli nidim wan “man we i rul wetem tingting ya blong mekem i gud long narafala.” Woman ya i wantem talem se sipos i gat wan man we i gat bigfala paoa mo we i kaen long ol man, nao i wantem mekem samting blong givhan long man, bambae ol man oli no moa pua. Maet yumi save talem se blong finisim fasin pua, yumi wantem wan man we i rul long fulwol. Hemia from we long fulwol, i gat sam kantri we oli gat plante samting, be sam narafala kantri oli no gat samting, ale plante man oli pua we oli pua tumas. Antap long samting ya, man ya we i rul i mas naf blong mekem sam samting blong finisim fasin ya blong man i tingbaot hem nomo, from we hemia nao stamba fasin we i mekem se plante man oli pua. ?Weples nao yumi save faenem wan stret man olsem blong rul?

God i sanem Jisas blong i talemaot gud nius long ol puaman. Taem Jisas i stanap blong ridimaot wok we God i wantem hem blong mekem, hem i talem se: “Hae God i jusumaot mi, mo paoa blong Spirit blong hem i kam fulap long mi blong mi talemaot gud nius long ol puaman.”—Luk 4:16-18.

?Gud Nius Ya Hem i Long Saed Blong Wanem?

God i jusumaot Jisas olsem King. Hemia i wan gud nius ya. Jisas i stret Man blong rul we i naf blong finisim fasin pua, from we (1) bambae hem i rul long olgeta man mo hem i gat paoa blong mekem ol samting blong givhan long ol man; (2) hem i mekem samting blong givhan long ol puaman from we hem i sore long olgeta mo hem i tijim ol man blong hem blong oli lukaotgud long ol puaman tu; mo (3) hem i save tekemaot stamba samting we i mekem se i gat fasin pua tede, hemia fasin ya blong tingbaot yumi nomo, wan fasin we yumi bon wetem. Naoia bambae yumi tokbaot ol tri haf ya long saed blong gud nius.

1. Jisas i gat paoa blong rul antap long olgeta neson Long saed blong Jisas, Tok blong God i talem se: “Oli givim paoa blong rul . . . long hem, blong olgeta man, mo olgeta neson, mo olgeta lanwis, bambae oli mekem wok blong hem.” (Daniel 7:14, NW) ?Yu yu tingbaot ol gudfala samting we oli save kamaot sipos i gat wan gavman nomo we i rul long fulwol? Bambae ol man oli no moa raorao mo faet blong traem kasem ol gudgudfala samting we oli stap long wol ya. Evri man bambae oli kasem stret samting we oli nidim. Jisas hem wan i talem se hem bambae i King ya we i rul long fulwol, mo bambae hem i gat paoa blong mekem samting. Hem i talem se: “God i givim olgeta paoa long mi, long olgeta samting long heven mo long wol.”—Matiu 28:18.

2. Jisas i sore long ol puaman Taem Jisas i stap long wol mo i stap prij, hem i mekem sam samting we i soemaot se hem i gat sore long ol puaman. Yu traem tingbaot woman ya we i pas long plante dokta finis, mo i lusum olgeta mane blong hem, be sik blong hem i no finis nating. Woman ya i tajem klos blong Jisas from we i ting se sik blong hem bambae i finis. Sik blong woman i stap long hem blong 12 yia finis, mo maet hem i no moa gat naf blad. Folem Loa we God i givim long Moses, sipos wan man i tajem woman we i sik olsem, bambae man ya i no klin. Be Jisas i kaen long woman ya. Hem i talem long woman ya se: “Dota blong mi. Bilif blong yu i mekem yu yu gud bakegen. Yu go, yu no moa wari bakegen. Sik blong yu i finis nao.”—Mak 5:25-34.

Ol tijing blong Jisas oli gat paoa blong jenisim tingting mo hat blong ol man, blong olgeta tu oli save soemaot fasin sore long ol narafala, mo oli save mekem sam samting blong givhan long olgeta. Yu traem tingbaot ansa we Jisas i givim long wan man we i wantem save olsem wanem blong mekem God i glad. Man ya i save se God i wantem we yumi lavem ol man raonabaot long yumi, be hem i askem long Jisas se: “?Be hu ol man ya we oli stap raonabaot long mi, we Loa ya i tokbaot?”

 Blong ansa long hem, Jisas i talem pijatok ya we plante man oli save long hem, long saed blong wan man we i aot long Jerusalem, i stap wokbaot i godaon long Jeriko. Nao long rod, sam stilman oli stilim olgeta samting blong hem mo oli kilim hem, mo oli livim hem i stap long rod we i “hafded,” nao oli ronwe long hem. Ale, wan pris i folem rod i kam, be taem i luk man ya, hem i pas long narasaed rod, i wokbaot i go. Wan Livaet i mekem sem mak. “Be i gat wan man Sameria tu we i stap folem rod ya, i kam kasem ples ya. Mo taem hem i luk man ya, hem i gat sore long hem.” Ale, hem i wasem ol soa blong man ya, i putum i sidaon long dongki blong hem, mo i tekem hem i go long wan hotel mo i pem man blong hotel ya blong i lukaot long man ya. Jisas i askem se: ‘?Long tingting blong yu, hu i mekem i gud long man ya we ol man blong stil oli kam kilim hem?’ Man ya i ansa se: “Man ya we i gat sore long hem.” Nao Jisas i talem se: “Yu mekem olsem we hem i mekem.”—Luk 10:25-37.

Ol man we oli kam ol Witnes blong Jehova, oli stadi long ol tijing ya blong Jisas mo oli jenisim tingting blong olgeta, nao oli halpem olgeta we oli nidim help. Yu traem tingbaot wan woman Latvia we i stap raetem ol buk. Long wan buk blong hem, Women in Soviet Prisons, hem i tokbaot taem ya we hem i stap wok long kamp blong Potma mo hem i sik. Hemia long medel blong ol yia 1960. Hem i talem se: “Long olgeta taem ya we mi sik, [ol Witnes] oli ol gudfala nes blong mi. Mi no ting se bambae i gat wan we i keagud long mi olsem. Ol Witnes blong Jehova oli luk wok ya blong halpem olgeta man olsem wan wok we oli mas mekem, nating se man i gat defren skul mo i blong defren kantri.”

Long Ancón, Ekwado, ekonomi blong kantri i godaon, mekem se sam Witnes blong Jehova oli gat trabol long saed blong mane from we oli no gat wok. Ale, ol narafala Witnes oli mekem plan blong mekem sam samting blong winim sam mane, nao oli save givhan long olgeta we oli trabol. Oli rerem ol kakae blong salem long ol man blong huk we oli stap huk long naet mo oli kambak long eli moning (lukluk pija long raetsaed). Evriwan long kongregesen mo ol pikinini tu oli wok gud tugeta. Oli stat kuk long 1 klok evri moning, olsem nao kakae i rere taem ol man blong huk ya oli kamso long 4 klok. Mane we ol Witnes ya oli kasem, oli seremaot long ol Witnes ya we oli trabol, stret long wanem we olgeta wanwan oli nidim.

Stori ya i soemaot se eksampol blong Jisas mo tijing blong hem i gat bigfala paoa blong jenisim fasin blong man, nao man i wantem halpem ol narafala we oli stap long trabol.

3. Jisas i gat paoa blong jenisim fasin we yumi bon wetem Olgeta man oli gat fasin ya blong tingbaot olgeta nomo, hemia wan samting we yumi evriwan yumi save. Baebol i kolem fasin ya se sin. Aposol Pol i raetem se: “Mi luk we i gat wan rabis fasin we oltaem i stap wok long laef blong mi. Taem mi wantem mekem ol samting we i gud, be oltaem mi stap jusumaot ol samting nomo we i nogud olgeta.” Hem i gohed i talem se: “?Hu man we bambae i save pulumaot mi long laef ya we i stap holemtaet mi, we bambae mi ded from? Mi mi talem tangkiu tumas long God, we . . . Jisas Kraes bambae i wokem samting ya.” (Rom 7:21-25) Long vas ya, Pol i soemaot olsem wanem God bambae i yusum Jisas blong sevem ol man we oli wosipim hem tru, blong oli winim fasin ya we oli bon wetem, hemia blong tingbaot olgeta nomo. Fasin ya nao i mekem se plante man oli pua tumas tede. ?Be bambae hem i mekem samting ya olsem wanem?

Samtaem afta we Jisas i baptaes, Jon Baptaes i talemaot Jisas i se: “!Olgeta! Man ya, hem i smol sipsip blong God, we hem bambae i tekemaot sin blong olgeta man long wol.” (Jon 1:29) I no longtaem wol ya bambae i fulap wetem ol man we oli fri long fasin blong sin, olsem fasin ya we man i wantem mekem i gud long hem wan nomo. (Aesea 11:9) Yes, Jisas bambae i finisim stamba blong fasin pua.

!Yumi glad tumas blong tingbaot taem ya we olgeta man bambae oli kasem samting we oli nidim! Tok blong God i talem se: “Bambae oli stap gud, mo oli gat pis olwe. Bambae oli save stap gud long ol plantesen blong grep blong olgeta, mo oli save sidaon aninit long ol figtri blong olgeta. Bambae i no moa gat man blong mekem olgeta oli fraet.” (Maeka 4:4) Vas ya i tokbaot taem ya we bambae olgeta man oli save harem gud long ol wok blong olgeta, oli sef, mo oli gat janis ya blong harem gud long wan wol we i no moa gat fasin pua. Mo olgeta man evriwan bambae oli leftemap Jehova.