Kwestin Blong Olgeta We Oli Ridim Magasin Ya . . .

?God i Tinghae Moa Long Wan Laen i Winim Ol Narawan?

▪ No, i no olsem. Baebol i talem klia se: “God i stap mekem i sem mak nomo long olgeta man. Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta.”—Ol Wok 10:34, 35.

Tingting blong God long saed ya, i hae moa long tingting blong yumi ol sinman. Plante man oli ting se prapa laen blong olgeta i gud moa i winim ol narafala laen. Tingting ya i klosap sem mak long tingting blong man ya Charles Darwin, we hem i talem se: “Long ol taem we i stap kam, . . . ol laen blong man we oli gat moa janis blong kam antap, bambae oli kilimaot ol laen we oli laef olsem ol man bus, mo bambae oli tekem ples blong olgeta.” Sore tumas, plante man we oli ting se laen blong olgeta i gud moa, oli stap spolem ol man blong ol narafala laen.

?Olsem wanem? ?Ol man blong wan laen oli gat raet blong holem tingting ya se laen blong olgeta i gud moa long ol narafala laen? ?Ol saentis oli pruvum finis se i gat sam laen, we taem man i bon long olgeta, hem i gat ol fasin finis we oli mekem se hem i gud moa long ol narafala laen? !Nogat! Wan tija long Yunivesiti blong Oxford, nem blong hem Bryan Sykes, i talem se: “I no gat wan pruf nating we i soemaot se taem man i bon, hem i gat ol fasin finis we oli mekem se laen no kala blong hem i gud moa long ol narawan. . . . Oltaem ol man oli askem long mi sipos i gat wan samting long blad blong ol man Itali we i mekem se oli defren long ol man Gris. !Ansa blong kwestin ya se nogat! . . . Yumi evriwan i famle nomo.”

Ol tok blong man ya i laenap gud wetem ol tok blong Baebol. Baebol i talem se fastaem God i mekem wan man mo wan woman, nao ol narafala man oli kamaot long tufala. (Jenesis 3:20; Ol Wok 17:26) Taswe, long tingting blong God, i gat wan laen nomo, hemia laen blong man.

Long tingting blong Jehova, i no kala blong skin no fes blong man we i impoten. Be hem i tinghae long samting we i stap long hat blong man, hemia nao samting we i impoten moa. Hem i talem se: “Ol man oli jajem narafala man from fes mo bodi blong hem. Be mi mi jajem man from samting we i stap long hat blong hem.” (1 Samuel 16:7, Contemporary English Version) Yumi no mas fogetem ol tok ya. Ol tok ya i save leftemap tingting blong yumi bigwan. ?Bambae i leftemap tingting olsem wanem?

Nomata se yumi kamaot long wanem laen, plante long yumi oli no glad long fes mo bodi blong olgeta. Be yumi no gat paoa blong jenisim samting ya. Nating se i olsem, yumi naf blong kam gud long ol samting we oli impoten moa, hemia ol tingting mo ol fasin long hat blong yumi. (Kolosi 3:9-11) Sipos tingting blong yumi i no giaman long yumi, maet bambae yumi luksave se yumi tu yumi tinghae lelebet long yumi, olsem we yumi gud moa long ol narafala laen. Sipos no, maet yumi gat tingting we i defren olgeta, hemia se yumi daon moa long ol narafala laen. Tufala tingting ya tugeta oli no stret wetem tingting blong God. Taswe, yumi mas strong blong sakemaot ol kaen tingting olsem we oli stap long hat blong yumi.—Ol Sam 139:23, 24.

Yumi mas traehad blong gat sem tingting olsem Jehova long saed blong yumi wan mo ol narafala. Sipos yumi traehad olsem, yumi save gat strong tingting se Jehova bambae i givhan long yumi. Tok blong God i talem se: “Oltaem, Hae God i stap luklukgud long olgeta samting long wol ya, blong i save givim paoa long ol man we oli ona long hem long olgeta tingting blong olgeta.” (2 Kronikel 16:9) Tok ya i stret long yumi evriwan, nomata wanem laen yumi kamaot long hem.