?Hu i Mas Tijim Pikinini Long Saed Blong God?

“Man we i stap lan, hem i no hae moa long tija blong hem. Be sipos hem i tren gogo i finisim trening blong hem, bambae hem i kam sem mak wetem tija blong hem.”—LUK 6:40.

SAM papa mama oli harem se oli no naf blong tijim pikinini blong olgeta long saed blong God. Maet oli ting se oli no skulgud mo oli no save plante samting long saed blong jos, blong oli mekem gud wok ya blong tijim pikinini. From samting ya, maet oli wantem givim impoten wok ya long wan famle no wan lida blong jos.

?Hu nao i stret blong tijim pikinini long ol tijing blong jos, mo ol stret rul long saed blong klin fasin? Bambae yumi tokbaot wanem we Baebol i talem long saed ya, mo yumi skelem wetem wanem we ol man blong lukaot save oli faenemaot.

?Wanem Wok Blong Papa?

Baebol i tijim se: ‘Ol papa. Bambae yufala i no mas mekem ol samting long ol pikinini blong yufala we i save mekem olgeta oli kros. Yufala i mas lukaot gud long olgeta. Yufala i mas stretem olgeta, mo yufala i mas tijim olgeta, olsem we Masta blong yumi i stap stretem yumi, i stap tijim yumi.’—Efesas 6:4.

Ol man blong lukaot save oli faenemaot se: ?Sipos ol papa oli bilif strong long ol tijing blong jos, samting ya i save givhan long olgeta olsem wanem? Long yia 2009, olgeta blong Ball State Yunivesiti oli printim save we oli faenemaot long saed ya, oli talem se: “Ol man oli save kam ol gudfala papa sipos oli joen long wan jos. Ol jos oli talemaot fasin no rul we man i mas folem, mo ol tijing  mo ol advaes blong lidim man long laef blong hem” (Fathers’ Religious Involvement and Early Childhood Behavior).

Baebol i soemaot se i impoten tumas we papa i tijim mo trenem pikinini. (Ol Proveb 4:1; Kolosi 3:21, NW; Hibru 12:9) ?Olsem wanem? ?Advaes ya i stret yet tede? Long yia 2009, Yunivesiti blong Florida i printim haf ya we i tokbaot olsem wanem ol papa oli save gat paoa long pikinini blong olgeta. Ol man blong lukaot save oli faenemaot se pikinini we papa blong hem i spenem plante taem wetem hem, hem i sore moa long ol narafala mo hem i gat gudfala tingting long saed blong hem wan. Fasin ya i mekem se ol boe oli no stronghed tumas, mo ol gel oli no gat problem long tingting blong olgeta. Yes, advaes blong Baebol i stret yet tede.

?Wok Blong Mama i Impoten Olsem Wanem?

Baebol i tijim se: “Yu mas lesin gud long ol samting we . . . mama blong yu, . . . i stap tijim yu long hem, mo yu no mas lego ol samting ya.”—Ol Proveb 1:8.

Ol man blong lukaot save oli faenemaot se: Long yia 2006, buk ya Handbook of Child Psychology i talem se ol mama oli yusum plante moa taem blong olgeta blong toktok mo mekem narafala samting wetem wanwan pikinini, i bitim ol papa. Samting ya i tru long plante kantri. From we mama i spenem plante taem olsem wetem pikinini, toktok, aksen mo tingting blong hem i gat bigfala paoa long pikinini taem hem i stap gruap.

Taem papa mo mama i wok wanples blong tijim trutok long saed blong God long pikinini blong tufala, tufala i givim tu gudfala presen long hem. Fas samting se bambae pikinini i gat janis blong fren wetem papa blong hem long heven, mo fasin fren ya i save givhan long hem long laef blong hem. Namba tu samting se bambae hem i lanem long eksampol blong papa mama se hasban mo waef tufala i mas wok wanples blong kasem ol impoten mak. (Kolosi 3:18-20) I tru se ol narafala oli save givhan long papa mama blong tijim pikinini. Be, i wok blong papa mama blong tijim pikinini long saed blong God mo long saed blong wok we God i wantem se wanwan long famle i mekem.

?Be papa mama i mas tijim pikinini olsem wanem? ?Wanem ol rod we i beswan blong tijim pikinini?