!Kruked Fasin Bambae i Finis!

“Yu mas putum tingting blong yu i stap strong long Hae God, mo yu mas obei long ol tok blong hem. . . . Bambae yu luk we hem i ronemaot ol man nogud.”—OL SAM 37:34.

PLANTE man oli fraet se kruked fasin bambae i neva finis samtaem. ?Olsem wanem? ?Yu tu yu fraet? Sipos yes, i no rong blong fraet olsem. Blong plante yia, ol man oli traem plante defren kaen gavman. Nating se i olsem, oli no save finisim fulwan kruked fasin. ?Olsem wanem? ?I gat wan taem we bambae olgeta man oli mekem i stret long ol narafala?

Baebol i talem se yes, i no longtaem, God bambae i finisim kruked fasin long wol ya. ?Bambae hem i mekem samting ya olsem wanem? Bambae hem i yusum Kingdom blong hem we i stap long heven blong mekem bigfala jenis long wol. Hemia semfala Kingdom we Jisas i tijim ol man blong hem blong oli prea from. Long prea ya, we samtaem ol man oli kolem se Lodsprea, Jisas i talem se: “Letem Kingdom blong yu i kam. Letem samting we yu yu wantem i kamaot long wol, olsem i kamaot finis long heven.”—Matiu 6:10, King James Version.

Baebol i tokbaot Jisas Kraes, we bambae i rul long Kingdom ya, i se: “Hem bambae i stap sevem ol puaman we oli stap singaot i go long hem, mo bambae i stap givhan long olgeta we oli sot long ol samting, mo i no gat man blong lukaot long olgeta. Hem bambae i gat sore long ol puaman, mo long olgeta we oli no strong, mo i stap sevem laef blong olgeta we oli sot long ol samting. Olgeta we oli stap harem nogud aninit long han blong narafala man, hem bambae i tekemaot olgeta, i sevem olgeta.” (Ol Sam 72:12-14) I gud blong makem se Jisas i sore long ol man we oli safa from kruked fasin. !Mo hem bambae i mekem samting blong tekemaot fasin ya! !Hemia wan gudfala nius ya!

Rula ya we i gat sore long man mo i gat paoa, i rul long Kingdom blong God. Kingdom ya bambae i tekemaot kruked fasin long wol ya. ?Bambae hem i mekem olsem wanem? Hemia taem hem i finisim tri samting ya we oli stap pulum ol man blong mekem samting we i no stret.

Sin

Tede, yumi evriwan i mas faet strong agensem sin we i stap long yumi, we i stap pulum yumi blong tingbaot yumi nomo. (Rom 7:21-23) Be i gat sam gudfala man we oli wantem mekem samting we i stret. Oli bilif long sakrefaes blong Jisas, nao God i fogivim ol sin blong olgeta. * (1 Jon 1:7, 9) Ol man ya oli gat janis blong kasem wan gudfala samting we i kamaot from lav blong God. Yumi ridim long Jon 3:16 se: “God i lavem tumas ol man long wol, nao hem i givim mi, mi  stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.”

God bambae i mekem wan nambawan samting blong givhan long ol man we oli holemstrong long hem. Long niufala wol, bambae hem i tekemaot olgeta samting we i kamaot from sin, mo sloslo hem i mekem ol man oli kam stret gud olgeta, nao God i save glad long olgeta. (Aesea 26:9; 2 Pita 3:13) Bambae sin i no moa pulum man bakegen blong mekem kruked fasin. Aninit long rul blong Kingdom blong God, ol man we oli holemstrong long God bambae oli no moa harem nogud from kruked fasin.

Wol we yumi laef long hem

Sore tumas, plante man tede oli minim nomo blong mekem i no stret long ol narafala. Oli wantem bos long ol puaman, mo oli pulum ol narafala blong olgeta tu oli mekem kruked fasin. Baebol i givim woning long ol man olsem, i se: “Yufala we i stap mekem ol fasin nogud, yufala i mas lego ol fasin ya. Yufala i mas livim ol rabis tingting blong yufala.” Sipos ol man we oli stap mekem kruked fasin oli tanem tingting blong olgeta, Baebol i promes se God bambae “i kwik blong fogivim” olgeta.—Aesea 55:7.

Be taem ol man oli no wantem jenisim fasin blong olgeta, bambae God i mas spolem olgeta. Kingdom blong God bambae i mekem promes blong God i kamtru se: “Yu mas putum tingting blong yu i stap strong long Hae God, mo yu mas obei long ol tok blong hem. . . . Bambae yu luk we hem i ronemaot ol man nogud.” (Ol Sam 37:34) Taem ol rabis man oli lus, ol man blong God bambae oli no moa harem nogud from kruked fasin.

Setan

Stamba blong ol kruked fasin, hemia Setan. Yumi talem tangkiu long Jehova * from we i no longtaem, bambae hem i blokem Setan blong i no moa pulum ol man. Mo biaen, God bambae i spolem Setan blong olwe. Bambae Setan i no moa save pulum ol man blong oli mekem kruked fasin.

Tru ya, tingting ya se God bambae i finisim ol samting we oli kamaot from kruked fasin, i no wan drim nomo. Be maet yu stap tingting se: ‘?God i gat paoa blong mekem ol jenis ya? Sipos i olsem, ?from wanem hem i no mekem samting ya fastaem finis?’ Baebol i givim gudfala ansa long ol kwestin ya. * I gud yu faenemaot samting we Baebol i tijim long saed blong taem ya we kruked fasin bambae i finis.

[Ol futnot]