Kwestin 1: ?Mi Mi Laef Blong Mekem Wanem?

ROSALIND i gruap long Inglan. Taem hem i yangfala, hem i wantem kasem save long evri samting. Mo hem i wantem halpem ol man tu. Taem hem i finis long skul, hem i mekem wan wok we ol man oli tinghae long hem. Hem i halpem ol man we oli no gat haos, mo olgeta we oli gat wan problem long bodi no tingting blong olgeta. Nating se hem i harem gud long wok ya mo hem i gat mane, be hem i talem se: “Taem ol yia oli stap pas, oltaem mi askem se, ‘?From wanem yumi stap long wol ya?’ mo ‘?Yumi laef blong mekem wanem?’”

?From wanem i stret blong askem kwestin ya? Ol man oli naf blong tingting gud mo kasem save long samting. Oli defren long ol anamol. Taem ol samting oli hapen long laef blong yumi, yumi lanem samting from. Yumi save mekem plan se bambae yumi mekem wanem long fiuja. Mo yumi traem faenemaot se yumi stap laef blong mekem wanem.

?Wanem ansa blong samfala? Sam man oli ting se oli laef blong kam rijman no blong kasem haenem, nao samting ya bambae i mekem olgeta oli glad.

?Wanem tingting i pusum ol man ya blong ansa olsem? Oli ting se yumi wanwan, yumi mas jusum samting we yumi ting se i impoten long laef. Long tingting blong olgeta, samting we yumi wantem i moa impoten i winim samting we God i wantem.

?Baebol i talem wanem? King Solomon i rij we i rij, mo hem i mekem evri samting we hem i save mekem blong harem gud. Be hem i luk se ol samting ya oli no mekem se hem i glad long laef blong hem. Hem i talem samting we i save mekem man i harem se laef blong hem i impoten, i se: “Yu mas tinghevi long God, yu mas ona long hem, mo yu mas obei long ol tok  blong hem, from we hemia nao samting we hem i mekem yumi from.” (Prija 12:13) ?Yumi mas mekem wanem blong obei long ol tok blong God?

Wan risen blong God i givim laef long yumi, i blong yumi harem gud long laef. Solomon i talem se: “I moa gud yumi gohed nomo, yumi stap kakae, yumi stap dring mo yumi stap glad long ol samting ya we yumi stap kasem. Hemia nomo i gudfala rod blong man i folem. Be mi save tu se ol samting ya, God nomo i givim.”—Prija 2:24.

God i wantem tu se yumi lavem famle blong yumi mo yumi lukaot gud long olgeta. Hem i givim advaes long olgeta evriwan long famle, i se:

“Man i mas lavem woman blong hem, i mas lukaot gud long hem, olsem we i stap lukaot gud long bodi blong hem nomo.”—Efesas 5:28.

“Woman i mas ona gud long man blong hem.”—Efesas 5:33.

“Ol pikinini. Yufala i mas obei long papa mo mama blong yufala.”—Efesas 6:1.

Sipos yumi folem ol tok ya blong Baebol, yumi save kasem glad mo yumi harem gud. Be samting we i moa impoten, se yumi mas kasem save gud long God, mo yumi mas kam wan fren blong hem. Baebol i talem se yumi mas kam “klosap long God.” Nao hem i mekem promes ya se: ‘Hem bambae i kam stap klosap long yumi.’ (Jemes 4:8) Sipos yu yu mekem olsem, bambae yu harem se yu laef from wan impoten risen.

Sipos yu wantem save samting we yu mas mekem blong God i glad long yu, yu save ridim japta 12 blong buk ya ?Wanem Samting We Baebol i Rili Tijim? www.dan124.com

[Bokis blong pija long pej 5]

?Jisas i Talem Wanem?

Jisas i save gud se hem i laef blong mekem wanem. Hem i talem se: “Mi mi bon, mi kam long wol ya blong wan samting nomo, blong mi talemaot ol tok we i tru.” (Jon 18:37) Jisas i yusum laef blong hem blong tijim ol man, nao oli kasem save long God mo long stamba tingting blong hem.

Sipos yumi folem eksampol blong Jisas, bambae yumi harem se yumi laef from wan impoten risen. Jisas i talem se yumi mas lukluk fasin blong hem mo lanem samting from. (Matiu 11:29) Hemia tufala rod blong mekem olsem:

Jisas i talem se sipos yumi wantem harem gud, yumi mas harem tok blong God mo obei long hem. (Luk 11:28) Taswe, yumi mas ‘save God we hem nomo i tru, mo yumi mas save Jisas Kraes, we God i sanem hem i kam.’—Jon 17:3.

Jisas i talem long ol man blong hem se oli mas tijim ol narafala. Hem i talem se: “Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Spirit. Mo yufala i mas tijim olgeta blong oli folem olgeta tok ya we mi mi givim finis long yufala.”—Matiu 28:19, 20.

Taem man i stadi Baebol mo i folem ol samting we hem i lanem, laef blong hem i jenis bigwan. Mo taem hem i stat blong givhan long ol narafala blong oli kasem save long God, hem i luksave se hem i stap laef from wan impoten risen.