?Olsem wanem? ?Ded i gat moa paoa i winim God? !Nogat! ‘God i gat olgeta paoa.’ Ded mo ol narafala “enemi” tu oli no save winim hem. (1 Korin 15:26; Eksodas 6:3) God i gat paoa blong winim ded. Hem i promes blong mekem ol dedman oli laef bakegen, mo bambae hem i mekem olsem long niufala wol. * ?Yumi save trastem promes ya? Yes. Jisas i talem ol tok we i mekem tingting blong yumi i strong.—Ridim Matiu 22:31, 32.

Jisas i talem long ol Sadusi we oli no bilif long laef bakegen, se: “Long fasin ya we man i laef bakegen, long Baebol God i talem long yufala se, ‘Mi mi God blong Ebraham, mo mi God blong Aesak, mo mi God blong Jekob.’ ?Ating yufala i no ridim tok ya samtaem? God ya i God blong man we i laef, hem i no God blong man we i ded.” Jisas i stap tokbaot taem ya we God i toktok long Moses long faea we i laet olbaot long wan smol tri. Hemia samwe long yia 1514 bifo Kraes. (Eksodas 3:1-6) Taem Jisas i talemaot bakegen tok ya blong Jehova se, “Mi mi God blong Ebraham, mo mi God blong Aesak, mo mi God blong Jekob,” hemia i soemaot se promes ya blong laef bakegen bambae i mas kamtru. ?Tok ya i soemaot samting ya olsem wanem?

Yu traem tingbaot taem ya we Jehova i toktok long Moses. Ebraham i ded 329 yia finis, Aesak i ded 224 yia finis, mo Jekob i ded 197 yia finis. Nating se i olsem, Jehova i talem se: ‘Mi mi God blong olgeta.’ Hem i no talem se: ‘Bifo, mi mi God blong olgeta.’ Jehova i toktok olsem we trifala i laef i stap yet. ?From wanem?

Jisas i talem se: “God ya [Jehova] i God blong man we i laef, hem i no God blong man we i ded.” Yu traem tingting dip long ol tok ya. Sipos man i no save laef bakegen, hemia i min se Ebraham, mo Aesak, mo Jekob, trifala bambae oli ded blong olwe. Sipos i olsem, Jehova i no God blong man we i laef, be hem i God blong ol dedman nomo, mo ded i gat moa paoa i winim hem. Bambae i olsem we hem i no naf blong mekem ol gudfala man blong hem oli laef bakegen.

Ale, ?olsem wanem long Ebraham, mo Aesak, mo Jekob, mo ol narafala man blong Jehova we oli ded finis? Jisas i talem se Jehova i stap luk olgeta se “oli no ded, oli stap laef.” (Luk 20:38) Tru ya, tingting we Jehova i gat blong mekem ol gudfala man blong hem oli laef bakegen, bambae i kamtru. Taswe, hem i save tingbaot olgeta olsem we oli laef i stap. (Rom 4:16, 17) Jehova i no save fogetem ol gudfala man blong hem. Bambae hem i gohed blong tingbaot olgeta, gogo, long stret taem blong hem, bambae hem i mekem olgeta oli laef bakegen.

?Olsem wanem? ?Yu yu glad blong tingbaot se wan dei, bambae yu joen bakegen wetem ol fren mo famle blong yu we oli ded? Sipos yes, yu no mas fogetem se Jehova i gat olgeta paoa, mo hem i naf blong winim ded. I no gat wan samting i save blokem hem blong i no mekem ol dedman oli laef bakegen, olsem we hem i promes finis. I gud yu traem save moa long promes ya blong laef bakegen, mo long God ya we bambae i mekem promes ya i kamtru. Hemia i save mekem se bambae yu kam klosap long Jehova, ‘God ya blong man we i laef.’