Linda i divos long fas man blong hem. Mo taem hem wetem Herman tufala i faenem tufala, tufala i glad tumas. Nating se i olsem, tufala i save se long mared blong tufala, maet bambae tufala fesem sam trabol we tufala i no fesem long fas mared blong tufala. *

Sipos yu yu mared bakegen, ?wanem tingting bambae yu gat long niufala man no woman blong yu? Wan woman nem blong hem Tifani i divos long man blong hem, mo tri yia afta hem i mared bakegen. Hem i talem se: “Fas taem we yu mared, ating yu tingbaot se mared blong yu bambae i stap olwe. Be taem yu mared bakegen, yu no moa gat tingting olsem, from we oltaem bambae yu tingbaot se fas mared blong yu i brok.”

Nating se i olsem, plante man mo woman we oli mared bakegen, oli glad long mared blong olgeta. Oli mekem mared blong olgeta i stap gud, mo yu tu, yu save mekem we yu glad long mared blong yu. ?Yu save mekem samting ya olsem wanem? Yumi save tingbaot tri problem we  oli save kamaot, mo olsem wanem ol advaes blong Baebol oli save givhan long yumi blong winim ol problem ya. *

Ellen, wan woman we i laef long Saot Afrika i talem se: “I had long mi blong fogetem fas man blong mi. Antap moa sipos mi wetem niufala man blong mi, mitufala i go long sem ples we mi mo fas man blong mi i stap go long hem oltaem blong spel. From samting ya, plante taem mi stap skelem fasin blong niufala man blong mi wetem fas man blong mi.” Be yu save kam kros tu, sipos niufala man no woman blong yu i tokbaot oltaem fas man mo woman blong hem long yu.

ADVAES: Yu mas agri se i had blong fogetem fas man no woman blong yu, antap moa sipos yufala i mared longtaem. !Samtaem samfala oli mestem nao oli singaot man blong olgeta long nem blong fas man blong olgeta! ?Sipos samting olsem i hapen long yu, bambae yu mekem wanem? Baebol i givim advaes ya se: “Yu traem blong kasem save long tingting blong narafala.”—1 Pita 3:8, New Century Version.

Yu no mas jalus nao yu blokem man no woman blong yu blong hem i no tokbaot fas man mo woman blong hem. Sipos hem i wantem tokbaot laef blong hem wetem fas man no woman blong hem long yu, i gud we yu lesin gud long hem mo yu soemaot se yu kasem save long filing blong hem. Mo tu, yu no mas kwik blong ting se hem i stap skelem yu wetem fas man no woman blong hem. Ian we i mared bakegen blong ten yia finis i talem se: “Woman blong mi Katlin i no ting se i tabu blong mi tokbaot fas woman blong mi long hem. Defren olgeta, hem i tingbaot storian blong mi olsem wan rod blong savegud ol fasin blong mi naoia.” Sipos yu mekem olsem, bambae yu luk se yu wetem niufala man no woman blong yu, yutufala i fren gud moa.

Yu mas putum tingting blong yu long niufala man no woman blong yu nomo, mo yu mas tingbaot ol gudfala fasin blong hem. I tru, maet fasin blong niufala man no woman blong yu i defren long faswan. Be ating hem i gat sam gudfala fasin. From samting ya, i moa gud yu mekem mared blong yu i stap strong. Be yu mekem olsem from we yu lavem hem mo yu glad long ol fasin blong hem, ‘i no from fasin blong narafala.’ (Galesia 6:4) Edmond we i mared tu taem finis i talem se: “Sipos yu gat tu fren, fasin blong yu blong fren gud wetem tufala, bambae i no sem mak. Long sem fasin, sipos yu mared bakegen, mared blong yu bambae i no sem mak long faswan.”

?Yu save mekem wanem blong yu gat gudfala tingting long fas mared blong yu wetem hemia blong naoia? Jared i talem se: “Wan taem mi talem long woman blong mi se fas mared blong mi i olsem wan naesfala buk we mi mo fas woman blong mi, mitufala i raetem. Sam samtaem, mi openem buk ya mo mi ridim, blong tingtingbak long ol gudfala taem we mi bin gat. Be naoia mi mi no laef long buk ya. Mi harem gud blong stap wetem niufala woman blong mi, i olsem we mitufala i raetem wan narafala buk we i blong mitufala nomo, mo mi mi glad tumas long niufala buk ya.”

Jason i divos long woman blong hem, mo sikis yia afta, hem i mared bakegen. Hem i talem se: “Smoltaem afta we mitufala i mared, woman blong mi i harem olsem se sam long ol fren blong mi oli stap skelem ol fasin blong hem.” Leo i fesem wan samting we i defren. Hem i talem se: “Sam man oli talem long woman blong mi se oli lavem fas man blong hem, mo oli tingbaot hem tumas. !Oli talem samting ya stret long fes blong mi!”

ADVAES: Yu traem putum yu long ples blong ol fren blong yu. Ian we yumi tokbaot hem finis i talem se: “Maet ol fren blong yu oli save gud yu mo woman blong yu. Be sipos yu mared bakegen, bambae oli harem se i had blong oli joen gud wetem yu.” Taswe, ‘yu mas wan man we i save fren gud long ol man, mo oltaem yu mas mekem i gud long ol man.’ (Taetas 3:2) Yu mas letem plante taem i pas, blong ol fren mo famle blong yu oli jenisim tingting blong olgeta. I gud yu tingbaot se naoia we yu mared bakegen, fasin blong yu blong fren wetem narafala tu bambae i jenis. Jason we yumi jes tokbaot hem i talem se taem ol yia oli stap pas, hem mo woman blong hem, tufala i stat blong fren gud bakegen wetem ol fren blong tufala blong bifo. Hem i gohed i talem se: “Be mitufala i traehad blong faenem sam niufala fren blong mitufala, mo hemia i givhan bigwan long mitufala.”

Taem yu spenem taem wetem ol fren blong yu blong bifo, i gud yu traem tingbaot se man no woman blong yu bambae i harem olsem wanem. Wan eksampol, sipos  yufala i stap storian wetem ol fren blong yu, nao yufala i tokbaot fas man no woman blong yu, i gud yu yusum ol tok we i mekem niufala man no woman blong yu i harem se yu no tekem saed blong olgeta. Long Ol Proveb 12:18 i talem se: “Ol tok nogud we man i sakem we i no tingbaot i save mekem narafala man i harem nogud, olsem we naef blong faet i stikim hem, be tok we i waes i save mekem man i harem gud bakegen.”

Andru we woman blong hem i lego hem, i mared bakegen wetem wan narafala woman, nem blong hem Rina. Hem i talem se: “Mi mi fraet se Rina bambae i giaman long mi bakegen. Oltaem mi mi stap wari se, ?fasin blong mi i sem mak long fasin blong fas man blong Rina? Mi mi fraet se bambae hem i lego mi, nao hem i go stap wetem wan narafala man from we fasin blong mi i nogud.”

ADVAES: Yu mas talemaot tingting blong yu long man no woman blong yu. Baebol i talem se: “Man we i stap holem ol gudfala advaes we ol man oli givim long hem, bambae laef blong hem i save gohed gud.” (Ol Proveb 15:22) Hemia nao samting we Andru mo Rina, tufala i mekem. Tufala i toktok gud tugeta, nao tufala i trastem tufala moa. Andru i talem se: “Mi mi talem long Rina se mi no tingbaot divos olsem wan isi rod blong winim ol problem. Mo Rina tu i gat sem tingting olsem mi. From samting ya, mi mi trastem hem fulwan.”

Sipos man no woman blong yu i harem nogud from we narafala i giaman long hem, yu mas mekem evri samting we yu naf blong mekem blong hem i trastem yu. Yu traem tingbaot Michel mo Sabrina we tufala i divos long fas man no woman blong tufala. Tufala i mekem wan promes se sipos wan long tufala i toktok wetem fas man no woman blong hem, hem i mas kam talemaot. Sabrina i talem se: “Promes ya i mekem mitufala i harem se mitufala i glad mo tingting blong mitufala i no trabol.”—Efesas 4:25.

Plante man mo woman we oli mared bakegen oli glad long mared blong olgeta, mo yu tu yu save mekem olsem. Taem yu skelem fas mared blong yu wetem hemia blong naoia, ating yu luksave moa ol fasin blong yu. Andru we yumi tokbaot hem finis i talem se: “Taem mi mared long Rina, mi mi glad tumas. Afta totin yia we mitufala i mared, mitufala i fren gud moa. Mitufala i wantem fren gud olsem blong olwe.”