Yumi evriwan i stap tingbaot fiuja. Yumi tingbaot se laef blong yumi mo famle blong yumi bambae i olsem wanem. Ating yumi wanwan i stap tingbaot se: ‘?Ol pikinini blong mi, bambae oli gat wan gudfala laef long fiuja? ?Wol ya bambae i lus long wan bigfala disasta? ?Mi mas mekem wanem naoia blong mi gat wan gudfala fiuja?’ Yumi olsem nao, yumi wantem save se fiuja blong yumi bambae i olsem wanem. Sipos yumi save samting we bambae i kamtru long fiuja, bambae yumi no fraet be yumi rere from.

Taswe, ?wanem fiuja blong yu? ?I gat wan man we i save talemaot? Ol man blong hae save oli talemaot plante samting we oli no kamtru. Be Baebol i talem se God nomo i save talemaot ol samting we bambae oli kamtru. Hem i talem se: ‘Long stat blong olgeta samting, God i talemaot fastaem ol samting we biaen oli hapen. Bifo finis, hem i talemaot ol samting we biaen oli kamtru.’ (Aesea 46:10) Yumi glad tumas se God i save mekem olsem.

?Yu yu wantem save sipos ol profet tok blong God bifo oli kamtru? Sipos yes, ?from wanem? Yu traem tingbaot. Sipos yu luk se longtaem finis olgeta long meteo oli talemaot stret weta we i stap kamaot evri dei, ating yu yu glad tumas. Mo bambae yu lesin gud se weta blong tumora i olsem wanem. Long sem fasin, sipos yu lanem se longtaem finis God i talemaot ol samting we biaen oli kamtru, ating bambae yu lesin gud long God blong save se fiuja blong yu bambae i olsem wanem.

WAN BIGFALA TAON I LUS:

Sipos yu harem se i no longtaem bambae wan bigfala taon we i gat paoa long ol man blong plante yia i lus, ating bambae yu sapraes bigwan. Hemia nao samting we wan man blong God i talemaot, se bigfala taon ya Nineve bambae i lus. (Sefanaea 2:13-15) ?Ol man blong histri oli talem wanem? Long ol yia 600 B.K.T., * samwe 15 yia afta we God i talemaot profet tok ya, ol man Babilon mo ol man Midia  oli kam faet agensem ol man Nineve mo oli spolem gud taon ya. Antap long samting ya, God i talem fastaem se Nineve bambae i “kam nogud olgeta, we bambae i no moa gat man i stap long hem, mo bambae i kam wan draeples we i no gat wota long hem.” ?Olsem wanem? ?Tok ya i kamtru? Yes. Ol man Babilon mo Midia oli no tingbaot nating blong holem taon ya, mo ol eria raonabaot long hem we oli bigwan olsem 518 skwea Kilometa. Be oli spolem gud taon ya. ?Olsem wanem? ?Ol man we oli stadi long politik oli naf blong talemaot ol samting olsem, we biaen oli kamtru?

BUN BLONG MAN BAMBAE I BON:

Yu traem tingbaot se wan man i talemaot long yu 300 yia bifo, nem blong man we bambae i bonem bun blong ol man long olta, i talemaot stret laen we man ya bambae i kamaot long hem, mo i talem stret nem blong taon we olta ya i stap long hem. Taem yu luk se tok blong man ya i kamtru, ating bambae yu tinghae long man ya we i talemaot tok ya. Wan profet blong God i talemaot se: ‘Bambae i gat wan pikinini i bon we nem blong hem Josaea. Hem bambae i wan long olgeta we bambae oli kamaot biaen long King Deved ya bifo, mo hem bambae i bonem ol bun blong man’ antap long wan olta long taon ya Betel. (1 King 13:1, 2) Samwe 300 yia biaen, wan king i kamaot long laen blong Deved, nem blong hem Josaea. Hem nao i fas man we i karem nem ya Josaea. Hem i mekem evri samting we profet tok ya i talem. Hem i talem long ol man blong hem blong oli ‘tekemaot ol bun long ol hol, oli karem i kam, mo oli bonem olgeta long olta ya’ we i stap long Betel. (2 King 23:14-16) ?Yu ting se wan man olbaot i naf blong talemaot evri smosmol samting, we biaen oli kamtru? Nogat. Wan man we hae moa long ol man, hem nomo i naf blong talemaot ol save olsem long man.

BABILON I FOLDAON:

Yu traem tingbaot se wan man i talemaot nem blong wan narafala man we i no bon yet, se bambae hem i winim wan bigfala wol paoa, mo hem i talem rod we man ya bambae i folem blong winim wol paoa ya. Ating bambae yu yu sapraes bigwan taem yu luk profet tok ya i kamtru. God i talemaot se wan man we nem blong hem Sirus, bambae i lidim ol ami oli go faet agensem ol man long taon ya Babilon. Man ya bambae i mekem ol man Isrel oli go fri, mo bambae hem i givhan long olgeta blong oli bildim bakegen haos tempol blong olgeta. Antap long hemia, God i talemaot plan we bambae oli folem blong go mekem faet ya. Hem i talem se bambae oli mekem reva i kam drae, mo  hem i talem tu se ol doa blong bigfala taon ya bambae oli open. Hemia bambae i givhan long olgeta blong oli winim taon ya. (Aesea 44:27–45:2) ?Olsem wanem? ?Evri smosmol samting we profet tok ya i tokbaot oli kamtru? Ol man blong stadi long histri oli agri se Sirus nao i winim bigfala taon ya. Ol ami blong Sirus oli wok had blong blokem reva we i pastru long taon ya, mo oli jenisim rod blong hem. Nao wota blong reva ya i godaon. Biaen oli go insaed long taon ya from ol bigfala doa blong hem oli open i stap. Sirus i mekem we ol man Isrel oli go fri, mo i talem long olgeta se oli mas gobak long Jerusalem blong bildim bakegen haos tempol. Yumi sapraes long samting ya, from we Sirus i no wosipim God blong ol man Isrel. (Esra 1:1-3) ?I gat wan man we i naf blong tokbaot evri smosmol samting olsem, we biaen oli kamtru? !Nogat! God nomo i naf blong mekem olsem.

Yumi luk tri eksampol nomo we oli soemaot se God i naf blong talemaot ol samting we bambae oli kamtru long fiuja. Be i no long ol taem ya nomo we hem i mekem samting ya. Plante long yumi oli save tok we Josua i talem long ol man Isrel se: “Yufala evriwan i savegud long tingting blong yufala we Hae God ya i givim ol gudgudfala samting ya long yumi, stret olsem we hem i promes bifo finis. Olgeta promes ya blong hem, hem i mekem oli kamtru evriwan, i no gat wan promes nating i stap we i no kamtru.” (Josua 23:1, 2, 14) Ol man blong Josua oli luksave klia se olgeta promes mo olgeta profet tok we God i bin talemaot finis oli kamtru evriwan. ?Be God i mekem samting ya olsem wanem? Yumi luksave se ol promes blong God oli defren olgeta long ol promes blong man. I impoten we yumi save samting ya, from we God i talemaot plante samting we bambae oli kamtru long fiuja, mo oli save gat paoa long laef blong yumi.

Samting we ol man oli talemaot se bambae i kamtru, i stanap nomo long save blong ol saentis, ol man blong talemaot fiuja, mo long ol samting we oli stap hapen tede. Afta we oli talemaot ol samting we oli ting se bambae i kamtru, oli no moa kea, oli wet nomo blong luk se wanem bambae i hapen.—Ol Proveb 27:1.

God i defren long ol man, hem i save evri samting. Hem i save gud olgeta samting raonabaot long yumi mo hem i save gud ol samting we yumi wantem. Taswe taem hem i jusum blong mekem wan samting, hem i save talemaot samting we bambae i kasem ol man wanwan mo wan ful neson. Be i no hemia nomo. Hem i save kontrolem ol samting mo i jenisim olgeta, blong hem i save mekem samting we hem i talem i kamtru. God i talem se: “Tok blong mi . . . bambae hem i mekem evri samting we mi mi sanem hem blong i mekem.” (Aesea 55:11) Sam long ol profet tok ya we God i talem bambae oli kamtru nomo long fiuja. Hem i wok strong blong mekem ol samting we hem i talem oli kamtru.

?Wan man i talem long yu finis se fiuja blong yu mo ol famle blong yu i olsem wanem? Sipos yu harem nius se wan hariken i stap kam, ating bambae yu mekem wan samting blong yu no ded. Yu mas mekem sem mak taem yu harem ol profet tok blong Baebol. God i talemaot finis se i no longtaem bambae i gat wan bigfala jenis long fulwol. (Yu luk bokis ya “ Tingting We God i Gat Long Fiuja.”) Ol samting we bambae oli kamtru long fiuja, oli defren olgeta long ol samting we ol man blong hae save oli talem.

Tingbaot samting ya: Baebol i tokbaot finis fiuja blong wol ya, wanem bambae i hapen long stat go kasem en blong hem. God i talem se: “Bifo finis, mi mi talemaot ol samting we biaen oli kamtru. Mi talem finis we ol plan blong mi bambae oli no save foldaon, mo we bambae mi mi save mekem olgeta samting we mi mi wantem.” (Aesea 46:10) Yu wetem ol famle blong yu, yufala i save gat wan gudfala fiuja. I gud yu askem long ol Witnes blong Jehova blong oli talemaot long yu, ol promes we God bambae i mekem i kamtru long fiuja. Be olgeta oli no gat wan spesel paoa blong talemaot fiuja, mo oli no lesin long voes blong wan spirit. Olgeta oli stadi long Baebol nomo, taswe oli naf blong soemaot long yu ol gudfala samting we God bambae i mekem long yu long fiuja.