RUL BLONG BAEBOL: “Taem wan long yufala i gat sam poen agens long narawan, tufala ya i mas fofogivim tufala. Yufala i mas fofogivim yufala, long sem fasin ya we Masta blong yumi i fogivim yumi.”—Kolosi 3:13.

?I minim wanem? Baebol i talem se sin i olsem wan kaon, mo fasin blong fogivim narafala i sem mak long fasin ya we man i kanselem kaon we narafala i gat long hem. (Luk 11:4) Wan buk blong risej i tokbaot se long Baebol, Grik tok ya we oli tanem i kam “fogivim,” i min se “yu kanselem wan kaon we narafala i gat long yu mo yu no moa askem long hem blong i pembak.” Taswe, taem yumi jusum blong fogivim narafala, yumi no mas ting se man we i gat fol i mas mekem wan samting long yumi. Taem yumi rere blong fogivim narafala, hemia i no min se yumi glad long nogud fasin we hem i mekem. Mo tu yumi no fogivim hem, jes blong mekem yumi harem gud nomo. Be, i min se yumi jusum blong no moa tingbaot problem ya, nating se yumi gat raet blong talem wan “poen agens long narawan.”

?Advaes ya i stret yet tede? Yumi evriwan i sinman. (Rom 3:23) Taswe, i waes blong fogivim narafala, from we maet samtaem yumi mestem mo yumi nidim we narafala tu i fogivim yumi. Mo tu, taem yumi jusum blong fogivim narafala, yumi stap mekem i gud long yumi. ?Olsem wanem fasin ya i mekem i gud long yumi?

Taem yumi holemtaet kros blong yumi longtaem mo yumi no wantem fogivim narafala, yumi stap spolem yumi nomo. Ol filing olsem, oli save mekem se yumi no moa glad, mo yumi no moa wantem joen wetem narafala. Mo tu, oli save mekem se yumi kasem sam bigfala sik. Wan ripot we i kamaot long magasin ya Journal of the American College of Cardiology, we wan Dokta we nem blong hem Yoichi Chida mo wan Tija blong Psychology we nem blong hem Andrew Steptoe tufala i raetem se: “Wan niufala save we i jes kamaot i soemaot se fasin ya we man i stap kros longtaem, i save mekem man i kasem sik blong hat [coronary heart disease].”

Be i gat ol gudfala samting we i save kamaot taem yumi fogivim narafala. Taem yumi rere blong fogivim narafala, yumi gat pis mo yumi joen gud. Hemia i save mekem se fasin blong yumi blong fren gud wetem narafala i stap gud oltaem. Mo tu, yumi soemaot se yumi stap folem fasin blong God, we hem i rere oltaem blong fogivim ol man we oli tanem tingting blong olgeta. Hemia wan impoten fasin we God i wantem yumi blong mekem.—Mak 11:25; Efesas 4:32; 5:1.