Wan smol gel i stap stanap longwe lelebet long reva, i stap wajem wan ples we ol longlongfala gras i gru long saed blong reva. Hem i stap kwaet, i no muvmuv nating. Nating se i gat ol bebet oli stap flae raon long hem, be hem i stanap longtaem, i stap wajem ples ya. I gat wan basket i stap flot long ples ya, mo smol brata blong hem i stap slip insaed long basket ya. Hem i sore long smol bebi ya we i stap hem wan mo i no save mekem wan samting. Be hem i save se papa mo mama blong hem i mekem i stret, taem tufala i putum brata blong hem long basket ya. Sipos tufala i no bin mekem olsem, brata blong hem bambae i ded.

Smol gel ya i no fraet, mo i no longtaem, hem i soemaot samting ya. Nating se hem i yang, be hem i gat wan nambawan fasin, hemia bilif long God. Nekis samting we i hapen i soemaot strong bilif we hem i gat. Bilif ya bambae i gat paoa long ful laef blong hem biaen. Taem hem i kam olfala, bilif ya i givhan long hem long wan taem blong trabol we ol manples blong hem oli neva luk bifo. Mo tu, bilif ya i givhan long hem taem hem i mekem wan bigfala mastik. ?Hu ya woman ya? ?Bilif blong hem i tijim yumi long wanem?

Baebol i no talem nem blong smol gel ya, be yumi save se hemia Meriam, fasbon gel blong tufala Hibru ya Amram mo Jokebed, we tufala i wok slef long Ijip. (Namba 26:59) Smol brata blong hem we i stap slip long basket, hemia Moses. Eron we i bigfala brata blong Moses, i gat samwe long tri yia long taem ya. Yumi no sua hamas yia Meriam i gat, be ating hem i no kasem ten yia yet.

Meriam i gruap long taem we laef i had. Ol man Ijip oli fraet se ol Hibru bambae oli kam strong moa long olgeta, taswe oli fosem olgeta blong oli wok slef. Be ol slef ya oli gohed strong mo oli gat plante moa pikinini. Nao ol man Ijip oli mekem wan samting we i moa nogud. Fero i givim oda blong kilim i ded ol pikinini boe blong ol Hibru, taem oli jes bon. Tufala woman ya Sifraha mo Pua, we tufala i stap givhan long ol woman taem oli bonem bebi, tufala i no obei long oda blong king, be tufala i letem ol pikinini boe oli stap laef. Ating Meriam i harem stori blong strong bilif blong tufala.—Eksodas 1:8-22.

Mo tu, Meriam i luk strong bilif blong papa mo mama blong hem, Amram mo Jokebed. Taem namba tri pikinini blong tufala i bon, tufala i no fraet long oda blong king, be tufala i haedem pikinini boe ya blong tri manis. (Hibrus 11:23) Be i no isi blong haedem wan bebi, ale tufala i mekem wan desisen. Jokebed i putum bebi blong hem long basket, mo i hop se man we i faenem hem bambae i lukaot gud long hem. !Traem tingbaot olsem wanem hem i prea wetem fulhat blong hem, taem hem i stap wivim basket ya long ol longfala gras, i kavremap long kolta blong wota i no go insaed, i putum bebi blong hem insaed, nao i livim i flot long Nael Reva! Ating hem i talem long Meriam blong i stanap longwe blong luk wanem i hapen long bebi ya.—Eksodas 2:1-4.

Ale Meriam i stap wet, gogo hem i luk we sam woman Ijip oli kam. Oli no ol woman olbaot, be hemia gel blong Fero mo ol gel blong wok blong hem, we oli kam blong swim long Nael Reva. Ating Meriam i fraet, from we hem i ting se gel blong Fero i no save agensem loa blong king mo protektem Hibru bebi ya. Yumi save se Meriam i mas prea wetem fulhat blong hem long taem ya.

Gel blong Fero i luk basket ya we i haed long ol longlongfala gras long saed blong reva. Hem i sanem wan gel blong wok blong hem i go blong karem basket ya i kam long hem. Baebol i talem se taem gel blong king “i openem basket ya, hem i luk smol pikinini ya i stap insaed, i stap krae.” Hem i kasem save kwiktaem se wan Hibru mama i stap traem blong sevem laef blong pikinini blong hem. Bebi ya i naes tumas mo gel blong Fero i sore long hem. (Eksodas 2:5, 6) Meriam i stap wajem gud, mo hem i luk se gel ya i sore long bebi ya. Meriam i save se hemia stret taem blong soemaot bilif blong hem long Jehova. Ale hem i mekem tingting blong hem i strong, nao i go blong toktok long gel blong Fero.

Yumi no save sipos oli panisim ol Hibru slef gel we oli no fraet blong toktok long famle blong king. Be Meriam i no wet, hem i askem stret long gel blong king se: “?Olsem wanem? ?Yu wantem blong mi go lukaot wan woman Hibru blong i kam givim titi long pikinini ya?” Hemia stret kwestin blong askem. Gel blong Fero i save se hem i no save givim titi long bebi ya. Mo maet hem i ting se i moa gud we wan Hibru woman i givim titi long hem, nao biaen, hem i save tekemaot pikinini ya i go long haos blong hem mo tijim hem mo lukaot long hem olsem stret pikinini blong hem. Yumi save se Meriam i glad tumas taem gel blong king i ansa se: “Yes, yu go.”—Eksodas 2:7, 8.

Meriam i resis i go long papa mo mama blong hem we tufala i stap wari tumas. Tingbaot olsem wanem Meriam i glad blong talem gudfala nius ya long mama blong hem. Jokebed i mas tingbaot se Jehova nao i mekem samting ya i hapen. Ale hem i go wetem Meriam blong luk gel blong Fero. Ating Jokebed i traem haedem glad blong hem, taem gel ya i talem se: “Yu tekem pikinini ya blong mi, yu go givim titi long hem, mo yu lukaot gud long hem. Bambae mi mi pem yu from.”—Eksodas 2:9.

Long dei ya, Meriam i lanem plante samting long saed blong God blong hem Jehova. Hem i lanem se Jehova i stap lukaot gud long ol man blong hem mo i stap lesin long ol prea blong olgeta. Hem i lanem se ol pikinini mo ol woman tu oli save soemaot se oli no fraet mo oli gat bilif, i no ol man mo ol bigman nomo. Jehova i stap lesin long prea blong olgeta man we oli obei long hem. (Ol Sam 65:2) Tede tu, yumi no mas fogetem samting ya, nating se yumi yangfala o olfala, yumi man o woman.

Jokebed i givim titi long bebi ya mo i lukaot gud long hem. Yumi save se Meriam i mas lavem smol brata blong hem we hem i givhan blong sevem laef blong hem. Maet hem i tijim smol boe ya blong i toktok, mo hem i harem gud tumas taem smol boe ya i lanem nem blong God blong hem, Jehova. Taem pikinini ya i kam bigwan, Jokebed i tekem hem i gobak long gel blong Fero. (Eksodas 2:10) Ating ful famle i harem nogud blong lego pikinini ya. Gel blong Fero i singaotem pikinini ya se Moses. I sua se Meriam i wantem tumas blong save se Moses bambae i wanem kaen man taem hem i gruap long famle blong king blong Ijip. ?Bambae Moses i gohed blong lavem Jehova o nogat?

Sloslo, ansa blong kwestin ya i kam klia. Moses i no tekem janis blong kasem ol gudfala samting long haos blong king, be hem i jusum blong wosipim Jehova. Taem Meriam i harem samting ya, hem i mas praod long smol brata blong hem. Taem Moses i gat 40 yia, hem i mekem wan samting we i soemaot se hem i tekem saed blong ol manples blong hem. Hem i luk we wan man Ijip i stap kilim nogud wan Hibru slef, nao hem i kilim man ya i ded. Moses i save se bambae oli kilim hem i ded from samting ya, taswe hem i girap, i ronwe i go long narafala kantri.—Eksodas 2:11-15; Ol Wok 7:23-29; Hibrus 11:24-26.

Maet Meriam i no moa harem nius blong brata blong hem blong 40 yia, from we Moses i stap long kantri blong Midian, i stap lukaot long ol sipsip longwe. (Eksodas 3:1; Ol Wok 7:29, 30) Meriam i stap kam olfala, mo hem i luk we ol manples blong hem oli safa moa.

Ating Meriam i gat klosap 90 yia, taem God i sanem Moses i kambak blong sevem ol man Isrel. Eron i go wetem brata blong hem blong toktok long ples blong hem, nao tufala i go luk Fero. Tufala i askem long Fero blong i letem ol man blong God oli go fri. Be Fero i no lesin. I sua se Meriam i traehad blong leftemap tingting blong tufala long taem ya. Tufala i gobak plante taem blong askem long Fero, mo Jehova i sanem ten trabol i kam long ol man Ijip blong givim woning long olgeta. Laswan long ol trabol ya, hemia se fasbon boe blong ol man Ijip i ded. !Hemia nao stret taem blong ol man Isrel oli aot long Ijip! Tingbaot olsem wanem Meriam i wok had blong halpem ol manples blong hem, taem Moses i lidim olgeta oli aot long Ijip.—Eksodas 4:14-16, 27-31; 7:1–12:51.

Taem ol man Isrel oli kasem Red Si mo ami blong Ijip i stap ronem olgeta, Meriam i luk we brata blong hem Moses i stanap fesem Red Si, i leftemap wokingstik blong hem, nao wota i seraot. Taem Moses i lidim ol man oli gokros long Red Si we tufala wota i stanap saedsaed long olgeta, ating bilif blong Meriam long Jehova i strong moa i bitim ol narafala taem bifo. !Hem i save se God blong hem i naf blong mekem eni samting we hem i wantem, blong mekem promes blong hem i kamtru!—Eksodas 14:1-31.

Taem ol man Isrel oli sef long narasaed blong Red Si mo wota i kambak blong draonem Fero mo ol ami blong hem, Meriam i luksave se Jehova i gat moa paoa i bitim ami ya we i strong moa long ol narafala ami long wol. Ol man oli singsing presem Jehova, mo biaen, Meriam i lidim ol woman blong oli singsing se: “Yumi sing blong presem Hae God, from we hem i win gud long faet ya, nao nem blong hem i go antap. Ol hos wetem ol man blong olgeta, hem i sakem olgeta finis oli go draon long solwota.”—Eksodas 15:20, 21; Ol Sam 136:15.

I sua se Meriam i no save fogetem taem ya. Baebol i singaot Meriam se hem i wan woman profet long taem ya. Hemia fastaem we Baebol i tokbaot wan woman profet. I gat sam woman nomo we Jehova i yusum olgeta long spesel fasin ya, mo Meriam i wan long olgeta.—Jajes 4:4; 2 King 22:14; Aesea 8:3; Luk 2:36.

Stori ya i mekem yumi tingbaot se Jehova i stap wajem yumi, mo hem i glad blong blesem yumi taem yumi wok had wetem tingting daon, yumi gat longfala tingting, mo yumi leftemap nem blong hem. Nating se yumi yangfala o olfala, man o woman, be yumi save soemaot se yumi bilif long Jehova. Hem i glad tumas long man we i bilif olsem. Hem i no save fogetem hem, mo hem i glad blong blesem hem. (Hibrus 6:10; 11:6) !Hemia wan gudfala risen blong folem fasin blong bilif blong Meriam!

I wan bigfala blesing blong kasem spesel wok mo posisen, be i gat denja tu. Long taem we ol man Isrel oli kam fri long Ijip, ating i no gat wan narafala woman long nesen ya we i gat impoten wok olsem Meriam. ?Olsem wanem? ?Meriam i kam flas? (Ol Proveb 16:18) Sore tumas, hem i kam flas blong smoltaem.

Sam manis afta we oli aot long Ijip, Moses i welkamem wan grup we i kam longwe, hemia waef blong hem Jipora mo tufala boe blong tufala, we oli kam wetem palika blong hem Jetro. Taem Moses i stap 40 yia long kantri blong Midian, hem i mared long Jipora. Maet Jipora i bin go luk famle blong hem long Midian, nao papa blong hem i tekem hem i kam blong joenem ol man Isrel. (Eksodas 18:1-5) !Traem tingbaot olsem wanem ol man Isrel oli wantem tumas blong save long Jipora! Oli wantem luk waef blong man ya we God i jusum, blong lidim olgeta oli aot long Ijip.

?Olsem wanem? ?Meriam i glad? Maet fastaem hem i glad. Be i luk olsem se afta we taem i pas, hem i kam flas. Maet hem i fraet se Jipora bambae i tekem spesel wok blong hem long nesen ya. Ale Meriam mo Eron i stat blong talem ol nogud tok. Mo sloslo, ol tok ya i kam moa nogud. Fastaem tufala i tok agensem Jipora, se hem i no woman Isrel be hem i kamaot long laen blong Kus. * Biaen, tufala i agensem Moses. Tufala i komplen se: “Hae God i no stap toktok wetem Moses nomo. Hem i stap toktok wetem mitufala tu.”—Namba 12:1, 2.

Tok ya blong Meriam mo Eron i soemaot se tingting blong tufala i stat blong kam nogud. Tufala i no glad se Jehova i yusum Moses, from we tufala i wantem leftemap tufala mo kasem paoa. ?Olsem wanem? ?Moses i wan man we i strong tumas mo i wantem se ol man oli presem hem? Nogat. I tru se Moses i gat sam slak fasin, be hem i no flas mo i no wantem kam hae moa long ol narafala. Baebol i tokbaot hem se: “I no gat wan narafala man long wol we tingting blong hem i stap daon olsem hem.” Yes, Meriam mo Eron i mekem wan bigfala mastik, mo tufala i stap long denja. Baebol i talem se: “Hae God i harem tok ya we tufala i stap talem.”—Namba 12:2, 3.

Wantaem nomo, Jehova i singaot trifala i kam long haos tapolen blong hem. Nao klaod ya we i soemaot se Jehova i stap, i kamdaon mo i stanap long doa blong haos tapolen. Nao Jehova i toktok blong stretem Meriam mo Eron, i mekem tufala i tingbaot we hem i fren blong Moses, mo i jusum hem from we i trastem gud hem. Jehova i askem long tufala se: “?Weswe yutufala i no fraet blong tok agens long hem?” I sua se Meriam mo Eron i seksek. Long tingting blong Jehova, taem tufala i tok agensem Moses, i olsem we tufala i tok agensem hem.—Namba 12:4-8.

I luk olsem se Meriam nao i pulum smol brata blong hem blong joenem hem blong tok agensem waef blong Moses. Taswe Jehova i panisim Meriam, i mekem se hem i kasem rabis sik ya leprosi, nao “skin blong hem i waet we i waet.” Wantaem nomo, Eron i mekem tingting blong hem i stap daon, mo i plis long Moses blong askem long Jehova blong i fogivim tufala, i se: “Mitufala i stap toktok krangke ya, mitufala i stap mekem i nogud.” From we Moses i gat tingting daon, hem i krae long Jehova se: “!God, plis yu tekemaot sik ya long hem!” (Namba 12:9-13) Moses mo Eron i harem nogud tumas. Hemia i soemaot se tufala i lavem bigfala sista blong tufala, nating se hem i mekem sam bigfala mastik.

Meriam i tanem tingting blong hem nao Jehova i fogivim hem, mo i mekem hem i kam gud bakegen. Be hem i talem se Meriam i mas stap hem wan blong seven dei, afsaed long kamp blong ol man Isrel. Ating Meriam i sem we i sem, from we ol man oli save se Jehova i stap panisim hem. Be bilif blong hem i stap strong. Hem i save se Jehova i mekem i stret oltaem, mo hem i stap panisim hem from we i lavem hem. Ale hem i obei. Ol man Isrel oli wet blong seven dei ya we Meriam i harem nogud afsaed long kamp. Nao Meriam i soemaot bakegen se hem i gat bilif, taem hem i mekem tingting blong hem i stap daon, nao oli ‘tekem hem i kam stap wetem olgeta bakegen.’—Namba 12:14, 15.

Jehova i stap stretem olgeta we hem i lavem olgeta. (Hibrus 12:5, 6) Hem i lavem Meriam, taswe hem i stretem hem taem hem i kam flas. Meriam i harem nogud, be samting ya i sevem laef blong hem. Hem i mekem tingting blong hem i stap daon, i letem Jehova i stretem hem, mo biaen Jehova i glad long hem bakegen. Hem i laef gogo klosap ol man Isrel oli aot long draeples. Maet hem i gat 130 yia taem hem ded long Kades long draeples blong Jin. * (Namba 20:1) Plante handred yia biaen, Jehova i toktok gud long saed blong Meriam, from we hem i holemstrong long hem. Hem i yusum profet Maeka blong talem long ol man blong hem se: “Taem ol olfala bubu blong yufala oli stap long Ijip bifo, . . . oli stap wok slef long kantri ya, be mi tekemaot olgeta, mi mekem olgeta oli fri. Moses mo Eron mo Meriam, mi nao mi sanem trifala, blong trifala i lidim olgeta i kam.”—Maeka 6:4.

Ol samting we oli hapen long laef blong Meriam oli save tijim yumi. Yumi no mas fraet blong toktok blong givhan long olgeta we oli no naf blong protektem olgeta bakegen, olsem Meriam i mekem taem hem i pikinini. (Jemes 1:27) Yumi mas glad blong tijim ol narafala long ol tok blong God, olsem Meriam. (Rom 10:15) Yumi mas sakemaot ol rabis fasin olsem jalus mo nogud tingting, olsem Meriam. (Ol Proveb 14:30) Mo yumi mas mekem tingting blong yumi i stap daon mo letem Jehova i stretem yumi, olsem Meriam. (Hibrus 12:5) Taem yumi mekem olsem, yumi stap folem fasin blong bilif blong Meriam.