Ol Kristin oli bilif se Jisas i ded from sin blong ol man. (1 Pita 3:18) Be sipos oli wantem se God i sevem olgeta, oli mas mekem moa i bitim we oli bilif nomo se Jisas i Sevia. Ol rabis spirit oli save se Jisas i “Pikinini blong God,” be bambae oli lus long fiuja, God bambae i no sevem olgeta.—Luk 4:41; Jud 6.

•  ?Mi mas mekem wanem blong God i sevem mi?

•  ?Olsem wanem long “Prea Blong Sinman”?

•  ?“Prea Blong Sinman” i kamaot long weples?

•   Yu mas bilif se Jisas i givim laef blong hem olsem wan sakrefaes, from ol sin blong yumi. (Ol Wok 16:30, 31; 1 Jon 2:2) Hemia i min tu se yu mas bilif se Jisas i wan trufala man we i laef, mo se olgeta stori blong hem long Baebol oli tru.

•   Lanem samting we Baebol i rili tijim. (2 Timoti 3:15) Baebol i talem se aposol Pol mo Saelas i talem long wan gad blong kalabus se: “Yu mas bilif long Masta Jisas nao bambae God i sevem yu.” Nao afta long samting ya, tufala i stat blong tijim gad ya long “tok blong Jehova.” a (Ol Wok 16:31, 32) Hemia i soemaot se sipos gad ya i no kasemsave long Tok blong God, bambae hem i no save bilif long Jisas. Hem i nidim stret save we i stanap long ol tok blong Baebol.—1 Timoti 2:3, 4.

•   Tanem tingting. (Ol Wok 3:19) Yu mas tanem tingting blong yu tu, o sore bigwan, from ol rong we yu mekem bifo. Ol narafala man oli mas luk se yu tanem tingting blong yu, taem yu stop blong mekem ol samting we God i no laekem, mo yu mekem ‘ol wok we oli soemaot se yu tanem tingting.’—Ol Wok 26:20.

•   Yu baptaes. (Matiu 28:19) Jisas i talem se olgeta we oli kam disaepol blong hem, bambae oli baptaes. (Ol Wok 16:33) Long sem fasin, afta we aposol Pita i tijim trutok long saed blong Jisas long wan bigfala hip blong man, “olgeta we oli glad long ol tok blong hem, oli baptaes.”—Ol Wok 2:40, 41.

•   Obei long ol tok blong Jisas. (Hibrus 5:9) Olgeta we oli “folem olgeta tok” we Jisas i talem, oli soemaot long laef blong olgeta se oli biaen long hem. (Matiu 28:20) Oli kam ol man we oli ‘mekem samting we tok ya i talem, be oli no lesin nomo.’—Jemes 1:22.

•   Stanap strong go kasem en. (Mak 13:13) Ol disaepol blong Jisas oli “mas gat fasin ya blong stanap strong” blong oli save sef. (Hibrus 10:36) Eksampol, aposol Pol i obei gud long evri samting we Jisas i tijim, mo oltaem hem i holemstrong long God, mo hem i stanap strong long rod ya stat long dei we hem i kam Kristin go kasem we hem i ded.—1 Korin 9:27.

 Long sam jos, ol man oli stap ripitim sam prea olsem “Prea Blong Sinman” mo “Prea Blong Sef.” Olgeta we oli talem prea ya, oli luksave se oli gat sin mo oli bilif se Jisas i ded from sin blong olgeta. Oli askem tu blong Jisas i kam long hat blong olgeta o long laef blong olgeta. Be Baebol i no tokbaot wan “Prea Blong Sinman,” mo i no talem se yumi mas stap ripitim prea ya.

 Sam man oli ting se afta we man i ripitim toktok blong “Prea Blong Sinman,” God bambae i sevem man ya. Be i no gat man i save sef jes from we hem i prea. Yumi ol man, yumi sinman, taswe oltaem yumi stap mekem mastik. (1 Jon 1:8) Hemia nao from wanem Jisas i tijim ol man blong hem blong oli prea oltaem blong God i fogivim sin blong olgeta. (Luk 11:2, 4) Antap moa, sam Kristin we oli gat janis blong kasem laef we i no save finis, oli lusum blesing ya from we oli tanem baksaed long God mo oli no moa mekem wok blong hem.—Hibrus 6:4-6; 2 Pita 2:20, 21.

 Ol man blong histri oli gat defdefren tingting long stamba blong “Prea Blong Sinman.” Samfala oli talem se prea ya i stat long taem blong Protestan Refomesen. Ol narafala oli bilif se ol man oli stat blong talem “Prea Blong Sinman” taem ol niufala jos oli stat long ol yia 17 mo 18 handred. Nomata se i olsem wanem, tijing ya se man i mas stap ripitim prea ya, i no stanap long ol tok blong Baebol. Mo blong talem stret, fasin ya i agensem ol tijing blong Baebol.