Yes, God bambae i fogivim sin blong yu sipos yu mekem ol stret samting we hem i wantem blong kasem fogif. Baebol i talem se God i “rere blong fogif,” mo hem “i fogif long fasin we i bigwan.” (Nehemaea 9:17; Ol Sam 86:5; Aesea 55:7) Taem God i fogivim yumi, hem i fogif fulwan. Hem i “tekemaot” o ravemaot ol sin blong yumi. (Ol Wok 3:19) Mo tu, God i fogivim yumi blong olwe. Hem i talem se: “Bambae mi no moa tingbaot sin blong olgeta.” (Jeremaea 31:34) Taem God i fogivim yumi, hem i no moa agensem yumi o panisim yumi bakegen from sin ya.

 Taem God i fogivim yumi, hemia i no from we hem i sofsof o i no gat paoa blong panisim yumi. Hem i neva jenisim ol stret rul blong hem. Taswe, i gat sam sin we hem i no save fogivim.—Josua 24:19, 20.

Ol samting we yu mas mekem blong God i fogivim yu

1. Yu mas luksave se taem yu mekem sin, yu brekem wan rul blong God. Maet samting we yu mekem i spolem sam narafala tu, be yu mas luksave se sin blong yu i agensem God fastaem.—Ol Sam 51:1, 4; Ol Wok 24:16.

2. Prea long God mo talemaot sin blong yu.—Ol Sam 32:5; 1 Jon 1:9.

3. Yu mas harem nogud from sin blong yu. Taem man i “harem nogud folem samting we God i wantem,” hemia i save pulum hem blong i tanem tingting blong hem, o i jenisim fasin blong hem. (2 Korin 7:10) Hemia i min se yu sore tu we yu bin folem wan rong rod we i lidim yu blong mekem sin.—Matiu 5:27, 28.

4. Jenisim fasin blong yu, o “tanraon.” (Ol Wok 3:19) Hemia i min se yu stopem wan rong aksen mo yu no moa mekem bakegen, o yu jenisim fulwan ol tingting mo fasin blong yu.—Efesas 4:23, 24.

5. Yu mas mekem sam samting blong stretem rong blong yu mo nogud frut we i kamaot from. (Matiu 5:23, 24; 2 Korin 7:11) Yu talem sore long olgeta we oli safa from samting we yu mekem o yu no mekem, mo yu mekem wan samting blong soemaot se yu sore.—Luk 19:7-10.

6. Prea long God blong hem i fogivim yu tru long ransom sakrefaes blong Jisas. (Efesas 1:7) Blong God i ansarem prea blong yu, yu mas fogivim olgeta we oli mekem sin agensem yu.—Matiu 6:14, 15.

7. Sipos yu mekem wan bigfala sin, toktok long wan we hem i naf blong givhan long yu blong frengud bakegen wetem God, mo we i save prea long bihaf blong yu.—Jemes 5:14-16.

Rong tingting long saed blong fasin blong God blong fogivim man

 “Sipos mi talemaot sin blong mi long wan pris o pasta, hem i save fogivim mi.”

 I no gat wan man tede we i gat paoa blong fogivim sin we narafala man i mekem agensem God. Man i save harem gud bakegen taem hem i talemaot sin blong hem long narafala, be God nomo i save fogivim sin.—Efesas 4:32; 1 Jon 1:7, 9.

 Sipos i olsem, ?wanem mining blong tok we Jisas i talem long ol aposol blong hem se: “Sipos yufala i fogivim sin blong ol man, God i fogivim olgeta finis. Sipos yufala i no fogivim sin blong ol man, God i no fogivim olgeta yet”? (Jon 20:23) Hem i stap tokbaot wan spesel paoa we bambae hem i givim long ol aposol, taem oli kasem tabu spirit.—Jon 20:22.

 Olsem Jisas i talem, ol aposol oli kasem presen ya taem tabu spirit i kam fulap long olgeta long yia 33 K.T. (Ol Wok 2:1-4) Aposol Pita i yusum paoa ya taem hem i jajem tufala disaepol ya Ananaeas mo Safaera. Tabu spirit i soemaot long Pita, giaman plan we tufala i mekem, mo jajmen blong hem i soemaot se God i no save fogivim tufala.—Ol Wok 5:1-11.

 Spesel paoa ya we tabu spirit i givim, wetem ol narafala paoa, olsem blong mekem sikman i kamgud mo toktok long ol narafala lanwis, oli finis taem ol aposol oli ded. (1 Korin 13:8-10) Taswe, i no gat wan man tede we i save fogivim sin blong narafala man.