?I Minim Wanem Se Man i Sef?
Ansa we Baebol i givim
Samtaem ol man blong raetem Baebol, oli yusum tufala tok ya “sef” mo “sevem” blong givim tingting ya we wan man i tekemaot narafala long denja o trabol. (Eksodas 14:13, 14; Ol Wok 27:20) Be oltaem, ol tok ya oli minim tu se man i kam fri long sin. (Matiu 1:21) From we ded i kamaot from sin, man we i sef o kam fri long sin hem i gat hop blong laef olwe.—Jon 3:16, 17. a
?Man i mas mekem wanem blong i sef?
Sipos yu wantem sef, yu mas bilif long Jisas mo yu soemaot bilif ya taem yu obei long ol komanmen blong hem.—Ol Wok 4:10, 12; Rom 10:9, 10; Hibru 5:9.
Baebol i soemaot se yu mas mekem sam wok, o mekem wok we i soemaot se yu obei, blong pruvum se bilif blong yu i laef. (Jemes 2:24, 26) Be hemia i no min se from ol samting ya, yu yu sef. Nogat. Hemia “wan presen blong God” we yu kasem from hem i “kaen tumas.”—Efesas 2:8, 9.
?Yu yu save lusum janis ya blong sef?
Yes. Wan man we oli stap pulumaot hem from we i draon, i save foldaon o jam i gobak long wota, long sem fasin wan man we i sef o i kamfri finis long sin, hem tu i save lusum nambawan janis ya, sipos hem i no moa gohed blong soemaot bilif. From risen ya nao, Baebol i pulum ol Kristin we oli sef finis, blong oli “mas faet strong blong holemtaet bilif.” (Jud 3) Hem i givim woning tu long olgeta we oli sef finis, i se: “Yufala wanwan i gohed blong wok had blong yufala i save sef, mo yufala i mas mekem wetem fasin ya we yufala i fraet mo seksek.”—Filipae 2:12.
?Hu i Sevia, God o Jisas?
Baebol i soemaot se God nao i stamba man blong sevem ol man, mo i tokbaot hem oltaem olsem “Sevia.” (1 Samuel 10:19; Aesea 43:11; Taetas 2:10; Jud 25) Mo tu, God i yusum plante defren man blong tekemaot nesen blong Isrel, mo Baebol i singaot olgeta ya tu se ‘ol man blong sevem man’ o [“ol sevia,” ASV]. (Nehemaea 9:27; Jajes 3:9, 15; 2 King 13:5) b Long sem fasin, from we God i yusum sakrefaes blong Jisas Kraes olsem rod blong yumi sef o kam fri long sin, Baebol i tokbaot hem tu olsem “Sevia.”—Ol Wok 5:31; Taetas 1:4. c
?Evri man bambae oli sef?
Nogat. Sam man bambae oli no sef. (2 Tesalonaeka 1:9) Taem wan man i askem long Jisas se: “?Smol man nomo bambae oli sef?” Hem i ansa se: “Yufala i mas taetem bun blong yufala blong gotru long doa ya we i smol. Mi mi talem stret long yufala, plante man bambae oli wantem blong go insaed be bambae oli no naf.”—Luk 13:23, 24.
Rong tingting se evri man bambae oli sef
Rong tingting: Fas Korin 15:22 i soemaot se olgeta man bambae oli sef, from i talem se “olgeta man we oli joen long Kraes bambae oli laef bakegen.”
Trutok: Ol tok raonabaot long vas ya oli stap tokbaot laef bakegen. (1 Korin 15:12, 13, 20, 21, 35) So haf ya “olgeta man we oli joen long Kraes bambae oli laef bakegen” i minim nomo se olgeta we oli laef bakegen, oli kasem blesing ya tru long Jisas Kraes.—Jon 11:25.
Rong tingting: Taetas 2:11 i soemaot se olgeta man bambae oli sef, from i talem se God “i openem rod blong hem i sevem ol defdefren kaen man.”—International Standard Version.
Trutok: Grik tok we oli tanem i kam “ol” long vas ya i save minim tu “olgeta kaen o plante defren kaen man.” d Taswe, stret tingting we i stap long Taetas 2:11 hemia se God i stap mekem samting blong sevem ol defdefren kaen man, hemia ol man ya we “oli kamaot long olgeta kantri, mo long olgeta traeb, mo long olgeta grup blong man, mo long olgeta lanwis.”—Revelesen 7:9, 10.
Rong tingting: Seken Peter 3:9 i soemaot se olgeta man bambae oli sef, from i talem se God “i no wantem se wan man i ded.”
Trutok: God i wantem we ol man oli sef, be hem i no fosem olgeta blong akseptem ol rod we hem i mekem blong sevem olgeta. Mo long “dei ya blong jajmen” blong hem, bambae hem i ‘spolem tu ol man we oli no obei long God.’—2 Pita 3:7.
a Nating se wan man o woman bambae i sef o i kam fri fulwan long sin mo ded long fiuja, be Baebol i tokbaot hem olsem we hem i “sef o i kam fri” finis.—Efesas 2:5; Rom 13:11.
b Long ol vas, sam translesen oli yusum ol tok olsem “jampion,” “man blong sevem man,” “hero,” “lida,” o “wan man” be oli no yusum tok ya “sevia.” Be long original Hibru Baebol, tok we oli yusum blong talem ol man blong sevem man o ol sevia, hem i sem tok we oli yusum blong tokbaot Jehova olsem Sevia.—Ol Sam 7:10.
c Nem ya Jisas i kamaot long Hibru nem ya Yehoh·shuʹaʽ, we i minim “Jehova i Sevem Man.”
d Yu luk Vine’s Complete Expository Dictionary of Old and New Testament Words. Sem Grik wod ya i kamaot long Matiu 5:11, long toktok ya we Jisas i talem se ol man bambae oli talem “enikaen” rabis tok agensem ol man we oli biaenem hem.—International Standard Version.
Maet Yu Laekem Hemia Tu
ANSA WE BAEBOL I GIVIM
?Sakrefaes Blong Jisas i “Wan Ransom Blong Pembak Plante Man”?
?Olsem wanem ransom i mekem se man i kam fri long sin?
ANSA WE BAEBOL I GIVIM
?I Tru Se Baebol i Tijim Se ‘Taem God i Sevem Man, Man Ya i Sef Blong Olwe’?
Jiass i yusum wan pijatok blong ansarem kwestin ya.
ANSA WE BAEBOL I GIVIM
“Bilif Long Jisas”—Sipos Mi Bilif Long Jisas, ?Hemia Nomo i Naf Blong Sevem Mi?
Baebol i tokbaot sam man we oli bilif long Jisas be God bae i no sevem olgeta. ?From wanem?
ESSENTIAL BIBLE TEACHINGS
?From Wanem Jisas i Ded?
Maet yu harem finis se hem i ded blong tekemaot sin blong yumi. ?Be ded blong wan man nomo i save givhan long plante milian man?
EKSPLENESEN BLONG OL VAS
Eksplenesen Blong Rom 10:13—“Singaot Long Nem Blong Masta”
God i givim janis long evri man blong oli sef mo kasem laef blong olwe, nomata se oli kamaot long wanem kantri, kala blong skin i defren, mo oli rij o oli pua.
