I no gat wan man we i luk God long prapa ae blong hem. (Eksodas 33:20; Jon 1:18; 1 Jon 4:12) Baebol i talem se “God hem i Spirit,” hemia wan fom blong laef we man i no save luk wetem prapa ae blong hem.—Jon 4:24; 1 Timoti 1:17.

 Be ol enjel oli save luk God, from we olgeta oli spirit. (Matiu 18:10) Mo tu, sam man we oli ded, bambae oli laef bakegen wetem wan spirit bodi, mo bambae olgeta tu oli save luk God.—Filipae 3:20, 21; 1 Jon 3:2.

 Plante taem Baebol i yusum tok ya “luk” olsem wan pijatok blong minim se man i kasemsave wan samting. (Aesea 6:10; Jeremaea 5:21; Jon 9:39-41) Folem mining ya, wan man i save luk God tede wetem “ae blong hat” blong hem, taem hem i gat bilif from we hem i kasemsave long God mo i glad long ol fasin blong Hem. (Efesas 1:18, futnot.) Hemia sam step we Baebol i tokbaot blong kasem kaen bilif olsem.

•   Lukluk kriesen blong lanem ol gudfala fasin blong God, olsem lav blong hem, fasin blong hem blong givim samting, wetem waes mo paoa blong hem. (Rom 1:20) Afta we God i rimaenem gudfala man ya Job blong i tingbaot ol kriesen blong Hem, Job i filim olsem se hem i luk God stret.—Job 42:5.

•   Stadi Baebol blong save God. Baebol i talem long yumi se: “Sipos yu lukaotem [God], bambae hem i mekem se yu faenem hem.”—1 Kronikel 28:9; Ol Sam 119:2; Jon 17:3.

•   Stadi long laef blong Jisas, blong save God. Jisas i soemaot ol fasin blong Papa blong hem Jehova God long fasin we i stret gud olgeta, taswe i stret nomo we hem i talem se: “Man we i luk mi, hem i luk Papa tu.”—Jon 14:9.

•   Laef long fasin we God i glad long hem, nao bambae yu luk olsem wanem hem i mekem i gud long yu. Jisas i talem se: “Olgeta we hat blong olgeta i klin, oli glad from we bambae oli luk God.” Olsem we yumi tokbaot finis, sam man we oli mekem God i glad, bambae oli laef bakegen long heven, nao bambae oli “luk God” long ples ya.—Matiu 5:8; Ol Sam 11:7.

 Maet sam stori blong Baebol oli soem se sam man oli luk God long prapa ae blong olgeta, be ol konteks oli soem se wan enjel i representem God long taem ya, o God i soemaot hem long wan vison.

 Ol enjel.

Long ol taem bifo, God i sanem ol enjel blong oli representem hem long ol man, mo blong toktok long nem blong hem. (Ol Sam 103:20) Eksampol, wan taem, God i toktok long Moses long wan smol tri we faea i stap laet long hem, mo Baebol i talem se “Moses i haedem fes blong hem, from we hem i fraet blong luk tru God.” (Eksodas 3:4, 6) Be Moses i no luk God long prapa ae blong hem, from we konteks i soem se hem i luk “enjel blong Jehova.”—Eksodas 3:2.

 Long sem fasin, taem Baebol i talem se God “i toktok long Moses fes tu fes,” hem i min se God i storian wetem Moses olsem wan fren. (Eksodas 4:10, 11; 33:11) Moses i no luk fes blong God, from we God i “yusum ol enjel” blong pasem ol infomesen long hem. (Galesia 3:19; Ol Wok 7:53) Nating se i olsem, Moses i bilif strong long God nao Baebol i tokbaot se “hem i luk God ya we man i no save luk long ae blong hem.”—Hibru 11:27.

 Sem mak olsem we hem i mekem long Moses, God i toktok long Ebraham tru long ol enjel. I tru se taem man i ridim Baebol, hem i save ting se Ebraham i luk God long prapa ae blong hem. (Jenesis 18:1, 33) Be konteks i soem se “tri man” ya we oli kam luk Ebraham, oli ol enjel we God i sanem. Ebraham i luksave se olgeta oli representem God, ale hem i toktok long olgeta olsem we i toktok long Jehova stret.—Jenesis 18:2, 3, 22, 32; 19:1.

 Ol vison.

God i kamtru long ol man tru long ol vison tu, o ol pija we man i luk long maen blong hem. Eksampol, taem Baebol i talem se Moses mo ol man Isrel oli “luk God blong Isrel,” oli rili “luk tru God long wan vison.” (Eksodas 24:9-11) Long sem fasin, samtaem Baebol i talem se ol profet oli “luk Jehova.” (Aesea 6:1; Daniel 7:9; Amos 9:1) Long ol kes ya wanwan, konteks i soem se oli kasem wan vison blong God, be oli no luk hem stret.—Aesea 1:1; Daniel 7:2; Amos 1:1.