“Yufala evriwan we i stap hadwok tumas mo yufala i stap karem ol hevi samting, yufala i kam long mi, mo bambae mi mi mekem we yufala i kasembak paoa. Yufala i mas putum yok blong mi long solda blong yufala, blong yufala i wok wetem mi, mo yufala i lan long mi, from we mi mi wan kwaet man mo tingting blong mi i stap daon, nao bambae yufala i save harem gud long laef blong yufala. From we yok blong mi i isi nomo blong man i karem, mo ol samting we mi askem long yufala blong yufala i karem, oli no hevi.”—Matiu 11:28-30, Baebol Long Niu Wol Translesen.

 “Kam long mi, yufala evriwan we i taed mo i karem ol hevi baden, nao bambae mi givim spel long yufala. Putum yok blong mi long yufala, mo lanem samting long mi, from we mi mi kaen mo tingting blong mi i stap daon, nao bambae yufala i faenem pis long laef blong yufala. Yok blong mi i no strong mo baden blong mi i no hevi.”—Matiu 11:28-30, New International Version.

 Long kaen fasin, Jisas i singaot ol man blong oli kam long hem. Hem i promes long olgeta se sipos oli lesin long hem mo lanem plante samting, bambae oli save harem gud mo spel long ol trabol long laef blong olgeta.

 “Yufala evriwan we i stap hadwok tumas mo yufala i stap karem ol hevi samting, yufala i kam long mi.” Ol man we Jisas i singaot olgeta oli “stap karem ol hevi samting,” from we ol lida blong skul oli stap fosem olgeta blong folem ol rul mo kastom blong man. (Matiu 23:4; Mak 7:7) Mo tu, ol man oli gat plante wari mo oli mas wok had blong kasem ol samting we famle blong olgeta i nidim. Hemia i olsem ol hevi samting we oli stap karem.

 “Bambae mi mi mekem we yufala i kasembak paoa.” Jisas i promes blong tekemaot ol hevi samting, o givim spel long olgeta. Hem i mekem olsem taem hem i halpem olgeta blong kasem save long samting we God i wantem olgeta blong mekem. (Matiu 7:24, 25) Save ya i mekem olgeta oli kam fri long ol giaman tingting mo ol kastom blong skul we oli hevi tumas. (Jon 8:31, 32) I tru se oli mas wok had blong lanem mo folem ol tijing blong Jisas, be taem oli mekem olsem oli harem gud.

 “Yufala i mas putum yok blong mi long solda blong yufala, . . . mo yufala i lan long mi.” Long taem ya we oli raetem Baebol, plante man oli putum wan yok o wan longfala wud i gokros long solda blong olgeta, blong karem ol hevi samting. Taswe, tok ya “yok” i stat blong karem mining ya se wan man i stap aninit long paoa o han blong narafala. (Levitikas 26:13; Aesea 14:25; Jeremaea 28:4) Narafala rod blong talem tok ya “lan long mi,” hemia se “kam disaepol blong mi (man we Jisas i tijim).” Ale Jisas i stap pulum ol man blong oli biaen long hem mo folem eksampol blong hem, olsem nao bambae oli kam ol disaepol blong hem.—Jon 13:13-15; 1 Pita 2:21.

 “Bambae yufala i save harem gud long laef blong yufala.” Jisas i no promes se ol samting we i hevi long olgeta bambae oli finis wantaem nomo. Be hem i givhan long ol man blong oli gat hop mo oli harem gud. (Matiu 6:25-32; 10:29-31) Olgeta we oli kam disaepol mo akseptem ol tijing blong hem, oli faenemaot se i no wan hevi samting blong mekem wok blong God, be i mekem olgeta oli rili glad.—1 Jon 5:3.

 “From we yok blong mi i isi nomo blong man i karem, mo ol samting we mi askem long yufala blong yufala i karem, oli no hevi.” Jisas i defren long ol lida blong skul long taem blong hem, from we Jisas i gat tingting daon mo i wan kwaet man. (Jon 7:47-49) Hem i no mekem i strong tumas long ol man o askem olgeta blong mekem tumas samting. Be hem i kaen mo ol man oli no fraet blong kam long hem. Ol samting we hem i askem long ol disaepol blong hem blong mekem, oli no strong tumas. (Matiu 7:12; Mak 6:34; Luk 9:11) Mo tu, hem i soemaot long olgeta olsem wanem oli save kasem blesing taem God i sore long olgeta, mo olsem wanem oli save harem gud taem tingting blong olgeta i no moa stikim olgeta. (Matiu 5:23, 24; 6:14) Ol nambawan fasin blong Jisas oli pulum ol man blong oli kam long hem, mo tu, blong oli karem yok blong hem we i isi, mo kam disaepol blong hem.

 Jisas i talem ol tok ya long Matiu 11:28-30 taem hem i stap prij long Galili long yia 31 K.T. Aposol Matiu nomo i raetemdaon ol tok ya we Jisas i talem long kaen fasin. Fastaem, Matiu we i wan man Jiu, hem i man blong tekem mane blong takis. Taswe hem i save gud olsem wanem ol man oli harem nogud, i no from takis nomo we gavman blong Rom i askem, be from ol nogud fasin tu long skul blong ol man Jiu. Taswe yumi save se hem i glad tumas taem hem i luk we Jisas i yusum paoa we Papa blong hem Jehova a i givim, blong singaot ol man we oli gat tingting daon mo wan had laef, blong oli kam long hem.—Matiu 11:25-27.

 Gospel blong Matiu i soemaot ol nambawan fasin blong Jisas, olsem Mesaea we God i makemaot mo rula blong Kingdom blong God.—Matiu 1:20-23; Aesea 11:1-5.

 Wajem sot video ya blong luk wanem samting we buk blong Matiu i tokbaot.