“Yufala i mas glad from we yufala i gat hop. Yufala i mas stanap strong long taem blong trabol. Mo yufala i mas prea oltaem.”—Rom 12:12, Baebol Long Niu Wol Translesen.

 “Harem gud long hop blong yufala, gat longfala tingting long taem blong trabol, mo prea oltaem.”—Rom 12:12, English Standard Version.

 Long vas ya, aposol Pol i leftemap tingting blong ol Kristin long Rom, blong oli mekem tri samting blong stanap strong taem ol man oli ronem mo kilim olgeta, mo taem oli fesem ol narafala problem.

 “Yufala i mas glad from we yufala i gat hop.” Ol Kristin oli gat nambawan hop blong kasem laef olwe, samfala long heven be bighaf long paradaes long wol. (Ol Sam 37:29; Jon 3:16; Revelesen 14:1-4; 21:3, 4) Hop ya i mekem se oli stap wet tu blong luk we Kingdom blong God a bambae i stretem problem blong ol man. (Daniel 2:44; Matiu 6:10) Mo tu, ol man blong God oli save glad taem oli kasem hadtaem, from we oli bilif strong se hop blong olgeta i sua mo God i glad long olgeta taem oli stap stanap strong.—Matiu 5:11, 12; Rom 5:3-5.

 “Yufala i mas stanap strong long taem blong trabol.” Plante taem, Grik tok long Baebol we yumi tanem i kam “stanap strong,” i minim “no ronwe be stap long ples blong yu nomo, gohed blong traehad, holem strong tingting.” Ol man blong Kraes oli “no blong wol ya,” b taswe oli ekspektem se ol man bambae oli ronem mo kilim olgeta. Hemia nao from wanem oli mas stanap strong. (Jon 15:18-20; 2 Timoti 3:12) Taem wan Kristin i stanap strong long wok blong God nating se i kasem hadtaem, bilif ya se God bambae i givim pei long hem i kam strong moa. (Matiu 24:13) Mo bilif ya i mekem se hem i naf blong gotru long ol hadtaem ya wetem longfala tingting mo glad.—Kolosi 1:11.

 “Yufala i mas prea oltaem.” Blong holemstrong long God, Baebol i pulum ol Kristin blong oli prea oltaem. (Luk 11:9; 18:1) Oli lukaot God blong i lidim olgeta long evri samting long laef blong olgeta. (Kolosi 4:2; 1 Tesalonaeka 5:17) Oli sua se God bambae i ansarem prea blong olgeta from we oli obei long ol loa blong hem, mo oli traem bes blong olgeta blong mekem hem i glad. (1 Jon 3:22; 5:14) Oli save tu se, sipos oli gohed blong prea, God bambae i givim paoa we oli nidim blong stanap strong, nomata wanem problem oli kasem.—Filipae 4:13.

 Pol i raetem leta i go long ol Kristin long Rom samwe long 56 K.T. Long japta 12, hem i givim advaes olsem wanem blong soemaot ol Kristin fasin, olsem wanem blong mekem i gud long ol brata mo sista mo ol narafala man, mo olsem wanem blong gat kwaet tingting taem ol man oli ronem mo kilim yumi. (Rom 12:9-21) I gud tumas we ol Kristin long Rom oli kasem advaes ya, from we i no longtaem biaen, ol man oli ronem mo kilim nogud olgeta.

 Long 64 K.T., wan bigfala faea i bonem taon blong Rom. Toktok i goraon se Empera Nero i statem faea ya. Wan man Rom we i raetem histri, nem blong Tacitus, i talem se Nero i blemem ol Kristin se olgeta nao oli statem faea ya. Hemia nao samting we i mekem se ol man oli girap agensem ol Kristin. Advaes blong Pol i givhan long ol Kristin blong oli stanap strong long hadtaem ya, mo oli fesem trabol ya wetem bilif mo strong tingting. (1 Tesalonaeka 5:15; 1 Pita 3:9) Oli soemaot gudfala eksampol long ol man blong God tede.

 Wajem sot video ya blong luk wanem samting we buk blong Rom i tokbaot.