Taem yumi gat ol sas samting, olsem ol haos mo trak, yumi mas lukaot gud long olgeta. Samting ya i tru tu long saed blong frensip blong yu wetem God. Afta long baptaes, ?olsem wanem yu save stap klosap long God?

Long atikol ya

•  Gohed blong stadi long Tok blong God

•  Gohed blong prea long Jehova

•  Gohed blong talemaot bilif blong yu long ol narafala

•  Gohed blong joen long ol Kristin miting

 Stamba vas: “Gohed blong karem frut long evri gudfala wok blong yufala, mo bambae stret save we yufala i gat long saed blong God, i kam bigwan moa.”—Kolosi 1:10.

 ?I minim wanem? Afta long baptaes, yu mas gohed blong ridim Baebol mo tingting dip long samting we yu lanem.—Ol Sam 25:4; 119:97.

 Samting we yu save ekspektem: Samtaem, bambae yu no wantem stadi. Maet yu ting se yu no “wan man blong stadi.”

 Samting we yu save mekem: Stadi dip long ol topik blong Baebol we yu intres long olgeta. Mekem prapa program blong yu blong stadi, wan program we i no strong tumas long yu. Taem yu stadi, bigfala tingting blong yu i blong lavem Jehova mo Tok blong hem moa. Kaen stadi olsem i givhan long yu mo tu, yu harem gud long hem.—Ol Sam 16:11.

 Traem hemia: Blong kasem ol gudfala samting long stadi blong yu, traem faenem wan kwaet ples we i no gat samting blong pulum ae mo tingting blong yu.

 Samting blong halpem yu moa

•   Ridim:

   “?Olsem Wanem Baebol i Save Givhan Long Mi?—Haf 2: Laekem Blong Ridim Baebol”

   “?Olsem Wanem Blong Fokas?”

•   Wajem:

   Sam Yangfala Oli Talem Wanem—Baebol Riding

•   Daonlodem:

   “Program Blong Ridim Baebol”

 Stamba vas: “Yufala i no mas wari tumas from eni samting, be yufala i mas askem olgeta samting we yufala i wantem long God. Yufala i mas prea long hem, yufala i mas krae i go long hem, mo yufala i mas talem tangkiu long hem.”—Filipae 4:6.

 ?I minim wanem? Blong fren gud wetem God, yu mas toktok long hem, mo hem i toktok long yu. Taem yu prea, yu toktok long hem, mo taem yu ridim Baebol, yu stap lesin long hem. Makem gud se long ol prea blong yu, yu save askem samting we yu nidim, mo talem tangkiu from ol blesing we yu kasem.

 Samting we yu save ekspektem: Samtaem, maet yu harem se yu stap ripitim sem samting nomo long ol prea blong yu. Mo tu, maet yu stat blong ting se Jehova i no moa harem yu o i no moa wantem lesin long ol prea blong yu.—Ol Sam 10:1.

 Samting we yu save mekem: Evri dei, tingbaot sam samting we yu save tokbaot long prea blong yu. Sipos yu stap long wan situesen we yu no save mekem wan longfala prea, holem ol samting ya long tingting blong yu, nao biaen yu save tokbaot long prea. Antap long ol wari blong yu, prea from ol narafala tu.—Filipae 2:4.

 Traem hemia: Sipos yu harem se yu stap ripitim sem samting oltaem long ol prea blong yu, talemaot samting ya long Jehova. Hem i wantem harem olgeta wari blong yu, wetem ol wari ya tu long saed blong prea.—1 Jon 5:14.

 Samting blong halpem yu moa

•   Ridim:

   “?From Wanem Mi Mas Prea?”

•   Daonlodem:

   “?Olsem Wanem Blong Kam Gud Moa Long Ol Prea Blong Yu?”

 Stamba vas: “Yu mas lukaot gud long fasin blong yu, mo long ol tok we yu stap tijim ol man long hem. . . . Sipos yu mekem olsem, bambae yu sevem yu, wetem olgeta we oli lesin long yu.”—1 Timoti 4:16.

 ?I minim wanem? Taem yu talemaot bilif blong yu long ol narafala, bilif blong yu tu i kam strong. From samting ya, maet yu sevem laef blong olgeta we oli lesin long yu mo laef blong yu tu.

 Samting we yu save ekspektem: Samtaem, maet yu harem se yu no wantem talemaot bilif blong yu. Maet yu fraet, speseli long skul.

 Samting we yu save mekem: Mekem desisen blong no letem ol nogud filing olsem fraet, i kontrolem yu. Aposol Pol i raetem se: “Sipos mi mi no wantem be mi fosem mi nomo blong mekem wok ya [blong talemaot gud nius], be i oraet nomo, hemia wan wok we God i putum long han blong mi.”—1 Korin 9:16, 17.

 Traem hemia: Faenem wan brata o sista blong givhan long yu, we papa mo mama blong yu i agri se hem i save soemaot wan gudfala eksampol long yu long wok blong prij.—Ol Proveb 27:17.

 Samting blong halpem yu moa

•   Ridim:

   “?From Wanem Mi Mi Fraet Blong Talemaot Bilif Blong Mi?”

 Stamba vas: “I gud yumi stap tingbaot yumi, blong yumi givgivhan long yumi blong yumi lavem ol narafala, mo blong yumi mekem ol gudfala wok. Yumi no mas les blong kam wanples long ol miting blong yumi.”—Hibru 10:24, 25.

 ?I minim wanem? Bigfala risen from wanem yumi go long ol miting, hemia blong wosipim Jehova. Be i gat tu moa gudfala samting we i save kamaot. Faswan, ol brata mo sista oli leftemap tingting blong yu. Sekenwan, taem yu joen mo ansa long miting, yu yu leftemap tingting blong olgeta.—Rom 1:11, 12.

 Samting we yu save ekspektem: Samtaem, long miting, tingting blong yu i save flae olbaot, nao yu mestem sam impoten poen. Sipos no, maet yu no moa go long evri miting, o yu mekem sam narafala wok olsem skulwok blong yu, long taem we yu sud go long miting.

 Samting we yu save mekem: I tru se yu no mas fogetem skulwok blong yu, be yu mas mekem desisen tu blong go long ol miting mo traehad blong lanem plante samting from. Blong joen long ol miting, yu save leftemap han blong yu blong givim ansa. Afta long miting, talem gudfala toktok long wan brata o sista from haf we hem i mekem long miting.

 Traem hemia: Rerem miting bifo we yu go. Daonlodem app ya JW Laebri®, mo klik long “Ol Miting” blong luk program blong evri miting.

 Samting blong halpem yu moa

•   Ridim:

   “Why Go to Christian Meetings?”