Maet yu harem se yu no wantem go long skul from we ol tija oli strik tumas, ol fren long skul oli pulum yu blong mekem sam samting we i no stret, yu stres from ol eksam, mo i gat tumas homwok. Yes, i gat plante risen we i save mekem se yu no laekem nating blong go long skul. Wan yangfala gel we nem blong hem Rejel a i talem se:

 “Mi glad moa blong stap long eni narafala ples, be i no long skul. Mi glad moa blong go swimswim long solwota, joen wetem ol fren blong mi, o iven givhan long papa mo mama blong mi blong kuk o klinap long haos.”

 Maet yu gat sem tingting olsem Rejel, mo yu harem se skul i olsem wan kalabus we yu mas fosem yu nomo blong stap long hem go kasem taem we yu graduet. ?Wanem i save givhan long yu blong yu glad blong go long skul?

 ?Yu yu save? Sipos yu tingbaot se skul i wan gudfala samting we i save givhan long yu, bambae yu no moa harem se yu stap fosem yu nomo blong go long skul. Skul i save tijim yu long ol save we bambae yu nidim taem yu kam bigman.

 Bambae yu glad moa blong go long skul sipos yu tingbaot ol fofala samting ya:

 Edukesen blong yu. Ol save we yu lanem long skul bambae i givhan long yu long fiuja, olsem taem yu wok mo taem yu mekem ol narafala samting. Hemia bambae i mekem se yu no nid blong dipen oltaem long ol narafala. Taswe, nating se i gat sam samting we yu no laekem long skul, be i gud yu askem yu wan se: ‘?Save we mi kasem long skul bambae i givhan long mi olsem wanem?’

 Advaes blong Baebol: “Yu mas holemgud waestok we i wok gud, mo fasin blong yusum gud tingting.”—Ol Proveb 3:21.

 Ol fasin blong yu. Skul i tijim yu blong gat wan gudfala program, from yu mas yusum gud taem blong yu, bos long tingting blong yu, mo wok had. Hemia ol fasin we bambae yu nidim taem yu kam bigman. Askem yu wan se: ‘?Olsem wanem skul i givhan long mi blong bos long ol fasin blong mi mo kam wan man we i wok had? ?Wanem ol samting we mi save mekem blong kamgud moa?’

 Advaes blong Baebol: “Taem man i wok had long enikaen wok, gudfala samting i kamaot from.”—Ol Proveb 14:23.

 Joen gud wetem ol narafala. Taem yu joen wetem ol narafala studen blong mekem sam samting tugeta, hemia i save halpem yu blong kasemsave filing blong ol narafala mo respektem olgeta. Wan yangfala we nem blong hem Josua i talem se: “I impoten we yu lanem blong storian gud wetem ol narafala, sem mak olsem we i impoten blong lanem histri mo sayens. Fasin ya bambae i givhan long yu long ful laef blong yu.” Askem yu wan se: ‘?Olsem wanem skul i givhan long mi blong joen gud wetem ol narafala we oli blong ol defren ples o we bilif blong olgeta i defren?’

 Advaes blong Baebol: “Yufala i mas traehad blong gat pis wetem olgeta man.”—Hibru 12:14.

 Fiuja blong yu. Skul i save halpem yu blong luksave samting we yu gat gudhan blong mekem, mo gat wan gudfala plan blong fiuja blong yu. Wan gel we nem blong hem Brooke i talem se: “Long skul, yu save kasem trening blong mekem wan wok. Hemia nao samting we mi bin mekem. Nao afta we yu graduet, bambae yu naf blong faenem wan wok.” Askem yu wan se: ‘?Wanem wok we mi save mekem afta we mi finis skul? ?Wanem ol klas we mi save tekem blong trenem mi from wok ya?’

 Advaes blong Baebol: “Yu mas mekem gudfala plan fastaem, long ol samting we yu wantem mekem.”—Ol Proveb 4:26, Baebol Long Bislama.