!Nogat!

 Trutok: Plante taem, ol filing olsem oli stap blong smoltaem nomo.

 Liset, we i gat 16 yia, i luk se samting ya i tru, taem hem i gat filing long wan narafala gel blong smoltaem. Hem i se: “Taem mi stadi long baeoloji long skul, mi lanem se long yangtaem, ol homon long bodi oli olbaot. Mi ting se sipos ol yangfala oli save moa long saed blong bodi blong olgeta, bambae oli kasemsave se filing we man i save gat long man o woman i save gat long woman maet oli stap blong smoltaem nomo. Olsem nao, bambae oli no harem se oli mas folem fasin blong homoseksuol.”

 ?Be olsem wanem sipos yu luk se ol filing ya oli stap longtaem? ?I stret blong God i talem long man we i gat filing long man o woman we i gat filing long woman, se i no mas mekem fasin blong homoseksuol?

 Sipos yu talem ‘no’ long kwestin ya, i gud yu tingbaot se tingting blong yu i stanap long wan rong bilif, se ol man mo woman oli mas folem ol filing blong olgeta. Baebol i soemaot se man mo woman i save jus blong no folem ol filing blong seks we oli no stret, mo fasin ya blong jus i leftemap olgeta.—Kolosi 3:5.

 Baebol i no mekem i strong tumas long yumi. Hem i putum sem rul long ol man we oli gat filing long man mo ol woman we oli gat filing long woman, olsem i putum long ol man we oli gat filing long woman. Rul ya hemia se oli “mas ronwe long enikaen doti fasin blong seks.” (1 Korin 6:18) Plante milian man we oli gat filing long woman mo woman we oli gat filing long man, olgeta tu oli mas bos long ol filing blong olgeta, blong obei long ol rul blong Baebol. Man we i gat filing long man mo woman we i gat filing long woman i save mekem sem mak, sipos oli rili wantem mekem God i glad.—Dutronome 30:19.