Promes blong ol vejin, hemia wan promes we oli raetem o talem, blong oli no mekem seks bifo long mared.

 Promes blong ol vejin i kam popiula long ol yia 1990, taem Southern Baptist Convention long Yunaeted Stet i statem wan program we oli kolem “Tru Lav i Stap Wet.” Program ya i joenem ol rul blong Baebol wetem gudfala toktok blong sam yangfala, blong pulum ol nara yangfala blong oli no mekem seks bifo long mared.

 Long wan narafala program we i stat smoltaem biaen, oli givim wan silva ring long ol yangfala ya blong soemaot promes ya mo rimaenem olgeta.

 Samting ya i dipen long man we yu askem.

•   Risej blong Christine C. Kim mo Robert Rector “i soemaot se promes blong ol vejin i daonem namba blong ol yangfala we oli mekem seks bifo long mared, o i pulum ol yangfala blong oli no hariap blong mekem seks taem oli kam tineja.”

•   Be risej blong Guttmacher Institut i soemaot se “ol tineja we oli mekem ‘promes blong ol vejin,’ oli mekem seks bifo long mared olsem ol narafala we oli no mekem promes ya.”

 ?From wanem tufala risej ya i soemaot defdefren samting?

 Hemia from we ol yangfala long stadi ya oli gat defdefren tingting long saed blong seks. Sam long olgeta oli ting se i impoten blong no mekem seks bifo long mared, be sam oli no kea.

 Dokta Janet Rosenbaum we hem i stadi long helt blong ol yangfala, i talem se afta we faef yia i pas, “olgeta we oli mekem promes ya mo olgeta we oli no mekem, oli gat sem fasin nomo long saed blong seks.”

  I tru, olgeta we oli stanemap ol program olsem promes blong ol vejin, oli gat gudfala tingting. Be bigfala problem se, oli no tijim ol yangfala from wanem gudfala fasin ya i impoten. From samting ya, ol yangfala oli no naf blong holem promes ya. Dokta Rosenbaum i talem se promes blong ol vejin “i no kamaot long hat blong [plante yangfala]. Oli mas mekem gudfala fasin ya from we oli bilif strong long hem, be i no from we oli joen long wan program.”

 Baebol i agri se gudfala fasin i no kamaot from we ol man oli raetem o talem wan promes, be from we oli gat strong bilif long saed ya. Blong kasem bilif ya, oli mas “trenem tingting blong olgeta blong luksave samting we i stret mo samting we i rong.” (Hibru 5:14) Tingbaot se, fasin ya blong no mekem seks bifo long mared i no blong blokem sik nomo o blong woman i no gat bel, be hem i blong ona long Krieta blong mared.—Matiu 5:19; 19:4-6.

 Ol rul blong Baebol oli mekem i gud long yumi. (Aesea 48:17) Yes, olgeta man, nomata se oli gat hamas yia, oli naf blong wokem strong tingting blong obei long loa blong God, se yumi mas “ronwe long enikaen doti fasin blong seks.” (1 Korin 6:18) Nao taem oli mared, oli save harem gud fulwan long seks insaed long mared, we oli no gat ol rigret mo wari from rabis frut we i kamaot, taem oli mekem seks bifo long mared.