I gat plante defren kaen sik we man i save kasem.

•   Samtaem yumi save luk se man i gat wan sik, be samtaem sik i stap haed insaed long bodi.

•   Sam sik oli stap smoltaem nomo, sam narawan oli stap longtaem mo mekem man i harem nogud evri dei.

•   Sam sik oli save kamgud o man i save laef wetem, be sam narafala sik oli spolem laef blong man sloslo, o maet oli tekemaot laef blong hem.

 Ol yangfala tu oli kasem olkaen sik ya we yumi jes tokbaot. Long atikol ya, bambae yu ridim stori blong fo long olgeta. Sipos yu tu yu gat wan sik, maet ol toktok blong olgeta i leftemap tingting blong yu.

•  GEINAEL

•  SAKERI

•  ANEAS

•  JULIANA

 Samting we i had moa long mi, i blong akseptem se mi no save mekem plante samting. Mi wantem mekem, be evri dei mi mas jenisim sam samting blong gohed blong laef wetem sik blong mi.

 Mi gat wan sik we i mekem se bren i no save pasem infomesen i go long bodi blong mi. Samtaem ol defren haf blong bodi, stat long hed go kasem leg daon, oli seksek o oli ded. I had blong mi mekem ol samting we ol narafala oli faenem i isi nomo, olsem muvmuv, toktok, rid, raet, mo kasem save long narafala. Taem ol samting oli kam had tumas, ol elda long kongregesen oli prea wetem mi. Nao wantaem nomo tingting blong mi i kam kwaet.

 Nomata wanem samting i traem mi, mi harem se Jehova God i stap oltaem blong givhan long mi. Mi no wantem se sik blong mi i blokem mi, blong mi no save mekem wok blong hem fulwan. Samting we i impoten long mi, i blong halpem ol narafala blong kasem save long promes blong Baebol se i no longtaem, Jehova bambae i mekem wol i kam paradaes, nao bambae yumi no moa safa.—Revelesen 21:1-4.

  Blong tingbaot: ?Olsem wanem yu save folem fasin blong Geinael blong soemaot sore long ol narafala?—1 Korin 10:24.

 Taem mi gat 16 yia, ol dokta oli faenemaot se mi gat kansa blong bren we i stap spolem mi kwiktaem. Oli talem se long eit manis bambae mi ded. Stat long taem ya, mi faet strong blong stap laef.

 From ples we kansa i stap long hem, raet saed bodi blong mi i ded. Mi no save wokbaot, taswe wan man i mas stap oltaem long haos blong givhan long mi.

 Sik ya i kam strong moa, mekem se naoia i had blong mi toktok klia. Bifo, mi stap muvmuv oltaem, mo mi laekem ol spot olsem basketbol mo volibol. Mo from we mi wan Witnes blong Jehova, oltaem mi bin joen wetem ol narafala blong mekem Kristin wok blong prij. Mi ting se bighaf blong ol man oli no kasem save se i olsem wanem, taem yu no moa naf blong mekem ol samting we yu laekem tumas.

 Ol tok blong Aesea 57:15 i leftemap tingting blong mi, from we i talem se Jehova God i stap wetem olgeta we oli “harem nogud tumas,” mo hem i tingbaot mi. Mo tu, long Aesea 35:6 Jehova i promes se helt blong mi bambae i kamgud fulwan, mo bambae mi save wokbaot bakegen blong mekem wok blong hem.

 Nating se plante taem sik ya i mekem laef blong mi i had tumas, be mi mi sua se Jehova i stap sapotem mi. Taem tingting blong mi i foldaon o mi fraet se bambae mi ded, mi toktok long hem long prea. I no gat wan samting i save seraotem mi long lav blong Jehova.—Rom 8:39.

 Tu manis afta we Sakeri i talem ol tok ya mo i gat 18 yia, hem i ded. Go kasem we hem i ded, hem i gat strong bilif long promes blong God se bambae hem i laef bakegen long paradaes long wol.

Blong tingbaot: ?Olsem wanem prea i save halpem yu, olsem i halpem Sakeri, blong i no gat wan samting i save seraotem yu long lav blong God?

 Sam dei afta we mi mi bon, blad i ron long bren blong mi, mekem se mi gat wan disabiliti we i spolem ful bodi blong mi, speseli tufala leg blong mi.

 Naoia, mi save wokbaot smol nomo wetem wokingstik, be klosap oltaem mi nidim wiljea. Mo tu, samtaem ol masel blong mi oli kam taet tumas, taswe i had blong mi mekem wan samting o yusum han blong mi blong mekem samting olsem raeting.

 Antap long stres we mi gat from sik blong mi, tritmen tu i had. Longtaem finis i kam, mi stap joen long wan program blong mekem eksasaes plante taem long wan wik. Taem mi gat faef yia, oli mekem faswan bigfala operesen long mi, mo mi gat tri bakegen afta long taem ya. Tufala laswan ya i had tumas from we i tekem tri manis blong mi kamgud, bifo we mi save kamhom.

 Famle blong mi i givhan bigwan long mi. Mifala i laflaf tugeta, mo hemia i givhan long mi bigwan taem tingting i foldaon. Mama blong mi mo tufala sista blong mi oli mekem mi mi luk naes, from we mi no naf blong mekem samting ya mi wan. Mi sore tumas we mi no save werem ol sus we oli haehil. Be mi mekem wan taem long laef blong mi, hemia taem mi mi smol, mo mi kalkal wetem sus long tufala han blong mi. !Mifala evriwan i laf gud!

 Mi traehad blong no letem sik blong mi i kam bigfala samting long laef blong mi. Mi stap lanem sam narafala lanwis. Nating se mi no moa save sefing o ron long sketbod, be mi save swimswim, mo hemia i mekem mi mi harem gud. Mi wan Witnes blong Jehova, mo mi laekem blong go prij mo serem bilif blong mi wetem ol narafala. Mi luk se ol man oli lesin gud taem mi toktok long olgeta.

 Taem mi mi smol, Papa mo Mama i tijim mi se sik ya i blong smoltaem nomo. Stat long taem ya, mi mi wokem prapa bilif blong mi long Jehova mo promes blong hem blong finisim ol trabol we i mekem yumi safa, hemia sik blong mi tu. Samting ya i mekem se mi gat paoa blong gohed.—Revelesen 21:3, 4.

Blong tingbaot: ?Olsem wanem yu save folem fasin blong Aneas blong no letem sik blong yu i kam “bigfala samting” long laef blong yu?

 Mi gat sik ya lupus, from samting ya bodi i soa oltaem. Sik ya i save spolem hat mo blad mo mekem se mi no moa save pulum gud win. Hem i stat finis blong spolem kidni blong mi.

 Taem mi gat ten yia, ol dokta oli faenemaot se mi gat sik ya lupus, hemia wan sik we i mekem se bodi i soa, mi taed, mo filing ya blong harem gud i save jenis kwiktaem. Samtaem mi harem se mi gud blong nating nomo.

 Taem mi gat 13 yia, wan Witnes blong Jehova i kam long haos blong mifala mo i ridim Aesea 41:10, we Jehova God i talem se: “Yu no mas fraet, from we mi mi stap wetem yu. . . . Bambae mi holemtaet yu long raethan blong mi we i blong stret fasin.” Mi stat blong stadi Baebol wetem ol Witnes blong Jehova, hemia eit yia i pas. Tede, mi wosipim God wetem fulhat blong mi, mo mi gat strong tingting blong no letem sik i bos long laef blong mi. Mi luk se Jehova i givim “paoa ya we i bigwan bitim mak,” blong mi save holem positif tingting.—2 Korin 4:7.

Blong tingbaot: ?Olsem wanem Aesea 41:10 i save halpem yu blong holem positif tingting, olsem Juliana?