•   ?Yu harem olsem wanem taem narafala i swea?

  •  I nomol long mi, i olsem ol narafala tok.

  •  Mi no laekem tumas, be i olsem nao.

  •  Mi no laekem nating, mo mi no save lan long hem.

•   ?Yu yu stap swea?

  •  Neva

  •  Sam samtaem

  •  Plante taem

•   Long tingting blong yu, ?problem blong tok swea i impoten?

  •  No, i no impoten

  •  Yes, i impoten tumas

?Yu yu tingbaot tok swea olsem wan bigfala problem? Maet yu talem se, ‘Nogat, i gat plante narafala problem long wol we oli bigwan moa. Mo tu, !evriwan oli tok swea!’ ?Be hemia i tru?

 Maet yu no save se i gat plante man long wol we oli no stap tok swea. Oli gat ol gudfala risen blong no swea, we ol narafala oli no stap tingbaot, olsem:

•  Problem ya i no long saed blong ol toktok nomo. Ol toktok blong yu i soemaot wanem i stap long hat blong yu. Taswe, taem yu tok swea, yu soemaot se yu no tinghae long filing blong narafala. ?Yu yu kaen man olsem?

   Baebol i talem se: “Samting we i kamaot long maot blong man, hem i kamaot long hat blong hem fastaem.”—Matiu 15:18.

•  Taem yu swea, ol narafala oli save tingting nogud long yu. Buk ya Cuss Control i talem se: “Plante samting i dipen long toktok blong yumi, olsem: ?Hu bambae i kam fren blong yumi? ?Ol famle mo olgeta we oli wok wetem yumi, bambae oli respektem yumi? ?Yumi fren gud wetem ol narafala? ?Yumi gat paoa long tingting blong ol narafala? ?Bambae yumi kasem niufala wok ya mo gudfala pei? ?Ol strenja oli tingting olsem wanem long yumi?” Buk ya i talem tu se: “Sipos yu no swea, ?yu ting se ol narafala bambae oli glad moa blong fren wetem yu?”

   Baebol i talem se: “Yufala i mas tekemaot . . . ol rabis tok.”—Efesas 4:31.

•  Taem yu tok swea, maet yu ting se yu taf, be i no olsem. Dokta Alex Packer i talem long buk blong hem (How Rude!) se: “Taem wan man i swea oltaem, yumi kam taed blong lesin long hem.” Hem i talem tu se man we i swea oltaem, “i had blong hem i soemaot se hem i waes, i fani, i gat hed, mo i kasem save long filing blong ol narafala. Sipos toktok blong yu i olbaot, i no klia, mo i boring, bambae tingting blong yu i sem mak.”

   Baebol i talem se: “Long ol toktok blong yufala, yufala i no mas talem ol tok we oli roten.”—Efesas 4:29.

•  Traehad blong kasem wan mak. ?Olsem wanem sipos yu traem sakemaot ol tok swea long wan manis? Yu save makem long kalenda se yu stap gohed olsem wanem. Be blong winim fulwan, maet yu mas mekem sam moa samting, olsem:

•  No joen long ol pleplei we oli fulumap tingting blong yu long ol tok swea. Baebol i talem se: “Ol rabis fren oli save spolem ol gudfala fasin.” (1 Korin 15:33) ‘Ol fren’ i no minim ol man nomo be i minim ol pleplei tu: ol muvi we yu wajem, ol video gem we yu plei, mo ol miusik we yu lesin long hem. Kenat we i gat 17 yia, i talem se: “I isi nomo blong singim wan sing we yu laekem from we i gat wan gudfala bit, be yu no tingbaot se i gat ol tok swea insaed.”

•  Soemaot se yu bigman long tingting blong yu. Samfala oli tok swea from we oli ting se i soemaot se oli bigman finis, be samting ya i no tru. Baebol i talem se olgeta we oli bigman long tingting blong olgeta, “oli trenem tingting blong olgeta blong luksave samting we i stret mo samting we i rong.” (Hibru 5:14) Oli no lego gudfala fasin we oli folem, blong pulum ol narafala blong laekem olgeta.

 Blong talem stret, tok swea i save mekem tingting i kam doti, mo i save mekem sem mak long tingting blong ol narafala we oli harem tok ya. !I gat tumas man olsem finis long wol ya! Buk ya Cuss Control i talem se: “Yu no ademap moa doti tok long olgeta we i stap finis. Mekem wok blong yu blong klinimaot ol doti tok. Bambae yu glad moa long yu wan, mo ol narafala tu bambae oli glad long yu.”