Sipos yu gat wan plan blong halpem yu blong traem winim, hemia i save mekem se yu harem gud moa.

•  ?Yu bambae yu mekem wanem?

•  ?Olsem wanem sipos i wan sik?

•  Plan blong ol samting we yu save mekem blong kamgud bakegen

•  Ol vas blong Baebol we oli save halpem yu

 Tingbaot samting we i stap hapen long Jennifer mo Mark:

 I no gat wan samting we i save mekem Jennifer i glad. Evri dei, hem i stap krae blong nating nomo. Hem i no wantem toktok long ol narafala, mo i no wantem kakae. Hem i no slip gud, mo i had blong hem i putum tingting blong hem i stap strong long wan samting. Jennifer i stap askem se: ‘?Wanem i stap hapen long mi? ?Bambae mi kamgud bakegen samtaem?’

 Bifo, Mark i wan nambawan studen. Be naoia, hem i no moa laekem skul, mo ol mak blong hem oli stap godaon. Hem i no moa gat paoa blong plei spot we hem i laekem bifo. Ol fren blong hem oli no save from wanem hem i olsem. Papa mo mama blong hem i wari. ?Hemia wan samting we i hapen long hem blong smoltaem, o i wan bigfala trabol?

 ?Olsem wanem? ?Yu tu yu harem olsem Jennifer o Mark? Sipos yes, ?yu save mekem wanem? Yu save traem tufala samting ya:

1.   Traem winim yu wan

2.   Tokbaot wetem wan bigman we yu trastem hem

 Maet yu wantem jusum A, antap moa sipos yu no wantem toktok. ?Be hemia i waes? Baebol I talem se: “Tu man i gud moa i bitim wan man nomo . . . From we sipos wan long tufala i foldaon, narawan i save halpem narawan blong i stanap. ?Be wanem bambae i hapen long man we i foldaon be i no gat narawan blong givhan long hem?”—Prija 4:9, 10.

 Tingbaot sipos yu yu lusum rod blong yu long wan ples we i gat plante rabis man oli stap wokbaot long hem. Ples i tudak, mo i gat ol man we yu no save olgeta oli stap wokbaot olbaot. ?Bambae yu mekem wanem? Yu save traem blong faenem stret rod yu wan. Be i waes moa sipos yu askem long wan man we yu trastem hem.

 Filing we yu kasem taem tingting blong yu i foldaon i olsem eria ya we i denja. I tru, sam samtaem maet yu kasem filing ya mo i stap blong smoltaem nomo. Be sipos tingting blong yu i foldaon blong longtaem, i gud yu askem help long narafala.

 ADVAES BLONG BAEBOL: “Man we i stap hem wan oltaem . . . i sakemaot olgeta waestok we i wok gud.”—Ol Proveb 18:1.

 I moagud yu jusum B mo yu toktok long papa o mama blong yu o wan narafala bigman we yu trastem hem, from we olgeta oli lanem finis blong winim ol filing olsem, mo oli save givhan long yu blong mekem sem mak.

 Maet yu talem se: ‘Papa mo mama blong mi i no kasem save long ol filing blong mi, tufala i neva kasem problem ya.’ ? Be yu yu sua long samting ya? Nating se tufala i fesem defren samting taem tufala i yangfala, be maet filing blong tufala i sem mak long filing blong yu. Mo maet tufala i save wan rod blong winim.

 ADVAES BLONG BAEBOL: “?Yu no ting se waes i stap wetem ol olfala mo fasin blong kasemsave samting i joen wetem longfala laef?”—Job 12:12.

 Bigfala poen hemia: Sipos yu tokbaot filing blong yu wetem papa o mama blong yu o wan narafala bigman we yu trastem, ating bambae yu kasem advaes we i wok gud.

 Sipos yu harem nogud evri dei, maet yu gat sik ya we tingting i foldaon olgeta, mo yu nidim meresin we dokta i givim.

 Taem tingting i foldaon, maet hemia klosap sem mak long filing we ol yangfala oli kasem, taem oli gotru long ol jenis long yangtaem blong olgeta. Be naoia i strong moa, mo i stap kam oltaem. Taswe sipos yu harem nogud tumas mo filing ya i stap longtaem, i gud yu askem long papa mo mama blong yu blong tekem yu yu go luk wan dokta.

 ADVAES BLONG BAEBOL: “Ol man we oli no sik, oli no nidim dokta, be olgeta we oli sik, yes, oli nidim.”—Matiu 9:12.

 Sipos dokta i faenemaot se yu gat sik ya we tingting i foldaon olgeta, i no nid blong yu sem from. Plante yangfala oli kasem sik ya, mo i gat meresin blong hem. Ol gudfala fren blong yu bambae oli no daonem yu from.

 Advaes: Yu mas gat longfala tingting. Taem tingting i foldaon olgeta, i tekem taem blong kamgud bakegen, taswe yu mas save se samtaem bambae yu harem gud mo samtaem bambae yu harem nogud. a

 Nating se yu nidim meresin we dokta i givim o nogat, i gat sam samting we yu wan yu save mekem blong winim filing ya blong harem nogud oltaem. Yu save wokbaot plante mo mekem eksesaes, kakae gud, mo kasem naf slip blong mekem se filing blong yu i no olbaot. (Prija 4:6; 1 Timoti 4:8, futnot) Maet yu faenem i gud blong raetemdaon ol filing blong yu, ol mak we yu wantem kasem blong kamgud, ol samting we i hapen blong mekem tingting i foldaon, mo ol taem we yu winim.

 Nating se yu gat wan sik we i mekem tingting i foldaon o yu stap pastru long wan hadtaem nomo, tingbaot hemia: Sipos yu letem narafala i halpem yu, mo yu mekem sam samting yu wan blong traem winim problem ya, bambae yu yu naf blong stanap strong.

•  “Jehova i stap klosap long olgeta we hat blong olgeta i brok, hem i sevem olgeta we tingting blong olgeta i foldaon.”—Ol Sam 34:18.

•  “Yu sakem ol hevi baden blong yu long Jehova, mo hem bambae i sapotem yu. Bambae hem i neva letem wan stret man i foldaon.”—Ol Sam 55:22.

•  “Mi, Jehova God blong yu, mi stap holem raethan blong yu, mi nao mi stap talem long yu se: ‘Yu no fraet. Mi bambae mi halpem yu.’”—Aesea 41:13.

•  “Yufala i no mas wari tumas from ol samting blong tumoro.”—Matiu 6:34.

•  “Yufala i mas askem olgeta samting we yufala i wantem long God . . . [nao] pis ya blong God we i bigwan tumas i bitim olgeta save blong yumi, bambae i lukaot gud long hat mo tingting blong yufala.”—Filipae 4:6, 7.