Wan ripot blong Centers for Disease Control and Prevention long Yunaeted Stet, i talem se taem oli askem kwestin long ol yangfala we oli gat 15 kasem 19 yia, samwe long stret haf blong olgeta oli talem se oli bin yusum maot long seks. Buk ya Oral Sex Is the New Goodnight Kiss we Sharlene Azam i raetem, i talem se: “Sipos yu tokbaot [yusum maot long seks] wetem ol yangfala, bambae oli talem se i nomol nomo. Blong talem stret, oli no ting se i seks.”

•  ?Wanem tingting blong yu?

•  ?Wanem i tru?

•  ?From wanem i impoten?

 Ansa yes o no long ol kwestin ya.

1.   ?Wan gel i save gat bel from we i yusum maot long seks?

   1.   Yes

   2.   Nogat

2.   ?Yusum maot long seks i save givim sik?

   1.   Yes

   2.   Nogat

3.   Yusum maot long seks, ?hemia i rili seks?

   1.   Yes

   2.   Nogat

 Skelem ol ansa blong yu wetem olgeta daon.

1.   ?Wan gel i save gat bel from we i yusum maot long seks?

    Ansa: Nogat. Hemia wan risen from wanem plante man oli gat rong tingting se fasin ya i oraet nomo.

2.   ?Yusum maot long seks i save givim sik?

    Ansa: Yes. Wan we i mekem fasin ya, i save kasem sik ya hepataetas (A o B), ol lam long tabu ples long bodi, gonorrhea, ol soa long tabu ples long bodi, HIV, mo syphilis.

3.   Yusum maot long seks, ?hemia i rili seks?

    Ansa: Yes. Seks i minim eni fasin we man i mekem long tabu haf blong bodi blong narafala, olsem nomol rod blong mekem seks, yusum maot long seks, yusum as blong mekem seks, mo pleplei wetem tabu haf blong bodi blong narafala.

 Tingbaot sam vas blong Baebol long saed blong topik ya.

 Baebol i talem se: “Wil blong God hemia se: . . . yufala i no mas mekem enikaen doti fasin blong seks.”—1 Tesalonaeka 4:3.

 Long olfala lanwis, tok ya we i minim “doti fasin blong seks” i save minim olkaen fasin blong seks afsaed long mared, hemia nomol rod blong mekem seks, yusum maot long seks, yusum as blong mekem seks, mo pleplei wetem tabu haf blong bodi blong narafala. Wan man we i mekem ol doti fasin blong seks, i save kasem ol rabis frut, hemia we i moa nogud se hem i no moa frengud wetem God.—1 Pita 3:12.

 Baebol i talem se: “Man we i mekem enikaen doti fasin blong seks, hem i mekem sin agensem prapa bodi blong hem.”—1 Korin 6:18.

 Yusum maot long seks i save spolem bodi mo fasin fren blong yumi wetem God, mo i save spolem filing blong yumi tu. Buk ya Talking Sex With Your Kids i talem se: “I no nomol rod blong mekem seks nomo we i save mekem yu yu harem se narafala i stap yusum yu, yu rigret, o yu wik. Ol nogud filing we yu save kasem taem yu mekem seks long nomol wei be afsaed long mared, yu save kasem tu, taem yu mekem enikaen doti fasin blong seks. Enikaen seks hem i seks.”

 Baebol i talem se: “Mi Jehova, mi God blong yufala, mi nao mi stap tijim yufala blong givhan long yufala.”—Aesea 48:17.

 ?Yu yu bilif se ol loa blong God long saed blong seks oli save givhan long yu? ?O yu ting se oli blokem yu tumas? Blong ansa long ol kwestin ya, tingbaot wan bisi rod, we i gat ol saen long hem blong makem stret spid blong ron long trak mo ol stop saen. ?Yu yu ting se ol saen ya oli blokem yu tumas o oli protektem yu? ?Wanem bambae i hapen sipos yu mo ol narafala draeva i no obei long ol saen ya?

 Long sem fasin, sipos yu no obei long ol loa blong God, bambae yu kasem rabis frut blong sid we yu planem. (Galesia 6:7) Buk ya Sex Smart i talem se: “Sipos yu sakemaot ol bilif blong yu mo ol rul blong stret fasin we yu stap folem, blong joen long ol fasin we oli no stret long tingting blong yu, bambae yu no respektem yu wan.” Be sipos yu folem ol loa blong God, bambae yu soemaot se yu rili gat gudfala fasin. Antap long hemia, bambae tingting blong yu i no stikim yu.—1 Pita 3:16.