Long Japan, i gat wan kaen frog we oli stap long ol wud, mo oli stap krae bakegen mo bakegen. Maet yumi save ting se ol frog ya oli stap krae olbaot nomo. Be ol woman frog oli save haremsave wanwan long olgeta, nating se plante oli krae long semtaem. Long Japan, ol man we oli stadi long ol frog ya, oli faenemaot se ol man frog oli gat wan spesel wei blong krae, blong ol woman frog oli haremsave wanwan long olgeta.

 Tingbaot: Ol man frog ya oli krae blong pulum ol woman frog. Saon blong krae we oli mekem i kamaot long ol string long trot blong olgeta. Taem oli krae, trot blong olgeta i solap, mo hemia i mekem se krae blong olgeta i laod moa.

 Taem plante long ol man frog ya oli krae long semtaem, ?olsem wanem ol woman frog oli haremsave krae blong wanwan long olgeta? Ol man blong mekem risej oli faenemaot se ol frog ya oli no stap krae olbaot, be wanwan long olgeta i gat prapa taem blong hem. Oli krae wan afta narawan, nao voes blong wanwan long olgeta i kamaot klia mo oli no yusum tumas paoa. Mo tu, taem oli folem rod ya we oli krae wan afta narawan, hemia i mekem se oli gat taem blong spel smol go kasem taem blong olgeta blong krae bakegen.

 Fasin ya we ol frog ya wanwan oli gat prapa taem blong olgeta blong krae, i pulum ol man we oli stadi long intenet mo ol narafala samting olsem, blong oli traem faenem wan rod blong sanem ol save wan afta narawan, be i no evriwan long semtaem. Hemia bambae i mekem se intenet mo ol narafala samting olsem oli wok gud moa, mo i sevem paoa.

 ?Wanem tingting blong yu? ?Fasin blong ol frog ya long Japan blong krae folem oda, i kamaot olsem nomo, o i gat wan Man we i wokem samting ya?