Ma ne Avbe Osẹe Jehova keghi gu emwa ni rre ugamwẹ ughughan guan vbekpa ẹmwẹ nọ rre Baibol sokpan, ma i deba emwa iyayi ọvbehe mwẹ obọ vbe ugamwẹ. E Baibol rhiẹre ma wẹẹ, te Ivbiotu e Kristi ọghe ẹmwata ru emwi “kugbe,” odẹ ọkpa kpataki ne iran ya rhiẹre ma ighẹ iran mwẹ akugbe, ọre ne iran na mwẹ iyayi ọkpa. (Ẹfisọs 4:16; 1 Kọrinti 1:10; Filipai 2:2) Ọna gberra na wa gha mwẹ akpa eso vbe na ghee ahoẹmwọmwa, ẹnina kevbe ekhọe ayabọ. Sokpan, irẹnmwi nọ gbae nọ rre Baibol, ẹre iyayi ọghomwa hẹnhẹn egbe yan. Deghẹ ima i mwẹ irẹnmwi nọ gbae, ọ rhiema wẹẹ iyayi ọghe ima i mwẹ esa nọ ye.—Rom 10:2, 3.

 E Baibol rhan otọre wẹẹ, ọ ma khẹke ne ima gha deba emwa iyayi ọvbehe mwẹ obọ vbe ugamwẹ ọghe iran, rhunmwuda, ọna gha sẹtin gbe amuẹtinyan ọghe ima muotọ. (2 Kọrinti 6:14-17) Ọna ẹre ọ si ẹre ne Jesu ma na kue ne erhuanegbe ẹre deba emwa iyayi ọvbehe gha mwẹ obọ vbe ugamwẹ ọghe iran. (Matiu 12:30; Jọn 14:6) Erriọ vbe nọ, vbe ẹghẹ nẹdẹ Uhi e Mosis ma vbe kue yọ ne Ivbi Izrẹl deba avbe agbẹnvbo ni lẹga iran gha mwẹ obọ vbe ugamwẹ ọghe iran. (Ẹksodọs 34:11-14) Ẹghẹ eso ghi gberra, emwa eso na gha hoo ne iran do ru iyobọ ne Ivbi Izrẹl, sokpan Ivbi Izrẹl ma kue yọ rhunmwuda, ọna sẹtin ya iran gha mwẹ obọ vbe ugamwẹ ọvbehe.—Ẹzra 4:1-3.

 Ẹn. Vbe igiemwi, vbe ukpo 2023, ughaẹdẹ ne ima loo ro ya gha kporhu ma emwa ni rre ugamwẹ ọvbehe kegha re 1,791,490,713. Vbe na ghe Pọl, ma keghi hia ne ima rẹn otọ iziro kevbe iyayi ne “emwa nibun” mwẹ, vbe ima ghaa rre ikporhu. (1 Kọrinti 9:19-22) E Baibol tama ima wẹẹ, ọ khẹke ne ima gha mwẹ “ọghọ nọ dinmwi” ne emwa ọvbehe, ma keghi hia ne ima gha lele ibude na vbe ima ghaa gu emwa ziro.—1 Pita 3:15.