Avbe emwi na khian guan kaẹn na, ẹre ọ si ẹre ne Avbe Osẹe Jehova i na yo okuo:

1.   Te ima họn ẹmwẹ ne Osanobua. E Baibol wẹẹ eguọmwadia Osanobua gha ‘dunmwu umozo ọghe iran, ọ ghi do yevbe ẹguẹ’ kevbe wẹẹ, iran i khian ghi vbe “khọn okuo.”​—Aizaia 2:4.

2.   Te ima họn ẹmwẹ ne Jesu. E Jesu keghi tama ukọ e Pita wẹẹ: “Rhie umozo ruẹ ye ako ẹre, rhunmwuda, ọmwaikọmwa nọ tọn umozo mu, umozo ẹre a khian vbe ya gbe ẹre rua.” (Matiu 26:52) Emwi ne Jesu ya ọna kha ọre wẹẹ, ọ ma khẹke ne erhuanegbe ẹre tọn emwi igbinna mu wẹẹ iran rhie okuo.

    Erhuanegbe Jesu wa vbe lele uhi ọghe Jesu nọ khare wẹẹ, “iran i re ọghe agbọn na,” rhunmwuda ọni, iran i zẹdẹ mwẹ obọ vbe emwi ke emwi nọ ghi dekaẹn otu azẹ. (Jọn 17:16) Ma i gbodan ye emwi ne ivbiyokuo ru, ma i vbe gbodan ghee emwa ni deba ivbiyokuo.

3.   Ma hoẹmwẹ emwa ọvbehe. E Jesu keghi gbe uhi ne erhuanegbe ẹre ne iran “hoẹmwẹ egbe.” (Jọn 13:34, 35) Agharhemiẹn wẹẹ, ehe ughughan vbe agbọn na ẹre iran ke rre, etẹn ẹre iran khin, iran i khian vbe gu egbe khọn vbe okuo hiehie.​—1 Jọn 3:10-12.

4.   Igiemwi ọghe Ivbi Otu e Kristi nẹdẹ ẹre ima lele. Ebe na tie ẹre Encyclopedia of Religion and War khare wẹẹ: “Erhuanegbe Jesu ni ghaa rrọọ vbe ẹghẹ nẹdẹ ma gha mwẹ obọ vbe okuo, iran ma vbe deba ivbiyokuo,” iran ghee ẹre wẹẹ, “ọ gbodan ye imamwaemwi ọghe Jesu nọ dekaẹn ahoẹmwọmwa, kevbe iyi nọ yi nọ na wẹẹ, ne iran hoẹmwẹ eghian ọghe iran.” Deba ọni, okpia ọkpa ne ovbi e Germany, nọ rri egie ebe na tie ẹre Peter Meinhold ghi guan kaẹn erhuanegbe Jesu ni ghaa rrọọ vbe ẹghẹ nẹdẹ, ọ na wẹẹ: “Ọmwa i sẹtin gha re Ovbi Otu e Kristi nọ vbe gha re ovbiyokuo.”

 Emwa ni wa rẹn enegbe, ẹre Avbe Osẹe Jehova khin, iran i vbe si ẹti vbe ẹvbo ne iran ye. Ma keghi rhie ọghọ ne avbe arriọba, zẹvbe ne avbe ako ọghe Baibol na we ne ima gha ru ẹre:

•   “Ọ khẹke ne emwa hia gha họn ẹmwẹ ne emwa ni rre ukpo ọdakha.”​—Rom 13:1.

•   “Wa rhie emwi e Siza ne Siza, sokpan, wa ghi vbe rhie ọghe Osanobua ne Osanobua.”​—Matiu 22:21.

 Rhunmwuda ọni, ma keghi lele uhi, ma hae igho uhunmwu, ma vbe ku obọ gbe ba emwamwa arriọba ne iran ya kpemehe ne emwa ne iran kha yan.