U he tie ebe Owa Ọkhẹ ni da ladian ra? Hia ne u rhie ewanniẹn ye avbe inọta na:

De emwi enẹ ne ima gha ru ne ima mieke na gha so ihuan ẹse?

Te ọ khẹke ne ima mudia kpasi, ne ima tọn ebe ihuan ọghe ima mu. Ma ghi vbe gha hiọnrọn sẹ otọ ẹse. Ma ghi rhaan unu rua ne urhu ima mieke na gha la ladian vbe ima ghaa so ihuan.—w17.11, p. 5.

Vbọ ya ima gbọyẹmwẹ ye odẹ ne a la sẹ ẹvbo ne a lẹgbinna kevbe ehe ughughan ne iran ghaa ye vbe otọ Izrẹl?

Ẹvbo ehan ne a lẹgbinna ẹre ọ ghaa rre otọ Izrẹl. Te odẹ ne a la sẹ ehia wa gha maan, rhunmwuda ọni, ọmwa nọ da izigha ọyẹvbu nọ lẹ khian, ghi rherhe sẹ evba.—w17.11, ipapa 14.

De vbene Psalm 118:22 ya guan kaẹn arhiọkpaegbe ọghe Jesu hẹ?

Emwa nibun keghi he Jesu zẹvbe Mẹzaia, iran na vbe gbe ẹre rua. Sokpan ne Jesu mieke na gha re “okuta amamiẹn a i ru” te a gha huọn rẹn kpaegbe.—w17.12, ipapa 9-10.

Uniẹn ọmọ nọ mwẹ ukpo ọmọ ọdiọn ọkpa, ẹre Mẹzaia la rre ra?

Ẹi wa re uniẹn ọmọ ọdiọn ọkpa ẹre Mẹzaia la rre. Vbe ima ya rẹn hẹ? E Devid ma ghaa re ọmọdiọn sokpan uniẹn e Devid ẹre Mezaia la rre.—w17.12, ipapa 14-15.

Vbọzẹe nọ ma na de emwi nọ rhiae deghẹ ahoẹmwọmwa ne ima mwẹ ne egbe ima rre oreghe?

E Baibol gi ima rẹn wẹẹ, te ọ khẹke ne ima gha hoẹmwẹ ẹmwa ọvbehe zẹvbe ne ima hoẹmwẹ egbe ima. (Mak 12:31) E Baibol ye vbe kha wẹẹ: “Te ọ kere ne ikpia gha hoẹmwẹ amwẹ iran, zẹ vbene iran hoẹmwẹ ikinnegbe iran.” (Ẹfis 5:28) Ọna rhiẹre ma wẹẹ, ọ ma de emwi nọ rhiae deghẹ ima hoẹmwẹ egbe ima vbe odẹ nọ khẹke.—w18.01, ipapa 23.

De emwi nọ khẹke ne ima ru ne ima mieke na gha mwẹ alaghodaro vbe odẹ ọghe orhiọn?

Gha tie Baibol vbe ẹghẹ hia, u vbe gha ru erria yan emwi ne u tie. Rherhe gha rhie emwi ne u ruẹ ye uyinmwẹ. Gi orhiọn nọhuanrẹn ọghe Jehova gha dia ruẹ. Gha gbọyẹmwẹ ye ibude ne emwa ọvbehe rhie nuẹn.—w18.02, ipapa 26.

De vbene ima khian ya rhiẹre ma wẹẹ ima gbọyẹmwẹ yọ vbe ọtẹn gha gie na tie ima ne ima do guẹ rrie evbare?

Ọmwa gha gie na tie ruẹ, u na miẹn ọnrẹn yi, ghẹ gheghe fi ekhọe werriẹ. (Psm 15:4) U gha ru vberriọ, ẹrhiọn ne ọmwa nọ gie na tie ruẹ loo ro ghi dihoi rua.—w18.03, ipapa 18.

Ikpia ne a zẹ ye ukpo gha miẹn emwi ruẹ vbe obọ e Timoti

Obọ esi ẹre Timoti ya gha mu emwa hia. Iwinna ikporhu iyẹn nọ maan ẹre mu ye okaro vbe arrọọ ọghẹe. Ọ keghi rhiegba ye iwinna ugamwẹ, erriọ wa vbe ya gha rhie emwi ne ọ ruẹ ye uyinmwẹ. Ọ keghi tobọre gha ruẹ emwi sayọ. Orhiọn nọhuanrẹn ọghe Jehova ẹre ọ hẹnhẹn egbe yan. Ediọn vbe iko kevbe eguọmwadia iwinna gha miẹn emwi kpataki ruẹ vbe igiemwi esi ọghe Timoti.—w18.04, ipapa 13-14.