U he tie ebe Owa Ọkhẹ ni da ladian ra? Hia ne u rhie ewanniẹn ye avbe inọta na:

De vbene igiemwi kevbe imamwaemwi ọghe Jesu ya ru iyobọ ne ima ya sẹtin khọnmiotọ yan ikhuiwu?

Vbe ẹghẹ Jesu, te Ivbi e Ju nibun wa yayi wẹẹ, ẹvbo iran ẹre ọ maan sẹ ọghe emwa ọvbehe. Sokpan, Jesu keghi gbikhaẹn ye uyinmwẹ vberriọ. Ọ keghi gi erhuanegbe ẹre rẹn wẹẹ, ọ khẹke ne iran gha mu egbe rriotọ kevbe wẹẹ ne iran gha ghee egbe zẹvbe etẹn.—w18.06, ipapa 9-10.

Ne Jehova ma na kue ne Mozis lae Otọ Na Ru Eyan Rẹn, vbe ima miẹn ruẹ vbọ?

Ọsie Jehova ẹre Mozis ghaa khin. (Diut 34:10) Odẹ ukpo 40 ẹre Ivbi Izrẹl gbe vbe ato. Vbe iran khian ghi sẹ Otọ Na Ru Eyan Rẹn, iran na dọlegbe gha vian rhunmwuda ẹmwẹ amẹ ne iran ma miẹn wọn. Osanobua keghi tama e Mozis nọ gu okuta nọ ghaa rre Mẹriba nọ sikẹ Kedẹs guan. Sokpan, e Mozis ma ru vberriọ, ọ na ya ọkpọ re kinmwin okuta nii igbava. Ohu e Mozis na ghi kakabọ gha mu e Jehova. Ọ gha kẹ, emwi nọ ye Jehova mu ohu sẹrriọ, ọre ne Mozis ma na lele adia ne Jehova rhie nẹẹn. E Mozis ma vbe rhie ọghọ ne Jehova rhunmwuda, ẹmwẹ ne ọ tama Ivbi Izrẹl ma rhiẹre ma wẹẹ, e Jehova ẹre ọ ru emwi ọyunnuan nii. (Nọm 20:6-12) Ọna ya ima rẹn vbene ọ ru ekpataki sẹ hẹ na gha họn ẹmwẹ ne Jehova kevbe na gha rhie uyi nẹẹn.—w18.07, ipapa 13-14.

Ma ghaa ghee ikpanro buohiẹn, de emwi nọ kẹrikian?

Ma ghi do gha gbe ewanmwẹ ghee obọ ọkpa. Emwi eha nọ ya emwa yin uyinmwẹ vbenian ọre: otọ ẹvbo ne ọmwa ke rre ra urhuẹvbo ne ọ zẹ, vbene ọmwa mwẹ emwi ewe sẹ hẹ kevbe inu ukpo ne ọmwa ye. Ne ima mieke na sẹtin gban egbe ne uyinmwẹ vbenian, ọ khẹke ne ima gha ghee emwa vbene Jehova ghee iran. (Iwinna 10:34, 35)—w18.08, ipapa 8-12.

De odẹ eso ne etẹn ni khian eniwanrẹn nẹ ya ru iyobọ ne emwa ọvbehe?

Adeghẹ ọdiọn nọ khian enọwanrẹn nẹ, ne a ghi fi iwinna rẹn werriẹ vbe otu e Jehova ẹre u khin, e Jehova ye gbọyẹmwẹ ye iwinna ne u ru. U gha vbe sẹtin ru iyobọ ne emwa ọvbehe. U gha sẹtin ru iyobọ ne etẹn ne ọmwa ni iran gba ru orọnmwẹ i ga e Jehova kevbe etẹn ni worua vbe odẹ ọghe orhiọn. Ẹkpotọ vbe kie nuẹn, ne u ya ru sayọ vbe iwinna ikporhu iyẹn nọ maan.—w18.09, ipapa 8-11.

De Emadogua Ne Ima Ya Maa Emwa Emwi?

Ekadi nọ dia ọmwa lae wẹbsait ọghomwa, avbe ebe itie, asobọrrie erẹnrẹn, ebe Owa Ọkhẹ kevbe Awake!, ebe ẹmu, ebe eva ne a ya gu emwa tie e Baibol kevbe e vidio enẹ. Ọkpa vbe usun e vidio na ọre Vbọzẹe Ne A Gha Na Ruẹ E Baibol?—w18.10, ipapa 16.

De odẹ ne Ovbiotu e Kristi ya “ha osa” ye ẹmwata zẹ vbene ebe Itan 23:23 khare?

Agharhemiẹn wẹẹ ima i ha osa ye ẹmwata, ma keghi loo ẹghẹ kevbe ẹrhiọn, ne ima mieke na gha rre odẹ ọghe ẹmwata.—w18.11, ipapa 4.

Vbe ima miẹn ruẹ vbe obọ ne Hozia ya mu e Goma ne ọvbokhan rẹn?

Ẹi re avbiẹ inugba e Goma fi owẹ ye oha. Ọrheyerriọ, Hozia keghi yabọe, ọ ma sọ ebe orọnmwẹ. Ovbiotu e Kristi gha fi owẹ ye oha, ogieva re nọ ma rẹn ọkpa rẹn eva sẹtin yabọe. Iran gha ghi werriegbe suẹn gha ru emwi ọdọ vbe amwẹ, nọ ma fi owẹ ye oha i ghi mwẹ asẹ na ya sọ ebe orọnmwẹ.—w18.12, ipapa 13.