Hiehie. Esu ma kha wẹẹ Ivi gha rri ọmọ erhan nii, ikinnegbe ẹre gha wu vbene orhiọn ọnrẹn gha na kpa gha rrie ehe ọvbehe (ọna ẹre emwa eso vbe ẹdẹnẹrẹ tiẹre orhiọn nẹi wu). Sokpan Esu keghi loo ẹyẹn ya tama Ivi wẹẹ, ọ gha rri ọmọ erhan nii, ‘ẹi khian wu hiehie.’ Te Esu ya ọna kha wẹẹ, Ivi gha rri ọre, ọ ghi gha sọyẹnmwẹ arrọọ etẹbitẹ vbe uhunmwu otagbọn na, ọ ghi vbe gha ya emwi nọ rre ọre ekhọe ru emwi, vbene Osanobua i na gbe uhi nẹẹn.—Gẹn 2:17; 3:3-5.

Ugbẹnvbe a miẹn wẹẹ, ẹi re ogba ọghe Idẹni ẹre imamwaemwi ọghe orhiọn nẹi wu na suẹn, vbọ ghi ke rre? Ma ma wa rẹn. Emwi ne ima rẹnrẹn ọre wẹẹ, Okpamẹ nọ dae vbe ẹghẹ Noa keghi wabọ ugamwẹ ohoghe hia rua nọ ghaa rrọọ vbe ẹghẹ nii. Ugbẹnvbe a miẹn wẹẹ Noa vbe ẹgbẹe ọre ọkpa ni ya ẹkoata ga e Jehova ẹre ọ miẹn fan, ọ vẹ na rẹn wẹẹ, imamwaemwi ọghe ohoghe rhọkpa ma ghi gha rrọọ vbe ẹghẹ nii.

Rhunmwuda ọna, ọ khọ wẹẹ, vbe iyeke Okpamẹ nii ẹre imamwaemwi ọghe orhiọn nẹi wu ya suẹn. Osanobua ghi fi urhuẹvbo ọghe emwa nagbọn werriẹ vbe Babẹl, emwa nagbọn keghi zagha “gbae uhunmwu otagbọn hia.” Ẹghẹ na ẹre imamwaemwi ọghe orhiọn nẹi wu ghi ya vẹwa la ehe hia. (Gẹn 11:8, 9) Agharhemiẹn wẹẹ, ma ma wa rẹn ẹghẹ ne imamwaemwi ọghe ohoghe na ya suẹn, ma rẹnrẹn wẹẹ Esu ne ọkaẹrhia nọ re “erha ohoghe hia,” ẹre ọ muẹn khian, irẹn wa ghọghọ wẹẹ imamwaemwi na wa vẹwa khian.—Jọn 8:44.