Iruẹmwi 12

A Rhie Ọghọ ne Arrọọ Kevbe Esagiẹn

De aro ne ima ya ghe arrọọ? (1) ẹko nakpannọ? (1)

De vbene Ivbi Otu e Kristi ya rhiẹre ma hẹ wẹ iran muẹn roro arrọọ nọ mwẹ ugue? (2)

Emwi dan nọ na gbe avbe aranmwẹ ra? (3)

De avbe uyinmwẹ eso nọ ma rhiema ghẹ a rhie ọghọ ne arroọ? (4)

Vbọ re uhi ọghe Osanobua nọ kaẹn esagiẹn (5)

Ọna vbe debae esagiẹn nasi ye egbe ra? (6)

1. Jehova ọre Ẹzi ọghe arrọọ. Emwi hia nọ ghi rrọ mwẹ arrọọ ọghe iran ne Osanobua. (Psalm 36:9) Nọhianrẹn ẹre arrọọ khin ne Osanobua. Uhiẹn arrọọ ọghe ọmọ na ma he biẹ nọ rre uwu ẹko iyẹe nọ ghan ẹre nọ ne Jehova. Na do gbe ọmọ ni nọ he wan dee vberriọ rhunmwuda emwi ọkpa kegha re emwi dan vbe odaro ọghe Osanobua.—Ẹksodọs 21:22, 23; Psalm 127:3.

2. Ivbi Otu e Kristi ata muẹn roro arrọọ nọ mwẹ uguẹ. Iran ghi gie aro dae wẹ imọto kevbe owa ọghe iran i re nọ zẹbe. (Diuteronomi 22:8) Eguọmwadia Osanobua i rhie arrọọ ọghe iran ye ikpadede nọ ma khẹke rhumwuda ọyẹnmwegbe ra igiogio. Rhunmwudọni iran i mwẹ oghae vbe ikuisasegbe osuan nọ gha gheghe rhie ikuaengbe ne emwa ọvbehe. Iran ke ghi gbaẹngbe ne amuọghọ yọmwaegbe nọ si igbinnoguo.—Psalm 11:5; Jọn 13:35.

3. Arrọọ ọghe aranmwẹ vbe re nọ hianrẹn ne Ayi. Ovbi Otu e Kristi sẹtin gbe avbe aranmwẹ ya kpemehe evbare kevbe ukpọn ra nọ ya rhie ugue ne egbe ẹre vbe obọ emianmwẹ kevbe ẹbe. (Gẹnẹsis 3:21; 9:3; Ẹksodọs 21:28) Sokpan emwi nẹi ma nọ na gha ru avbe aranmwẹ khọ ra na gbele iran rhunmwuda ikuisasegbe ra asọyẹnmwegbe.—Itan 12:10.

4. Esiga nasi, itaba nasiyihue, kevbe ikpukhunmwu na minọ re na ya sọyẹnmwẹ egbe i re ọghe Ivbi Otu e Kristi. Avbe uyinmwẹ vbe nian i ma rhunmwuda (1) iran ye ima ru ọviẹn ọghe iran, (2) iran si ikuaẹngbe ye ima egbe, kevbe (3) emwi nọgbiruẹn ẹre iran khin. (Rom 6:19; 12:1; 2 Kọrinti 7:1) Ọ ke ghi kakabọ lọghọ na do mu egbe avbe uyinmwẹ vberriọ fua. Sokpan te ima gha ru vberriọ ne a ye ẹko rhiẹnrhiẹn Jehova.

5. Esagiẹn keghi re nọ vbe hian vbe odaro Osanobua. Osanobua khare wẹ evbọrrọọ, ra arrọọ, keghi rre uwu esagiẹn. Rhunmwudọni emwi nẹi ma ẹre nọ na rrie esagiẹn. Ẹi vbe ma na do rri emiowo ọghe aranmwẹ ne a ma da ẹre esagiẹn kua ẹse. Adeghẹ a kuaẹn aranmwẹ gbua ra ọ wu ye ifi, a ghẹ rriọe. Adeghẹ asoro ọre a ya hae ra osisi a ya fiẹe, a ghi dae esagiẹn kua ẹgiẹgiẹ adeghẹ te a khian rriọe.—Gẹnẹsis 9:3, 4; Levitikọs 17:13, 14; Iwinna 15:28, 29.

6. Emwi nẹi ma na do kue yọ esagiẹn na si ye egbe ra? Yerre, Jehova hoo ne ima gbaẹngbe ne esagiẹn. Ọna rhiema wẹ ne ima ghẹ si ye egbe ima vbe odẹikodẹ hiehie esagiẹn ọghe ọmwa ọvbehe ra uhiẹn esagiẹn ọghomwa na miẹn wẹ a mu hin. (Iwinna 21:25) Erriọ Ivbi Otu e Kristi ọghe ata i khian kue yọ esagiẹn na si ye egbe. Iran gha kue ye avbe odẹ ọvbehe ne a ya sinmwi egbe, zẹvbe evbasiyegbe nẹi mwẹ esagiẹn. Iran ho ne iran gha rrọ, sokpan iran i sẹtin hia ne iran sinmwi arrọọ ọghe iran vbe ne a gha na rra uhi ọghe Osanobua.—Matiu 16:25.

 [Efoto nọ rre ipapa 25]

Ne a ye ẹko rhiẹnrhiẹn Osanobua, te ima gha gbaẹngbe ne esagiẹn na si ye egbe, uyinmwẹ nọgbiruẹn, kevbe a mu arrọọ ye ikpadede nọ ma khẹke