Iruẹmwi 15

Na Rhie Iyobọ ne Emwa Ọvbehe ya ru Iho Ọghe Osanobua

Vbọzẹ ne u na tama emwa ọvbehe vbekpa emwi ne u ruẹ? (1)

De emwa ne uwẹ gha sẹtin gu ghae iyẹn nọma? (2)

De vbene uyinmwẹ ruẹn gha ya sẹtin dekan emwa ọvbehe hẹ? (2)

De ẹghẹ ne uwẹ gha ya sẹtin ye egbe ba iko kporhu? (3)

1. Vbe ẹghẹ na nian uwẹ ghi ruẹ emwi nọbun nọma nẹ vbuwe Baibol. Irẹnmwi na gha suẹ ne u ya gha họnrẹn ighẹ akpa ọghe Ovbi Otu e Kristi. (Ẹfisọs 4:22-24) Irẹnmwi vberriọ keghi re nọ khẹke ne uwẹ do miẹn arrọọ nẹi mwẹ ofọ. (Jọn 17:3) Vbọrhirhighayehẹ, emwa ọvbehe vbe ho ne iran họn iyẹn nọma ne iran tobiran sẹtin do miẹnfan. Ivbi Otu e Kristi ata hia gha osẹe ma emwa ọvbehe. Ọ keghi re iyi ọghe Osanobua.—Rom 10:10; 1 Kọrinti 9:16; 1 Timoti 4:16.

2. Uwẹ sẹtin suẹn gha gu emwa ni sikẹ ruẹ ghae emwi esi ne uwẹ ruẹ. Tae ma ẹgbẹe ruẹ, avbe ọse, enagbaye owebe, kevbe enagba winna. Gha mwẹ ufumwẹ kevbe iziengbe vbe uwẹ gha ru vberriọ. (2 Timoti 2:24, 25) Yerre wẹ emwa wa ghe uyinmwẹ ọmwa ugbẹnso sẹẹ vbene irẹn danmwehọ ẹmwẹ ne ọ ta. Rhunmwudọni uyinmwẹ ruẹn nọma gha sẹtin si emwa ọvbehe ya danmwehọ igiuhun ne u ta ma iran.—Matiu 5:16; 1 Pita 3:1, 2, 16.

3. Vbe ẹghẹ, uwẹ sẹtin do somwa nọ gha lele iko avbe Osẹe Jehova nọ rre ẹdogbo ni suẹn ikporhu. Izowẹ ne kpataki ẹre ọna khin vbe alaghodaro ọwuẹ. (Matiu 24:14) De aro ọyẹnmwẹ ne ọna khian gha khin adeghẹ uwẹ na sẹtin ru iyobọ ne ọmwa ọvbehe nọ do gha re oguọmwadia ọghe Jehova kevbe miẹn arrọọ nẹi mwẹ ọfo!—1 Tẹsalonaika 2:19, 20.