IRUẸMWI 97
Orhiọn Nọhuanrẹn Tuorre Yan e Kọniliọs
Ọ ghaa mwẹ okpia ọkpa vbe Sisaria na tie ẹre Kọniliọs. Ọka iyokuo e Rom ghaa nọ. Agharhemiẹn wẹẹ e Kọniliọs i re Ovbi e Ju, te Ivbi e Ju wa gha rhie ọghọ nẹ. Ọ wa gha ru iyobọ ne ivbiogue kevbe emwa ne obọ ma sẹ ọre. E Kọniliọs wa gha mwẹ amuẹtinyan dae Jehova, ọ vbe gha na erhunmwu gie ẹre vbe ẹghẹ hia. Vbe ẹdẹ ọkpa, odibosa ọkpa keghi rhie egbe ma e Kọniliọs, ọ na tama rẹn wẹẹ: ‘Osanobua họn erhunmwu ruẹ nẹ. Gie emwa gha rrie Jopa, ne iran ya tie Pita rre.’ Vbe ọwarọkpa, e Kọniliọs keghi gie ikpia eha gha rrie Jopa nọ re okhian ibiriki 30.
Vbe ẹghẹ na kha na, Osanobua keghi mu umian ma e Pita vbe Jopa. Vbe nene umian, e Pita keghi bẹghe aranmwẹ eso ne Ivbi e Ju wua. Urhu ọkpa na tama rẹn ne ọ rri ọre. Sokpan e Pita keghi kha wẹẹ: ‘I ma he rri aranmwẹ nọ ma huan ẹdẹ.’ Nene urhu na ghi tama rẹn wẹẹ: ‘Ghẹ ghi tie iran, aranmwẹ nọ ma huan rhunmwuda Osanobua yae khian nọ huan rẹn nẹ.’ Ọ na vbe tama e Pita wẹẹ: ‘Ikpia eha rre onurho ruẹ. Lele iran.’ Ẹre Pita na bu iran, ọ keghi nọ iran wẹẹ ‘Vbe ọ ya uwa rre?’ Iran na wanniẹn ọnrẹn: ‘Ọka iyokuo e Rom ọkpa na tie ẹre Kọniliọs ẹre ọ gie ima rre. Ọ wẹẹ ne u lele ima gha die Sisaria.’ E Pita keghi viọ iran la owa, ne iran gbe asọn vbe evba. Ẹdẹ ghi gbe, e Pita kevbe etẹn eso vbe Jopa na lele iran gha rrie Sisaria.
Vbe Kọniliọs ghi bẹghe Pita, ọ na wa fan fi iguẹ. Sokpan e Pita keghi tama rẹn wẹẹ: ‘Kpaegbe! Ọmwa kẹkan ẹre imẹ tobọ mwẹ vbe khin. Osanobua ẹre ọ wẹẹ ne I bu ruẹ gha die owa, agharhemiẹn wẹẹ Ivbi e Ju kevbe emwa nẹ ẹi re Ju i lẹro egbe. Tama mwẹ, vbọzẹe ne u na gie na tie mwẹ?’
E Kọniliọs keghi tama e Pita wẹẹ: ‘Nẹghẹdẹnẹ vbe I ghaa na erhunmwu, odibosa ọkpa keghi rhie egbe ma mwẹ. Ọ na wẹẹ ne I gie na tie ruẹ. Lahọ, gu ima guan vbekpae Jehova.’ E Pita keghi tama rẹn wẹẹ: ‘I bẹghe ẹre nẹ wẹẹ, aro ọkpa ẹre Osanobua ya ghee emwa hia. Ọmwaikọmwa nọ hoo nọ ga irẹn, ẹre irẹn miẹn yi.’ E Pita keghi maa iran emwi nibun vbekpae Jesu. Vbe ọwarọkpa, orhiọn nọhuanrẹn ọghe Osanobua keghi tuorre yan e Kọniliọs kevbe emwa ni ghaa rre owa re. Vbe iyeke ọni, iran hia keghi dinmwiamẹ.
“Ọmwaikọmwa ne ọ mu ohan rẹn, ọ na vbe gha yin ẹse, te irẹn gha rhan obọ miẹn [ọnrẹn yi], ovbi ẹvbo ne ọ rhirhi gha khin.”—Iwinna 10:35
