Ehab keghi re ọkpa vbe usun avbe ọba dan ni kha yan uniẹn igbe ọghe Ivbi Izrẹl. E Jezibẹl ne okhuo dan nọ rhie re kegha ga e Bel. Iran keghi ya ẹbọ gba otọ Izrẹl hia, iran na vbe gbele akhasẹ e Jehova nibun rua. De emwi ne Jehova ghi ru? Ọ keghi gie Elaija bu Ehab.

Elaija keghi tama Ọba Ehab wẹẹ, amẹ i khian ghi rhọọ vbe otọ Izrẹl rhunmwuda orukhọ ọghẹe. Ọ gberra ukpo eha, ne amẹ ma ya rhọọ vbe otọ Izrẹl. Rhunmwuda ọni, otọ ọghe iran ma ghi maan emwi okọ, Ivbi Izrẹl na gha rre ohanmwẹ. E Jehova keghi werriegbe gie Elaija bu Ehab. Ọba Ehab keghi tama Elaija wẹẹ: ‘U hoo ẹmwẹ gbe! Uwẹ ẹre ọ si ena hia na.’ Elaija keghi wanniẹn ọnrẹn wẹẹ: ‘Ẹi re imẹ ẹre ọ si ẹre, ne amẹ ma na rhọọ. Ne u na ga e Bel ẹre ọ si ẹre. Tama emwa hia ne iran gha rrie uhunmwu Oke Kamẹl. U ghi vbe wẹẹ ne avbe akhasẹ ọghe Bel gha rre evba. Evba ẹre ima khian na ghi rẹn Osa ọghe ẹmwata.’

Emwa hia keghi si egbe koko vbe uhunmwu Oke Kamẹl. Elaija keghi kha wẹẹ: ‘Uwa zẹ ne egbe uwa. Adeghẹ e Jehova ọre Osa ọghe ẹmwata, uwa lelẹe. Adeghẹ Bel ẹre nọ, uwa vbe lelẹe. Wa gi ima gele ghee nọ re Osa ọghe ẹmwata. Gi avbe akhasẹ e Bel 450 mwamwa izọhẹ ọghe iran ye uhunmwu aka, ne iran datie osa ọghe iran. Mẹ gha vbe mwamwa izọhẹ ọghomwẹ ye uhunmwu aka, I ghi vbe datie Osa mwẹ ighẹ e Jehova. Nọ rhirhi gie erhẹn rre, ọre Osa ọghe ẹmwata.’ Iran hia keghi kue yọ.

Avbe akhasẹ e Bel keghi mwamwa izọhẹ ọghe iran ye uhunmwu aka. Ẹdẹ ohoho ẹre iran ya kpee tie osa ọghe iran. Iran na gha kha wẹẹ: ‘Eo Bel, uwẹ khuẹnniẹn ima!’ Ugbẹnvbe Bel ma khuẹnniẹn iran, Elaija na gha ya iran gbogiẹ. Ọ na khama iran wẹẹ: ‘Egbọre te ọ vbiẹ. Wa kakabọ tu ladian, ne uwa huẹn ọnrẹn.’ Iran ghi zẹ tu, ebi na ro. Sokpan e Bel ma miẹn unu ya khuẹnniẹn.

Elaija ghi mwamwa izọhẹ ọghẹe ye uhunmwu aka nẹ, ọ na tue amẹ yan rẹn. Ọ keghi na erhunmwu gie Jehova wẹẹ: ‘Eo Jehova, lahọ gi emwa hia rẹn wẹẹ, uwẹ ọre Osa ọghe ẹmwata.’ Vbe ọwarọkpa, e Jehova keghi gie erhẹn ke ẹrinmwi rre, do giẹn izọhẹ nii. Iran ghi bẹghe emwi nọ sunu, iran keghi datu wẹẹ: ‘E Jehova ọre Osa ọghe ẹmwata!’ Elaija  na tama iran wẹẹ: ‘Wa ghẹ gi ọkpa lẹẹ fua vbe akhasẹ ọghe Bel!’ Iran keghi gbele Akhasẹ e Bel 450 rua vbe ẹdẹrriọ.

Elaija ghi bẹghe okuku amẹ nọ ma sẹ vbe atata obọ ọmwa, ọ na tama Ehab wẹẹ: ‘Okpamẹ dee. La ikẹkẹ okuo ruẹ, ne u gha rrie owa.’ Vbe ọ ma he kpẹẹ, amẹ na wa bi, ẹhoho na wa vbe lelẹe, okpamẹ na suẹn gha da. Erriọ ẹre uyunmwu ọghe ukpo eha nii ya fo. Ẹgiẹgiẹ ẹre Ehab ya fi ikẹkẹ okuo ọghẹe gha rrie owa. E Jehova keghi rhie ẹtin ne Elaija, nọ ya rhulẹ gberra ikẹkẹ okuo ọghe Ehab! Ọna rhiema wẹẹ, ọlọghọmwa ọghe Elaija fo nẹ ra? Gia ghee emwi nọ ghi sunu.