Abọ 1
Ugamwẹ Hia Ọre Ọghe Ẹmwata Ra?
1. De ugamwẹ eso ni rre otọ Africa?
ỌLỌGHỌ a ke miẹn ọmwa vbe otọ Africa nọ ma rẹn wẹẹ, emwi nọ ru ekpataki nọ na ga Osanobua. Sokpan, odẹ ughughan ẹre emwa ya gae. Eso ga vbe emọsk, eso ga vbe aro ẹbọ, vbene eso na vbe ga vbe esọsi. Sokpan ẹi gia na kha wẹẹ ugamwẹ eha kẹkan ẹre ọ rre otọ Africa. Vbuwe ẹbu Ivbi Emọle ni rrọọ, iran keghi mwẹ uhi kevbe iyayi ughughan. Ugamwẹ erre avbavbotọ keghi lughaẹn vbe ehe ughughan. Nọ ne emwa ni tie egbe iran Ivbiotu e Kristi, iran ẹre ọ ghi mwẹ iyayi ughughan sẹ. Gberra avbe esọsi na wa gele yẹrẹro, arriaisẹn nibun ọvbehe ye rre ehe hia vbe otọ Africa.
Te Ọ Khẹke Ne Ugamwẹ Ọghomwa Hẹnhẹn Egbe Yan Ẹmwata
2. (a) Vbọ mobọ siẹ ne emwa na rre ugamwẹ ughughan? (b) Vbọsiẹ ne ima i khian na wa kha wẹẹ ugamwẹ ọghe ima ẹre Osanobua kueyi?
2 Vbọsiẹ ne emwa na mwẹ ugamwẹ ughughan? Emwa eso keghi rre ugamwẹ ne iran na do vba evbibiẹ iran. Emwi nọ sunu vbe ẹghẹ nọ kpẹ fua, vbe rre usun emwi nọ si ẹre ne emwa na ga vbe odẹ ughughan vbe ẹdẹnẹrẹ. Ne ebe The Africans—A Triple Heritage khare wẹẹ: “Ugamwẹ Ivbi Emọle keghi vẹwae gba odẹ okuọ ọghe Sahara rhunmwuda wẹẹ iran khọnmiotọ vbe ikinkin nii, . . . Erriọ ugamwẹ ọghe Ivbiotu e Kristi vbe ya vẹwae vbe odẹ ahọ ọghe Sahara. Ugamwẹ Ivbi Emọle keghi vẹwae gba odẹ okuọ ọghe Sahara rhunmwuda, iran ghaa ya agbada ghagha emwa wẹẹ, iran ma na deba ugamwẹ ọghe iran, iran gha gbele iran rua. Erriọ Ivbiotu e Kristi vbe ya gha ya osisi ghagha emwa ni ma deba iran.” Ọrheyerriọ, ma nibun wa yaeyi wẹẹ ugamwẹ ọghe ima ẹre Osanobua kueyi. Ma i khian sẹtin kha wẹẹ ugamwẹ ẹmwata ẹre ima ye rhunmwuda ima vba evbibiẹ ima vbọ ra rhunmwuda agbẹnvbo ọvbehe gbagba ẹre ye erha ima odede egbe.
3-5. De igiemwi nọ ya ima rẹn wẹẹ, ẹi re ugamwẹ hia ọ mwẹ imamwaemwi ọghe ẹmwata?
3 Emwa ugamwẹ hia yayi wẹẹ iran ga Osanobua vbe odẹ nọ khẹke, sokpan iyayi ọghe iran lughaen ne egbe. Emwi ughughan ẹre iran ma emwa re vbekpae Osanobua kevbe emwi nọ gualọ vbe obọ ima. Gia ghee igiemwi na ghee: gia kha wẹẹ u miẹn iwinna vbe isiwinna nọkhua. Ẹdẹ nu wa ya suẹn iwinna, a keghi tama ruẹ wẹẹ, enọwanrẹn ọghe isiwinna nii rrie ehe. U na ghi nọ orhunmwu eha vbe isiwinna nii, iwinna nu gha ru. Nokaro keghi kha wẹẹ, iwinna ne enọwanrẹn isiwinna waa ruẹ re ọre ikpolo. Nogieva na kha wẹẹ, iwinna akọwe ẹre u khian gha ru, vbene nogieha na khama ruẹ wẹẹ, uwẹ ẹre ọ khian gha ghae ebe lele dọmwadẹ ugha vbe isiwinna na.
4 Vbe iyeke ọni, u na ghi nọ iran vbene enọwanrẹn isiwinna nii ye hẹ. Nokaro na khama ruẹ wẹẹ, igbama ye nọ, ọ zogọ, ọ wa vbe khọ. Nogieva na kha wẹẹ, ọ ma tan, ọ khian ọmaẹn nẹ, kevbe wẹẹ, ọmwa esi nọ. Nogieha khian ghi kha—ọ wẹẹ okhuo ẹre ọ yan ne isiwinna. Ọna sẹtin ya egbe wọọ ruẹ rhunmwuda u ma rẹn nọ taa ẹmwata vbọ. Adeghẹ u hoo nu ye gha winna vba, te u gha tobọ ruẹ gualọ otọre, aro ọmwa ne nọ yan isiwinna nii khin kevbe iwinna nọ gele hoo nu gha ru.
5 Erriọ ugamwẹ vbe ye. Rhunmwuda ne emwa na mwẹ iyayi ughughan vbekpae Osanobua kevbe emwi nọ gualọ vbe obọ ima, te ọ khẹke ne ima hia, na miẹn wẹẹ, odẹ ne ima ya ga Osanobua ọre ọghe ẹmwata. Sokpan de vbene ima khian ghi ya rẹn ẹmwata vbekpae Osanobua hẹ?
