IRUẸMWI 54

Iwinna Ọghe “Ọviẹn Nọ Gia Mu Ẹtin Yan Kevbe Nọ Fuẹro”

KPẸRE

Jesu ọre Uhunmwuta ọghe iko ọghe Ivbiotu e Kristi. (Ẹfisọs 5:23, NW) Vbe ẹdẹnẹrẹ, ẹrinmwi ẹre Jesu ke loo “ọviẹn nọ gia mu ẹtin yan kevbe nọ fuẹro” ya dia erhuanegbe ẹre vbe otagbọn na. (Tie Matiu 24:45, NW.) Jesu ẹre ọ tobọre zẹ “ọviẹn” na, rhunmwuda ọni, ọviẹn na mwẹ asẹ na ya ru emwi eso. Ọrheyerriọ, ọviẹn ọghe Kristi ẹre ye nọ, ọ vbe gbaroghe etiẹn e Kristi. Gha re ọviẹn na? De vbene ọviẹn na ya gbaroghe ima hẹ?

1. Gha re “ọviẹn nọ gia mu ẹtin yan kevbe nọ fuẹro”?

Ke otọ gha dee, ẹre Jehova ke loo okpia, ra ikpia eso ya rhie adia ne emwa rẹn. (Malakai 2:7; Hibru 1:1) Vbe Jesu ghi wu nẹ, avbe ukọ kevbe ediọn ni ghaa rre Jerusalẹm, ẹre ọ ghi gha su emwa Osanobua. (Iwinna 15:2) Obẹlẹ nii ẹre ima vbe lele vbe ẹdẹnẹrẹ. Ediọn eso, na rẹn ye Ẹbu Nọ Su Ọghe Avbe Osẹe Jehova, ẹre ọ kpemehe evbare orhiọn ne ima, iran ẹre ọ vbe dia iwinna ikporhu. Ẹbu na ọre “ọviẹn nọ gia mu ẹtin yan kevbe nọ fuẹro, ne [Jesu] zẹ.” (Matiu 24:45a, NW) Etẹn ni re Ẹbu Nọ Su keghi re Ivbiotu e Kristi na ya orhiọn nọhuanrẹn hannọ zẹ, ni khian ya deba e Kristi kha vbe Arriọba ọghẹe vbe ẹrinmwi, vbe arrọọ ọghe iran gha sẹ ufomwẹ nẹ vbe agbọn na.

2. De evbare orhiọn ne ọviẹn nọ gia mu ẹtin yan kpemehe ẹre?

Jesu khare wẹẹ, te ọviẹn nọ gia mu ẹtin yan khian “gha rhie evbare ne [etẹn ne iran gba ga Osanobua] vbe ẹghẹ nọ khẹke.” (Matiu 24:45b, NW) Evbare ne ima re keghi ya ima mwẹ ẹtin, ọ vbe ya egbe sasa ima. Erriọ evbare orhiọn vbe ye, ọ keghi ru iyobọ ne ima ya gha ya ẹkoata ga e Jehova, ọ vbe ru iyobọ ne ima ya gha ru iwinna ne Jesu waa ima re. Evbare orhiọn na, ọre adia ni rre Ẹmwẹ Osanobua. (1 Timoti 4:6) Ma keghi miẹn evbare orhiọn na vbe iko ne ima yo, vbe asikoko nọkhua kevbe nekherhe, vbe ebe kevbe vidio ughughan ni rhan otọ e Baibol kevbe ni ya ima rẹn ahoo ọghe Osanobua; ena hia keghi ya ima sikẹ Osanobua sayọ.

GUALỌ OTỌ RE SAYỌ

Gia ziro yan evbọzẹe ne ima na gualọ iyobọ ọghe “ọviẹn nọ gia mu ẹtin yan kevbe nọ fuẹro”—nọ re Ẹbu Nọ Su.

Ẹbu Nọ Su, ẹre ọ kpemehe evbare orhiọn, adia kevbe iyobọ nọ khẹke ne Avbe Osẹe Jehova ni rre otagbọn hia

3. Te ọ khẹke ne otu e Jehova gha khian hẹnẹhẹnẹ

Jesu keghi loo Ẹbu Nọ Su ya dia iwinna ọghe Avbe Osẹe Jehova. Ivbiotu e Kristi vbe gha mwẹ emwamwa vbenian vbe ẹghẹ ọghe avbe ukọ ọghe Jesu. Kpee VIDIO na.

E VIDIO: E Jehova Keghi Mwamwa Emwa Rẹn Vbe Odẹ Nọ Khẹke (6:18)

Tie 1 Kọrinti 14:33, 40, iyeke ọni, uwa ghi ziro yan inọta na:

De vbene avbe ako na ya rhie ẹre ma hẹ wẹẹ, e Jehova hoo ne emwa rẹn gha ru emwi hẹnẹhẹnẹ?

4. Ọviẹn nọ gia mu ẹtin yan ẹre ọ dia emwamwa ikporhu ọghomwa

Iwinna ikporhu, ẹre ọ ghaa re iwinna nọ ghi ru ekpataki sẹ vbe arrọọ ọghe Ivbiotu e Kristi vbe ẹghẹ ọghe avbe ukọ ọghe Jesu. Tie Iwinna 8:14, 25, iyeke ọni, uwa ghi ziro yan avbe inọta na:

De emwa ni ghaa dia iwinna ikporhu ọghe Ivbiotu e Kristi vbe ẹghẹ ọghe avbe ukọ ọghe Jesu?
De emwi ne Pita vbe Jọn ru, vbe avbe ukọ nikẹre rhie adia ne iran?

Iwinna ikporhu ọre iwinna nọ ghi ru ekpataki sẹ, ne Ẹbu Nọ Su siẹnro ẹre. Kpee VIDIO na.

E VIDIO: Iran Keghi Rhie Aro Tua Iwinna Ikporhu Iyẹn Nọ Maan (1:24)

Jesu gi ima rẹn vbene iwinna ikporhu ru ekpataki sẹ hẹ. Tie Mak 13:10, iyeke ọni, uwa ghi ziro yan avbe inọta na:

Vbọzẹ ne Ẹbu Nọ Su i na ya iwinna ikporhu iyẹn nọ maan rhẹghẹrẹ?
Vbọzẹ ne ima na gualọ iyobọ ọghe “ọviẹn nọ gia mu ẹtin yan kevbe nọ fuẹro,” vbe nọ dekaẹn emwamwa ọghe iwinna ikporhu nọ khian vbe otagbọn hia?

5. Ọviẹn nọ gia mu ẹtin yan ẹre ọ rhie adia ne ima

Ẹbu Nọ Su, ẹre ọ rhie adia ne Avbe Osẹe Jehova ni rre otagbọn hia. De vbene iran ya rẹn adia nọ khẹke ne iran gha rhie ne ima? Gia ziro yan vbene ẹbu nọ su nọ ghaa rrọọ vbe ẹghẹ ọghe avbe ukọ ọghe Jesu ya gha ru ọna hẹ. Tie Iwinna 15:1, 2, iyeke ọni, uwa ghi ziro yan avbe inọta na:

Vbọ si imuanẹmwẹ ye uwu ẹbu Ivbiotu e Kristi eso vbe ẹghẹ ọghe avbe ukọ ọghe Jesu?
De emwa ne Pọl, e Banabas kevbe etẹn ọvbehe mu ẹmwẹ na gie, ne iran guan yọ?

Tie Iwinna 15:12-18, 23-29, iyeke ọni, uwa ghi ziro yan inọta na:

Vbene ẹbu nọ su ke ru atamuolọyan vbe ẹghẹ ọghe avbe ukọ ọghe Jesu, de emwi ne iran ka ru, ne iran mieke na rẹn vbene Osanobua hoo ne iran ya zuze ye ẹmwẹ nọ rre otọ?—Ghee uviẹn 12, 15, kevbe 28.

Tie Iwinna 15:30, 31 kevbe 16:4, 5, iyeke ọni, uwa ghi ziro yan avbe inọta na:

De emwi ne Ivbiotu e Kristi ru vbe ẹghẹ ọghe avbe ukọ ọghe Jesu, vbe iran ghi miẹn adia ọghe ẹbu nọ su?
De vbene Jehova ya fiangbe iran hẹ, rhunmwuda ne iran na lele adia nii?

Tie 2 Timoti 3:16 kevbe Jems 1:5, iyeke ọni, uwa ghi ziro yan inọta na:

De eke ne Ẹbu Nọ Su na miẹn adia, vbe iran gha khian ru atamuolọyan vbe ẹdẹnẹrẹ?

EMWA ESO KEGHI KHA WẸẸ: “Ọ ma khẹke ne ima gha lele adia ọghe Ẹbu Nọ Su, rhunmwuda, emwa kẹkan ẹre iran khin.”

Vbọ ya ruẹ yayi wẹẹ Jesu ẹre ọ dia Ẹbu Nọ Su?

OLIKA ẸMWẸ

Ẹbu Nọ Su, ọre “ọviẹn nọ gia mu ẹtin yan kevbe nọ fuẹro” ne Kristi zẹ. Ọviẹn na, ẹre ọ rhie adia ne Avbe Osẹe Jehova vbe otagbọn hia, ẹre ọ vbe kpemehe evbare orhiọn ne iran.