Nogieha Ọghe Jọn 1:1-14
1 Mẹ ne enọwanrẹn* ẹre ọ gbẹn ebe na gie uwẹ ne Geyọs, ne ọtẹn nọ ghaan, ne I ya ekhọe hia hoẹmwẹ ọnrẹn.
2 Ọtẹn nọ ghaan, erhunmwu ne I na ọre wẹẹ, ne u ye gha mwẹ alaghodaro vbe emwi hia, zẹvbe ne u wa mwẹ alaghodaro nian kevbe ne u gha mwẹ egberranmwẹ.
3 I wa kakabọ ghọghọ vbe etẹn rre do sẹ osẹ yọ wẹẹ, u dobọ mu ẹmwata zẹvbe ne u ya lele odẹ ẹmwata na khian.
4 Emwi nọ ghi ya ẹko rhiẹnrhiẹn mwẹ* sẹ ọna i rrọọ, vbe I gha họn wẹẹ, ivbi mwẹ ye lele odẹ ẹmwata khian.
5 Ọtẹn nọ ghaan, obọ ne u ya mu etẹn agharhemiẹn wẹẹ erhunmwuyẹn ẹre iran khin, rhie ẹre ma wẹẹ, ọmwa nọ mwẹ amuẹtinyan ẹre u khin.
6 Iran tama iko vbene u mwẹ ahoẹmwọmwa hẹ. Iran gha khian kpa, lahọ ru iyobọ nọ khẹke ne iran vbe odẹ nọ gha yẹẹ Osanobua.
7 Rhunmwuda eni Osanobua, ẹre iran ya kpa hin owa rre, vbene iran ma na rhie emwi rhọkpa vbe obọ emwa ni rre uwu agbọn.
8 Nọnaghiyerriọ, ọ khẹke ne ima gha mu ọghọ ye emwa vberriọ egbe rhunmwuda, emwi nẹi mwẹ a ma ru nọ, ne ima mieke na gba gha winna vbe odẹ ẹmwata.
9 I gbẹn ebe gie iko, sokpan, e Daiọtrẹfis nọ hoo nọ gha karo* vbe emwi hia vbe uwu iko i ya ọghọ miẹn ẹmwẹ ne ima ta yi.
10 Rhunmwuda ọni, I gha rre, I gha muẹn ladian ighẹ ẹmwẹ iyẹn ohoghe nọ na vbekpa ima,* nọ ya mu ima eni rhia. Ọni ma vbe sẹ ọre ọkẹn, ẹ i vbe hoo nọ mu ọghọ ye etẹn egbe; ọ gha vbe miẹn emwa ni hoo ne iran mu ọghọ ye etẹn egbe, ọ ghi gha hoo nọ mu idobo ye iran egbe kevbe nọ kan iran fua vbe iko.
11 Ọtẹn nọ ghaan, ghẹ ya egbe taa emwi dan, sokpan, gha ya egbe taa emwi esi. Ọmwa nọ ru emwi esi, ọghe Osanobua nọ. Sokpan, ọmwa nọ ru emwi dan ma he miẹn Osanobua.*
12 Nọ ne Dẹmitriọs, iran hia wa ta ẹmwẹ ọnrẹn nọ maan; vbene ọ ya mudia ẹse vbe odẹ ẹmwata rhie ẹre ma wẹẹ, ẹmwata ẹre iran ta. Uhiẹn, ma tobọ ima vbe ta ẹmwẹ ọnrẹn nọ maan; wẹ vbe rẹn wẹẹ, ẹmwata ẹre ima ta.
13 I te mwẹ emwi nibun ne I hoo ne I tama ruẹ, sokpan, I ma hoo ne I gbẹn emwi hia ye ebe rhie guẹ.
14 Vbọrhirhighayehẹ, I mwẹ ọnrẹn vbe ekhọe wẹẹ I gha rherhe miẹn ruẹ, ẹghẹ nii, ma ghi gba guan ghee mwẹ ghee ruẹ.
Ọfunmwegbe gu ruẹ rrọọ.
Avbe etẹn gie na tuọ. Tama edọmwadẹ etẹn wẹẹ, I gie na tuẹ iran.
Avbe Futnot
^ Ra “ọdiọn.”
^ Ọ sẹtin vbe gha re, “ekhọe mwẹ vuọn ne ekpọnmwẹ.”
^ Ra “nọ gha re okaro.”
^ Vbe Grik, “ẹmwẹ dan nọ ta lele ima.”
^ Ra “rẹn Osanobua.”
