Iwinna Avbe Ukọ 16:1-40
16 E Pọl kegha rrie Dẹbi. Ọ ghi ke evba kpa, ọ na gha rrie Listra. Ọrhuanegbe ọkpa na tie ẹre Timoti ghaa rre evba. Ọmwa iyayi ẹre iyẹe khin, Ovbi e Ju vbe nọ, sokpan, erhae na gha re Ovbi e Grik.
2 Etẹn ni rre Listra kevbe Aikoniọm wa gha ta ẹmwẹ e Timoti nọ maan.
3 E Pọl na wẹẹ irẹn hoo ne Timoti gha lele irẹn, ẹre ọ na ya rhuẹ ọre rhunmwuda Ivbi e Ju ni ghaa rre ikinkin nii, rhunmwuda, iran hia rẹnrẹn wẹẹ, Ovbi e Grik ẹre erhae khin.
4 Zẹvbe ne iran ya mu okhian lele dọmwadẹ ẹvbo, iran ghi gha gi etẹn rẹn ilele ne avbe ukọ kevbe ediọn ni rre Jerusalẹm gba ta wẹẹ, a khian gha lele, ne etẹn mieke na gha rhie owẹ lelẹe.
5 Amuẹtinyan ọghe etẹn ni rre iko na gha wegbe yọ, erriọ ẹre iran vbe ya gha muan yọ vbe ẹdẹgbegbe.
6 Iran na vbe mu okhian la iwewe ọghe Frigia kevbe Galetia, rhunmwuda, orhiọn nọhuanrẹn ma kue ne iran kporhu vbe ikinkin ọghe Esia.
7 Iran ghi vbe sẹ e Misia, iran na te gha hoo ne iran gha rrie Bitinia, sokpan, orhiọn e Jesu* ma kue ne iran yo.
8 Ẹre iran na ghi la e Misia gberra, iran na gha die Troas.
9 Ọ ghi rre asọn, e Pọl keghi miẹn umian. Vbe umian nii, okpia ọkpa ne Ovbi e Masẹdonia na mudia, ọ na gha rinmwiaẹn wẹẹ: “Gha die Masẹdonia, ne u do ru iyobọ ne ima.”
10 Ọ ghi wa miẹn umian nii nẹ, ma keghi hia ne ima gha rrie Masẹdonia, rhunmwuda, ma na do bẹghe ẹre wẹẹ, Osanobua hoo ne ima ya kporhu iyẹn nọ maan ma iran.
11 Ẹre ima na ghi ke Troas la okọ gha rrie Samọtres. Sokpan, vbe ẹdẹ nọ lelẹe, ma na gha rrie Niapolis;
12 ma na ghi ke evba gha rrie Filipai nọ rre ototọ e Rom; ẹvbo nii ẹre ọ ghi hin usi sẹ vbe ikinkin e Masẹdonia. Ma keghi gbe ikpẹdẹ eso vbe ẹvbo nii.
13 Ọ ghi rre Ẹdẹ Ikẹtin, ma na ladian hin orere ẹvbo nii rre, ma na gha rrie ọkpẹn ẹzẹ. Ma na te gha roro ẹre wẹẹ, evba nii ẹre eke na na na erhunmwu ghaa ye. Ma keghi tota, ma na suẹn gha gu ikhuo ni si egbe koko ye evba guan.
14 Ọ ghaa mwẹ okhuo ọkpa na tie ẹre Lidia, nọ ke Taiataira rre; ukpọn nọ baa* ẹre okhuo na ghaa khiẹn. Okhuo nọ ga Osanobua ghaa nọ. Vbe Pọl ghi guan, ọ na gha danmwehọ, e Jehova* keghi vbe rhan ekhọe ọre rua, nọ mieke na gha rhie ẹmwẹ ne Pọl ta ye ekhọe.
15 Vbe ẹghẹ ne okhuo na vbe igiowa ẹre ghi ya dinmwiamẹ, ọ keghi tama ima wẹẹ: “Adeghẹ uwa gele ka mwẹ ye ọmwa nọ mu ẹtin yan e Jehova,* wa do dia owa mwẹ ya.” Ọ keghi rhẹrhẹ ima, ẹre ima na gele gha khian.
16 Vbe ima ghi rrie ehe na na na erhunmwu vbe ẹdẹ ọkpa, ọvbokhan okhuo ọkpa nọ re ọguọmwadia, ne orhiọn dan nọ ya ọmwa miẹn aro ghaa loo, keghi vba ima vbe odẹ. Igho ọrhẹnrhẹn ẹre ọ khuan ne avbe arowa ẹre, rhunmwuda nọ na miẹn aro.*
17 Ọ na gha lele ima kevbe Pọl khian, ọ na gha go wẹẹ: “Eguọmwadia Osanobua Nọ Yo Sẹ ẹre ikpia na khin, emwi nọ gha ya uwa miẹn imiẹnfan, ẹre iran ya wewe ma uwa.”
18 Ikpẹdẹ nibun ẹre ọvbokhan okhuo na ya gha go lele ima. Egbe ẹre na ghi wọọ e Pọl, ọ na ghi mu aro daa ẹre, ọ na tama orhiọn dan nii wẹẹ: “I tama ruẹ nian vbe eni Jesu Kristi, ladian hin egbe ọvbokhan okhuo na rre.” Orhiọn dan nii na gele ladian vbe ọwara ọkpa nii.
19 Avbe arowa ẹre ghi miẹn wẹẹ, ẹki gbe iran nẹ, iran na do mu e Pọl vbe Sailas, iran na silo iran gha rrie adesẹ ẹki, iran na viọ iran bu iran ni khaevbisẹ.
20 Iran ghi silo iran sẹ eke ne avbe ukọ arriọba nii ye, iran na tama iran wẹẹ: “Ikpia na i gi egbe rọkhọ ima vbe ẹvbo na. Ivbi e Ju ẹre iran khin.
21 Iran gha ma emwa ilele ni ma gua uhi ọghe ima ro; ma i khian vbe sẹtin lelẹe, ugbẹnvbe a miẹn wẹẹ, Ivbi e Rom ẹre ima khin.”
22 Emwa ni gbẹbu vba keghi vẹ rhu iran, avbe ukọ arriọba nii na yanghan ukpọn ye iran urhu, iyeke ọni, iran na we ne iran ya ukpokpo gbe iran.
23 Iran na gele gbe iran, obọ na da iran; iyeke ọni, iran na filo iran ku uwu eghan, iran na we ne eseghan gha khẹ odẹ vba, ne iran ghẹ mieke na lẹẹ.
24 Rhunmwuda na na gbe uhi vberriọ nẹẹn, ọ na ya viọ iran ye uwu eghan nọ ke uwu ẹre, ọ na gbalọ iran owẹ mu ike erhan nọkhua.*
25 Ọ ghi rre ogiasọn, e Pọl vbe Sailas na gha na erhunmwu, iran na gha so ihuan urhomwẹ gie Osanobua, avbe oleghan nikẹre na gha danmwehọ iran.
26 Vbe udomwurri, ugbohiotọ nọkhua keghi sunu, eghan nii keghi mu rueghe ya sẹ ẹyotọ ọre. Yevbesọni, urho hia ni rre eghan nii na wa kie yotọ vbe ọwara ọkpa nii, ọgiọrọ na ya rrọ avbe oleghan keghi fannọ.
27 Vbe eseghan ghi rhiọrre, ọ na bẹghe ẹre wẹẹ urho hia kie yotọ, ọ na gha roro ẹre wẹẹ, avbe oleghan hia lẹẹ fua nẹ. Rhunmwuda ọni, ọ keghi yuo umozo ọghẹe ladian, nọ ya gbe egbe ẹre rua.
28 Sokpan, e Pọl keghi go tama rẹn wẹẹ: “Ghẹ gbe egbuẹ rua; ma hia rre emwa!”
29 Ẹre eseghan nii na we na mu ukpa gie irẹn, ọ na rhulẹ la uwu eghan nii, ọ na gha guọ zẹzẹzẹ, ọ na ghi fan fi iguẹ vbe odaro e Pọl vbe Sailas.
30 Ọ na ghi viọ iran ladian, ọ na nọ iran wẹẹ: “Eniwanrẹn, de emwi ne I gha ru, ne I mieke na miẹn fan?”
31 Iran na tama rẹn wẹẹ: “U gha ya Enọyaẹnmwa e Jesu yi, u gha miẹn fan, ke uwẹ kevbe igiowa ruẹ.”
32 Ẹre iran na ghi ta ẹmwẹ ọghe Jehova* ma rẹn, ke irẹn kevbe emwa hia ni rre owa ẹre.
33 Eseghan nii keghi viọ iran lele egbe vbe ogiasọn nii, ọ na ya kpe ẹwẹn ọghe iran.* Irẹn kevbe igiowa ẹre hia na ghi dinmwiamẹ, vbene iran ma na si obọ ẹgogo ghee iyeke.
34 Ọ keghi viọ iran la owa ẹre, ọ na ya rhie evbare ne iran; ọ na wa gha ghọghọ rhunmwuda nọ na do ya Osanobua yi, erriọ ẹre emwa hia ni rre igiowa ẹre vbe gha ghọghọ.
35 Ẹdẹ ghi gbe, avbe ukọ arriọba nii keghi gie avbe ọgbalegbe ne iran ya tama eseghan nii wẹẹ: “Fan ikpia nii, ne iran gha rrie.”
36 Ẹre eseghan nii na ghi tama e Pọl wẹẹ: “Avbe ukọ arriọba gie ikpia eso rre do tama mwẹ ne I fan uwa eva. Vbene ọ ghi ye na, wa ladian, ne uwa gha khian. Ọfunmwegbe gu uwa rrọọ.”
37 Sokpan, e Pọl keghi tama iran wẹẹ: “Iko ọba iko ẹvbo, ẹre iran na gbe ima asan, vbene a ma na bu ohiẹn gbe ima,* egbe ne ima ya re Ivbi e Rom; iran ghi vbe ru ọni nẹ, iran na filo ima ku eghan. Eban ẹre iran khian ghi do fan ima vbe ẹkhokho ra? A wa wua, ma i kue ẹdẹ na wu! We ne iran tobọ iran gha dee, ne iran do su ima ladian.”
38 Avbe ọgbalegbe na ya na iyẹn na ma avbe ukọ arriọba nii. Avbe ukọ arriọba nii ghi họn wẹẹ Ivbi e Rom ẹre iran khin, ohan na suẹn gha mu iran.
39 Ẹre avbe ukọ arriọba nii na gele gha dee do rinmwian iran, iran ghi su iran ladian nẹ, iran na we ne iran kpa hin ẹvbo nii rre.
40 E Pọl vbe Sailas ghi ladian vbe uwu eghan, iran na gha rrie owa e Lidia; iran ghi miẹn etẹn, iran na rhie igiọdu ne iran, iyeke ọni, iran na kpa.
Avbe Futnot
^ Ọni ọre, orhiọn nọhuanrẹn ne Osanobua rhie ne Jesu.
^ Ukpọn nọ baa na guan kaẹn mwa, ọre ukpọn nọ mwẹ ẹmu ne Ebo tie ẹre purple.
^ Ya ghee Apẹndis A5.
^ Ya ghee Apẹndis A5.
^ Ra “rhunmwuda nọ na ta emwi nọ gha sunu vbe odaro.”
^ Ra “ububan.”
^ Ya ghee Apẹndis A5.
^ Ra “eke na na yi iran ama.”
^ Ra “bu ohiẹn ima.”
