Ebe Jud 1:1-25
1 E Jud ne ọviẹn e Jesu Kristi, sokpan, nọ re ọtiẹn e Jems nokpia ẹre ọ gbẹn ebe na gie emwa na tiere, ne Osanobua ne Erha mwa hoẹmwẹ ọnrẹn, ni vbe re emwa ne irẹn gbaroghe, ne iran mieke na gu e Jesu Kristi gha rrọọ:
2 Te Osanobua gha mwẹ itohan kevbe ahoẹmwọmwa daa uwa ẹsẹse, ọ ghi vbe rhie ọfunmwegbe ne uwa sayọ.
3 Etẹn ni ghaan, agharhemiẹn wẹẹ I te gha hia vbe odẹ ke odẹ ne I gbẹn ebe gie uwa vbekpa imiẹnfan ne Osanobua rhie ne ima hia, I na do bẹghe ẹre wẹẹ, ọ khẹke ne I gbẹn ebe gie uwa, ne I ya rhie igiọdu ne uwa, ne uwa hia vbe odẹ ke odẹ ne uwa ghẹ muẹn fua ighẹ iyayi ne uwa mwẹ, na rhie ne emwa ni huanrẹn vbe uhukpa nii; te iyayi nii khian gha rrọọ khian vbe etẹbitẹ.
4 Evbọzẹe ne I na ru ọna ọre wẹẹ, ikpia eso ne Ebe Nọhuanrẹn bu ohiẹn gbe nẹ vbe ẹghẹ nọ kpẹẹ fua, rẹnrẹn la uwu ẹbu uwa nẹ; iran i mwẹ imuohan Osanobua, iran keghi yin uyinmwẹ ifavbaro* rhunmwuda ne iran na rẹn wẹẹ, Osanobua ru ẹse ne kpataki* ne ọmwa, iran keghi vbe fi iyeke gbe Jesu Kristi nọ re arowa ọkpa kevbe Enọyaẹnmwa ọkpa ne ima mwẹ.
5 Agharhemiẹn wẹẹ, wa ka rẹn ena hia nẹ, I hoo ne I ye uwa ẹre rre wẹẹ, vbe Jehova* ghi miẹn emwa rẹn fan nẹ vbe otọ Igipt, ọ na fuẹn iran ni ma gha mwẹ amuẹtinyan* vbọ rua vbe okiekie.
6 Nọ ne avbe odibosa ni sẹ ukpo ne iran te ye rae, ni vbe yangbe ehe na te viọ iran yi ne iran gha ye, ọ ya ọgiọrọ ọghe etẹbitẹ rrọ iran ye uwu ebiebi ne kalokalo nẹ, ne iran gha rre evba ọ te sẹ ẹghẹ na khian ya bu ohiẹn iran vbe ẹdẹ nọkhua nii.
7 Erriọ vbe ye, e Sọdọm vbe Gomorra kevbe ẹvbo ni lẹga iran kegha fuẹn vbe uwu alama oghẹ,* iran na vbe muẹn yan uhunmwu ighẹ iwinna emwi ne egbe iran hoo, nẹi ye vbene Osanobua ya yi ẹre. Osanobua keghi ya erhẹn ọghe etẹbitẹ fuẹn iran rua; te irẹn ru ọna, ne ima mieke na ya emwi nọ sunu daa iran wan ne egbe.
8 A ye ta ena ta na, emwi dan emwi dan ẹre ikpia na mu roro,* iran keghi mu egbe iran kevbe ọghe emwa ọvbehe rhia, iran vbe ya aro tila iran ni rre asẹ rua, erriọ ẹre iran vbe ya unu rhia emwa ne Osanobua mu uyi ye ọre egbe.
9 Sokpan, ẹghẹ ne ẹzọ ya de rre ne Maikẹl ne ọkaolotu avbe odibosa kevbe Esu, ne iran na gha muan ẹmwẹ ye ẹmwẹ ikun e Mozis, ọ ma ya ihẹn yan Esu nọ bu ohiẹn ọnrẹn; ọ ma danmwẹ ọnrẹn hiehie, sokpan, ọ na tama Esu wẹẹ: “E Jehova* ẹre ọ khian bu ohiẹn ruẹ.”
10 Sokpan, nọ ne ikpia na, iran keghi ya unu rhia emwi hia ne iran ma gele rẹn otọ re. Te iran yin vbe na ghee aranmwẹ nẹi roro iro, avbe emwi ne egbe iran ma iran ẹre, ẹre iran ru, iran ghi gha mu egbe iran rhia.
11 U miẹn agbọn ọrhiae ne iran ye! Owẹ ne Ken zẹ ẹre iran vbe zẹ, iran keghi khirhi ru emwi dan rhunmwuda ere ne iran khian miẹn, zẹvbe ne Belam vbe ru ẹre. Iran vbe ta egbe ẹmwẹ isọtẹ ne Kora tae, ọni ẹre ọ si ẹre ne iran khian na fuan, vbene ọ vbe fuan.
12 Iran keghi deba uwa bọbọ ugie ahoẹmwọmwa ne uwa do, iran ghi gha gu uwa rri evbare. Sokpan, te iran yevbe avbe okuta ni lẹre ye ototọ amẹ. Iran keghi re avbe ọsuohuan ni rri evbare ye ẹko iran ọkpa, vbene ohan i na mu iran. Te iran yevbe amẹ nọ bi ne ẹhoho mu yo mu rre, sokpan, nene amẹ ma rhọọ. Te iran yevbe erhan nọ ma mọ vbe ẹghẹ nọ khẹke nọ ya mọ, nọ vbe wu nẹ fẹfẹfẹ,* na vbe tọn gbe otọ.
13 Te iran yevbe ogbigbi amẹ ọghe okun nọ vba yo vba rre. Uyinmwẹ efa ọghe iran keghi yevbe ihu ọghe amẹ nọ vba dee. Iran yevbe avbe orhọnmwẹ ni hẹ yo hẹ rre. Osanobua viọ iran ye ehe nọ so ebiebi kalokalo, evba ẹre iran khian gha ye vbe etẹbitẹ.
14 Inọk nọ ghaa re orre nogie ihinrọn vbe a gha ke egbe Adam kae, vbe ta ẹmwẹ akhasẹ yotọ vbekpa iran, vbe ọ khare wẹẹ: “Ghee oo! E Jehova* keghi rre, ke irẹn kevbe ọkhọngborrie* ọghe avbe odibosa ọghẹe ni huanrẹn,
15 nọ do bu ohiẹn emwa hia, nọ vbe bu abe gbe iran hia nẹi mwẹ imuohan Osanobua, ye emwi dan hia ne iran ru, kevbe ẹmwẹ ni wegbe ne iran ne emwa orukhọ ni ma rẹn Osanobua tae vbekpa ẹre.”
16 Ẹzọ uwu unu ẹre iran na wa rẹn na gui, erriọ ẹre iran vbe ya vian ye emwi ne iran miẹn vbe agbọn, emwi ne egbe iran hoo ẹre iran ru, iran ghi gha rhuọ vbene a miẹn wẹẹ, a i ta ne iran ye, iran ghi ba gha tian emwa ọvbehe* rhunmwuda emwi nọ khian sẹ iran obọ.
17 Nọ ne uwa, etẹn ni ghaan, wa ghi yerre, ẹmwẹ ne avbe ukọ ọghe Enọyaẹnmwa e Jesu Kristi ka ta.*
18 Ẹghẹ nii, iran kegha tama uwa wẹẹ: “Vbe ẹghẹ okiekie, emwa ni ya emwa gbogiẹ gha rre, iran ghi gha ru emwi nọ ma gba, rhunmwuda emwi ne egbe iran hoo.”
19 Iran na ẹre ọ si iwannegbe, te iran yin vbe na ghee aranmwẹ,* iran i mwẹ orhiọn nọhuanrẹn ọghe Osanobua.
20 Sokpan, nọ ne uwa, etẹn ni ghaan, wa gi amuẹtinyan* nọhuanrẹn ne uwa mwẹ ya uwa khian enọ deziẹn, wa ghi vbe gi orhiọn nọhuanrẹn gha dia uwa vbe erhunmwu ne uwa na,
21 ne uwa mieke na ye gha ru emwi nọ gha ya Osanobua hoẹmwẹ uwa,* zẹvbe ne uwa ya mudia khẹ itohan ne Enọyaẹnmwa e Jesu Kristi khian mwẹ ghee uwa, nọ khian ya uwa gha mwẹ arrọọ ọghe etẹbitẹ.
22 Deba ọni, wa ye gha tohan iran ni gbe awawẹ;
23 wa sanmwẹ iran ladian hin uwu erhẹn rre, ne uwa mieke na miẹn iran fan. Sokpan, wa ye gha tohan emwa ọvbehe; zẹvbe ne uwa ya ru ọna, wa ghi gi ohan gha mu uwa, wa ghi vbe gi ẹre gha sọnnọ uwa ighẹ ukpọn ne iran mu iruẹn yi, rhunmwuda emwi ne egbe iran hoo ne iran ru.
24 Osanobua nọ mwẹ uyi gha sẹtin gbaroghe uwa, ne uwa ghẹ de, ọ ghi vbe ya uwa mudia ẹse vbe odaro ọre, vbene uwa i na mwẹ orra, ẹko uwa ghi vbe vuọn ne oghọghọ.
25 Irẹn ọkpa ọre Osanobua kevbe Ọmiọnmwafan mwa nọ lekpa Enọyaẹnmwa e Jesu Kristi miẹn ima fan. Irẹn ẹre ọ yan uyi, ukpọlọmwẹ, ẹtin kevbe ọdakha, ke etẹbitẹ gha dee do sẹ banbanna, uhiẹn vbe ya fi etẹbitẹ etẹghori. Isẹ.
Avbe Futnot
^ Ya ghee Apẹndis A5.
^ Ra “ni ma rhie amuẹtinyan ma.”
^ Ra “imina imina ẹre ikpia na mina.”
^ Ya ghee Apẹndis A5.
^ Vbe Grik, “igba eva.”
^ Ya ghee Apẹndis A5.
^ Ra “arriaisẹn igbe vbe inu ihe nọ khin.”
^ Ra “iran ghi gha kpee lele emwa ọvbehe.”
^ Ra “tae yotọ.”
^ Ra “iwinna emwi ne egbe hoo ẹre ọ mu iran.”
^ Ra “iyayi.”
^ Ra “ne uwa mieke na ye gha rre uwu ahoẹmwọmwa ọghe Osanobua.”
