Ebe Mak 11:1-33
11 Iran ghi sikẹ e Jerusalẹm nẹ, vbe iran sẹ e Bẹtfagi kevbe Bẹtani vbe Oke Ọliv, Jesu keghi gie erhuanegbe ẹre eva uhunmwu,
2 ọ na tama iran wẹẹ: “Wa gha rrie igue nọ rre odaro vba; wa gha wa la igue nii, wa gha bẹghe ovbi ekẹtẹkẹtẹ na dee re, ne ọmwa rhọkpa ma he ka hin do sẹ ebanban. Wa rhan rẹn, ne uwa muẹn gha die emwa.
3 Adeghẹ ọmwa rhọkpa na nọ uwa wẹẹ, ‘Vbọzẹ ne uwa na rhan rẹn?’ wa ghi wẹẹ, ‘Enọyaẹnmwa ẹre ọ khian loo ẹre; ọ gha vbe muẹn rre banbanna.’”
4 Ẹre iran na kpa, iran na miẹn ovbi ekẹtẹkẹtẹ nii vbe a dee ẹre ye onurho owa ọkpa vbe idunmwu ọkpa; ẹre iran na rhan rẹn.
5 Sokpan, emwa eso ni mudia vba keghi nọ iran wẹẹ: “Vbe uwa ru na yi? Vbọzẹ ne uwa na rhan ovbi ekẹtẹkẹtẹ nii?”
6 Ẹre iran na wa tama iran, emwi ne Jesu we ne iran ta, emwa nii na ghi gi iran muẹn gha khian.
7 Iran keghi mu ovbi ekẹtẹkẹtẹ nii bu e Jesu gha dee, iran na waa ukpọn ne iran yọ ke odukhunmwu yan rẹn, ẹre Jesu na tota yan rẹn.
8 Deba ọni, emwa nibun keghi waa ukpọn ne iran yọ ke odukhunmwu lele odẹ, sokpan, eso na ya gia ebe ke oha rre.
9 Emwa ni ke odaro nẹẹn kevbe ni lelẹe dee vbe iyeke kegha wee, iran na gha kha wẹẹ: “Lahọ, miẹn ọnrẹn fan!* Afiangbe nọ ne ọmwa nii nọ rre vbe eni e Jehova!*
10 Afiangbe nọ ne Arriọba nọ dee, ọghe erha mwa ighẹ e Devid! Lahọ, miẹn ọnrẹn fan, wẹ nọ rre ehe nọ yo sẹ!”
11 Ọ keghi la e Jerusalẹm, ẹre ọ na gha rrie uwu ọgua Osa, ọ na ghee emwi hia lẹga vba; sokpan, rhunmwuda wẹẹ ẹghẹ khian buan nẹ, irẹn kevbe iran Iweva nii kegha rrie Bẹtani.
12 Iran khian ghi kpa vbe Bẹtani vbe ẹdẹ nọ lelẹe, ohanmwẹ na gha gbe ẹre.
13 Ọ keghi ke urria bẹghe erhan e fig ọkpa nọ ghaa mwẹ ebe, ẹre ọ na gha khian nọ ya ghee ẹre deghẹ irẹn gha miẹn ọmọ vbe uhunmwu ẹnrẹn. Sokpan, ọ ghi sẹ evba, ọ ma miẹn emwi rhọkpa vbe uhunmwu ẹnrẹn, vbọ gberra ebe, rhunmwuda, ẹ i re ẹghẹ ne fig ya mọ.
14 Ọ na ghi tama erhan nii wẹẹ: “Ọmwa rhọkpa i khian ghi dọlegbe miẹn ọmọ re vbe uhunmwu ruẹ.” Erhuanegbe ẹre kegha danmwehọ.
15 Iran keghi sẹ e Jerusalẹm. Iran ghi rre evba, ọ na la uwu ọgua Osa, ẹre ọ na suẹn gha khulo emwa hia ni do ẹki vbe uwu ọgua Osa ladian, ke ni khiẹn, ke ni dẹ. Ọ keghi ya eteburu ọghe iran ni fian igho* kevbe aga ọghe iran ni khiẹnnẹ idu uhunmwu rhu,
16 ọ ma vbe kue ne ọmwa rhọkpa mu emwi rhọkpa la uwu ọgua Osa gberra.
17 Ọ na gha ma iran emwi, ọ na vbe gha tama iran wẹẹ: “A ma gbẹn ọnrẹn yotọ wẹẹ, ‘Owa erhunmwu ọghe agbẹnvbo hia, ẹre a khian gha tie owa mwẹ re’ ra? Sokpan, wa yae khian ẹgun oyi.”*
18 Avbe ọkaolotu ohẹn kevbe avbe skraib* ghi họn ẹmwẹ na, iran na gha gualọ vbene iran khian ya gbe ẹre rua hẹ; iran kegha mu ohan rẹn, rhunmwuda, te odẹ nọ ya gha ma emwa emwi wa gha kpa emwa hia ni gbẹbu odin.
19 Ugbẹnvbe ọ ghi sẹ ẹghẹ ota, iran na kpa hin orere ẹvbo nii rre.
20 Sokpan, vbe iran ghi khian vbe odẹ vbe owiẹ fioro, iran keghi bẹghe ẹre wẹẹ, erhan e fig nii kaka nẹ, ke inian rẹn wa ya sẹ odukhunmwu.
21 E Pita keghi yi erhan e fig nii ẹro, ọ na tama e Jesu wẹẹ: “Rabai, ghee! erhan e fig nii ne u fi ẹre unu kaka nẹ.”
22 Jesu na ghi tama iran wẹẹ: “Wa mu ẹtin yan Osanobua.
23 Ne I ta ẹmwata ma uwa, adeghẹ ọmwaikọmwa na tama oke na wẹẹ, ‘Kpa hin emwa na rre, ne u ya de ye uwu okun,’ vbene ọmwa nii ma na gbe awawẹ vbe ekhọe ọre, sokpan, ọ na gha mwẹ amuẹtinyan wẹẹ emwi ne irẹn ta gha gele sunu, ọ ghi gele gha yerriọ.
24 Rhunmwuda ọni, I tama uwa nian wẹẹ, deghẹ uwa na nọ emwi ke emwi vbe erhunmwu, wa na vbe gha mwẹ amuẹtinyan wẹẹ emwi nii sẹ uwa obọ nẹ, ọ ghi gele sẹ uwa obọ.
25 Wa gha mudia gha na erhunmwu, wa ghi yabọ ọmwaikọmwa nọ ru uwa emwi nọ sọnnọ uwa, ne Erha uwa nọ rre ẹrinmwi mieke na vbe ya orukhọ ọghe uwa bọ uwa.”
26 * ——
27 Iran na werriegbe gha die Jerusalẹm. Ọ ghi khian vbe ọgua Osa, avbe ọkaolotu ohẹn kevbe avbe skraib,* kevbe avbe ediọn na rre,
28 iran na nọ rẹn wẹẹ: “De asẹ ne u mwẹ ne u ya ru avbe emwi na hia? Ra, de ọmwa nọ rhie asẹ na nuẹn ne u ya gha ru avbe emwi na?”
29 Jesu na tama iran wẹẹ: “I gha nọ uwa ọta ọkpa. Wa gha rhie ewanniẹn mẹ, I gha tama uwa, asẹ ne I mwẹ ne I ya ru avbe emwi na hia.
30 De eke ne Jọn na miẹn asẹ nọ ya gha dinmwi emwa ye amẹ? Ẹrinmwi* nọ ra, ra obọ emwa nagbọn? Wa tama mwẹ.”
31 Iran na ghi suẹn gha gu egbe zẹ iro, iran na wẹẹ: “Adeghẹ ima na kha wẹẹ, ‘Ẹrinmwi* nọ,’ ọ ghi nọ ima wẹẹ, ‘Vbọ ghi zẹ ne uwa ma na yaeyi?’
32 Sokpan, ohan gha gi ima kha wẹẹ, ‘Obọ emwa nagbọn nọ’ ra?” Ohan emwa ni gbẹbu kegha mu iran, rhunmwuda, te iran hia wa rẹn e Jọn ye akhasẹ.
33 Iran na ghi wanniẹn e Jesu wẹẹ: “Ma ma rẹn.” Ẹre Jesu na ghi tama iran wẹẹ: “Mẹ i khian vbe tama uwa, asẹ ne I mwẹ ne I ya ru avbe emwi na hia.”
Avbe Futnot
^ Te iran na erhunmwu gie Osanobua nọ miẹn e Jesu fan.
^ Ya ghee Apẹndis A5.
^ Ra “rọ igho.”
^ Ra “eke ne avbe oyi dia.”
^ Ra “iran ni ma emwa Uhi.”
^ Ya ghee Apẹndis A3.
^ Ra “iran ni ma emwa Uhi.”
^ Ra “Obọ Osanobua.”
^ Ra “Obọ Osanobua.”
