Ebe Mak 7:1-37
7 Avbe Farisi kevbe avbe skraib eso,* ni ke Jerusalẹm rre keghi si koko vbe eke ne Jesu ye.
2 Iran keghi bẹghe erhuanegbe ẹre eso, vbe iran ya obọ nọ ma huan rri evbare, ọni ọre obọ na ma kpe.*
3 (Rhunmwuda, avbe Farisi kevbe Ivbi e Ju hia i rri evbare, vbe ẹ i re te iran ka kpe obọ iran sẹ ukoko obọ nẹ; te iran ghaa ru ọna, ne iran ya lele ilele ọghe emwa ni ghaa rrọọ vbe ẹghẹ nẹdẹ.
4 Iran gha vbe ke ẹki rre, iran i rri evbare, vbe ẹ i re te iran ka kpe egbe iran nẹ. Ẹ i re avbiẹ ilele ẹre iran do vba vbe otọ, ne iran ghaa lele. Usun avbe ilele na ọre wẹẹ, iran ke loo ukpu, akhe kevbe emwi ughughan na ya ekọpa ru,* iran ghi ka dinmwi ẹnrẹn ye uwu amẹ nẹ.)
5 Ẹre avbe Farisi na, kevbe avbe skraib* na nọ rẹn wẹẹ: “Vbọzẹ ne erhuanegbe ruẹ i na lele ilele ọghe emwa ni ghaa rrọọ vbe ẹghẹ nẹdẹ, ne iran i na kpe obọ, iran ke rri evbare?”
6 Ọ keghi tama iran wẹe: “Wa ne emwa okeke ẹre Aizaia ne akhasẹ wa gha guan kaẹn, vbe ọ gbẹn ọnrẹn yotọ wẹẹ, ‘Okpunu ẹre iran na ya rhie ọghọ mẹ, sokpan, te ekhọe iran wa khian rree mẹ ẹsẹse.
7 Ugamwẹ ne iran rhie mẹ i mwẹ esa, rhunmwuda, uhi emwa nagbọn ẹre iran ma emwa ẹre.’
8 Wa sẹ uhi Osanobua rae, wa na rhikhan mu ilele ọghe emwa nagbọn.”
9 Yevbesọni, ọ na tama iran wẹẹ: “Wa ya ẹkẹ vbe ero yangbe uhi Osanobua, ne uwa mieke na gha lele ilele ọghe uwa.
10 Vbe igiemwi, e Mozis wẹẹ, ‘Rhie ọghọ ne erhaa kevbe iyuẹ,’ ọ vbe kha wẹẹ, ‘Ọmwaikọmwa nọ rhovbiẹ erhae ra iyẹe,* a ghi gbe ẹre rua.’
11 Sokpan, wa khian ghi kha, wa na wẹẹ, ‘Adeghẹ ọmwa na tama erhae ra iyẹe wẹẹ: “Emwi ke emwi ne I mwẹ, ne I gha te ya ru iyobọ nuẹn, e kọban nọ (ọni ọre, emwi na ya fiohan ne Osanobua),”’
12 wa i ghi gi ẹre ru emwi rhọkpa ne erhae ra iyẹe.
13 Odẹ vberriọ, wa ma ghi ka ẹmwẹ Osanobua yọ rhunmwuda ilele ọghe uwa ne uwa ma emwa ọvbehe re. Egbe emwi vbenian ne uwa ru i re avbiẹ.”
14 Ẹre ọ na werriegbe tie emwa ni gbẹbu, ọ na tama iran wẹẹ: “Wa hia danmwehọ mwẹ, ne uwa mieke na rẹn otọ emwi ne I ta.
15 Emwi rhọkpa i rrọọ nọ khian la uwu egbe ọmwa, nọ gha sẹtin yae khian enọ ma huan; sokpan, emwi nọ ke uwu egbe ọmwa ladian, ẹre ọ yae khian enọ ma huan.”
16 * ——
17 Jesu ghi kpa hin eke ne emwa ni gbẹbu ye rre, ọ na la owa ọkpa, ẹre erhuanegbe ẹre na suẹn gha nọ rẹn ọta vbekpa erre nọ zẹ.
18 Ẹre ọ na nọ iran wẹẹ: “Te uwa ghi vbe yevbe iran nii, ni ma rẹn otọ emwi na ma iran ẹre ra? Wa ma rẹn wẹẹ, emwi rhọkpa i rrọọ nọ khian la uwu egbe ọmwa, nọ gha sẹtin yae khian enọ ma huan ra?
19 Rhunmwuda, ẹko ẹre, ẹre ọ rrie, ẹ i re ekhọe ọre; ọ gha ghi sẹ ẹko ẹre nẹ, ọ ghi ke evba la egbowa.” Te Jesu ghi ya ọna kha wẹẹ, evbare hia huanrẹn.*
20 Yevbesọni, ọ keghi kha wẹẹ: “Emwi nọ ke uwu egbe ọmwa ladian, ẹre ọ yae khian enọ ma huan.
21 Rhunmwuda, vbe uwu egbe, ọni ọre vbe uwu ekhọe ọmwa, ẹre iziro dan ke rre: alama oghẹ,* oyi, izigha,
22 oghẹ,* arovbẹmwẹ, uyinmwẹ ọkhọ, erẹrẹ, uyinmwẹ ifavbaro,* igbọvo,* ẹmwẹ awua,* itengbemu, kevbe ukọnmwẹ.
23 Avbe emwi dan na hia, uwu egbe ẹre ọ ke rre; ena ẹre ọ vbe ya ọmwa khian enọ ma huan.”
24 Jesu ghi kpa vba rre, ọ na gha rrie ikinkin ọghe Taia kevbe Saidọn. Ọ ghi sẹ evba, ọ na la owa ọkpa, ọ ma hoo ne ọmwa rhọkpa rẹn ighẹ irẹn rre evba; sokpan, emwa na ye rẹn.
25 Vbe ọwara ọkpa nii, okhuo ọkpa ne orhiọn dan* loo ovbi ẹre nokhuo nekherhe, keghi họn vbekpa ẹre; ẹre ọ na bu ẹre gha dee, ọ na do fan fi iguẹ* vbe akharha ẹre.
26 Ovbi e Grik ẹre okhuo na ghaa khin. E Fonisia nọ rre Siria ẹre ọ ke rre;* ọ na gha rinmwiaẹn nọ khu orhiọn dan nii hin egbe ovbi ẹre nokhuo rre.
27 Sokpan, Jesu keghi tama rẹn wẹẹ: “Gi ẹko ka vuọn emọ ni rre owa nẹ, rhunmwuda, evbare nọ khẹke ne emọ re, ọ ma khẹke na filo ẹre ne ivbiakota.”*
28 Sokpan, okhuo nii keghi wanniẹn ọnrẹn wẹẹ: “Ẹmwata ẹre u tae enọwanrẹn, vbọrhirhighayehẹ, emọ ne giẹrẹ ghaa rri evbare, ivbiakota* ni rre ototọ eteburu, ghi vbe fẹko gha rhọ iku evbare ni kharha ku otọ re.”
29 Ẹre Jesu na ghi tama rẹn wẹẹ: “Rhunmwuda ne u na ta ẹmwẹ na, gha khian; nene orhiọn dan kpa hin egbe ovbuẹ nokhuo rre nẹ.”
30 Okhuo nii na gele gha rrie owa; ọ ghi sẹ owa, ọ na miẹn ọmokhuo nii, vbe ọ lovbiẹ ye ebẹdi, orhiọn dan nii kpa hin egbe ẹre rre nẹ.
31 Jesu ghi ke ikinkin ọghe Taia rre, ọ na la e Saidọn gha rrie Okun e Galili, ọ na la ikinkin ọghe Dikapolis* gberra.
32 Evba ẹre iran na mu okpia ọkpa ne ayenhọ, nẹi vbe sẹtin guan ẹse gie ẹre, iran na rinmwiaẹn nọ viọ obọ yan rẹn.
33 Jesu keghi rhie okpia nii hin uwu ẹbu rre, ọ na rhie ẹre gha rrie ẹkhokho. Ọ keghi ziẹn ikpianbọ ọghẹe ye uwu ehọ okpia nii; ọ ghi tu asẹn nẹ, ọ na ya obọ kaan aranmwẹ ọnrẹn.
34 Ọ ghi tọn aro mu ghee ẹrinmwi, ọ na kakabọ hiọnrọn sotọ, ọ na ghi tama okpia nii wẹẹ: “Ẹfata,” ọni ọre, “Kie yotọ.”
35 Vbe ọwara ọkpa nii, ehọ ọre na gele kie, aranmwẹ ọnrẹn na suẹn gha tọn mu, ọ na suẹn gha guan ẹse.
36 Ọ keghi tama iran, ne iran ghẹ tama ọmwa rhọkpa, sokpan, vbene ọ ya tama iran, erriọ ẹre iran ya gha na iyẹn nii sayọ.
37 Vbene ẹmwata, emwi nọ ru keghi kpa iran odin ẹsẹsẹmwẹse, iran na kha wẹẹ: “A i miẹn ọkpa rhie fua vbe emwi hia nọ ru. Uhiẹn, ọ ru ẹre ne ayenhọ gha họn ẹmwẹ, ọ vbe ru ẹre ne odin gha guan.”
Avbe Futnot
^ Ra “iran eso ni ma emwa Uhi.”
^ Ọna i wa re obọ na kpe kẹkan, sokpan, ọ keghi re obọ na kpe, na ya lele ilele ọghe Ivbi e Ju nọ rre otọ.
^ Ọni ọre, emwi ughughan na loo vbe owa, vbe na ghee ọkpan kevbe emwi nibun ọvbehe.
^ Ra “iran ni ma emwa Uhi.”
^ Ra “tie ihẹn ne erhae ra iyẹe.”
^ Ya ghee Apẹndis A3.
^ Ra “a gha sẹtin rri evbare hia.”
^ Vbene a ya loo ẹmwẹ e Grik nọ re por·neiʹa vbe ako na, uyinmwẹ alama oghẹ ughughan ẹre a loo ẹre ginna. Ya ghee Glọsrri.
^ Ọni ọre, ne okpia ra okhuo nọ ru orọnmwẹ nẹ, na gu ọmwa ọvbehe ru emwi ọdọ vbe amwẹ.
^ Ọna sẹtin gha re ẹmwẹ dan ne ọmwa ta ya fi unu gie Osanobua ra emwi nọhuanrẹn.
^ Vbe Grik, “aro nọ gbọvo.”
^ Vbe Grik, “orhiọn nọ ma huan.”
^ Ra “de gbe otọ.”
^ Ra “ẹre a na biẹ ọre.”
^ Ra “ivbi ekita.”
^ Ra “ivbi ekita.”
^ Ra “Ikinkin Ọghe Ẹvbo Igbe.”
